Chingjuiwoshi shar

Chingjuiwoshi shar

Tangkhul kha saikorawui shārphaor kateoteo ngateingarok sālala ngaraikachā hina hakmeiya, ngaraichāchup kachi kathāna.  Kha Chingjuiwo shiwui shārphaorna khangateimei kala khamataila mataimeiyada S Kanreina kapihaidalei.

Achālakhava Awunga eina Awungvali khana kharam (outstation) mavā ngasakmana.  Khawui māwon zairā zaikhame kala zaikhamivana kachiwuivang eina kha saikorawui shār ngalang khangasakna.  Masā kapaia leisāda awungana kharam khavā leisakha, awui shimwui eina kashak kazā phungvai.  Kha Hunphunli kalikha kashang leisāakha, chile kashak kazā zāpai, kaje a hi Hunphunwui eina kashokamina.  Chieina aram eina ngaraichai jihaowa.

Awungvava aramwui shim khipākha shilila mavā phazā paimana.  Phāzā shāra.  Awungala chithā papama.  Kha chithālala kashāngnaobingna shimsā luivāda awungali phāshak phākazāli rāzangngasak ngaiakha, ali hokhuilaga rida mari kaja tin nilala khai nilala naishān ngasak hailaga, chiwui thili phāshak phāzāpai.  Kharam ungkhavālila awui kashak kazā kānhaida chipā ramli kashak kazā khuiga jiakha chili chithāda mari naishāna.  Kala naishān kahai mari chi kateili mihai shāra.  Ana khuihaowa.  Chiwui thili ana chipā ramwui kashak kazā zāpai, chithāda masāakha zāshāra.

Ashi shimwui kasha hi saklāka.  Ashi shimli nao pharāsang shāra.  Chieina ashe khangachā eina nao pharā sangkhavai shim ngateida akha sāhai chinga.  Shim chili ashiwui kasār kafali pamngasaka.  Ashina nao pharāsangkhavaichilila mi kateiwui nao mapharā sangpaimana, shāra.  Agato ngarābingla shim tunghaida shim ngatei haira sāakha atumwui naola mapharāsang paimana.  Awungvawui nao māng pharāsang khavai shim sākahaina.

Awungawui shim hi kā mati sai, Tangkhul ithumwui khangachā eina yāmkhup chi sei hai khavai eina mā lung khavaina.  Shimlungli yārui kala khami shimā rā-akha rāpi rāpam khavaina.  Kakathuma kā chi ashi pam khavaina kala hangzā khavaina.  Chili zangshāra.  Mi khangateili mangmang eina mazang ngasakmana.  Chān rākhangahānbingna chili meikachi sheilaga mazangpaimana.  Meikachibung khui phunglaga rāakha meikachibung chi yārui pam khavai kā chili haisāra.  Ashi pam khavai kā chili hoksā kala harsā hangsang shāra.  Nao ngarābingna hoksā, harsā shaihaokida ashi naobingli yārui rāpam khavai kā chili hangmiya.  Kala ashi shimli khazursā hangsang shāra.  Kashaila mashai phalungmana.  Ramsāla siraosā hi ashe leihaokida ashi shimli mahangsang ngasakmana.  Khamate kā chi pongrum (ponglun chiya) sāda khor zam haikhavai pamna.

Awungva eina awungava hoksā eina harsā hi reiting haowa.  Mashai paimana.  Hi khalei hi aram khana lei khangasakna.  Anina hi lei khamiwui vang eina khawui māwon zairā phāmeiyada sā khangasakna.  Awungashi shimli lishārada khipānakha malipailākmana.  Kalikha naoshinaobingna mathei thangmeimada thāngthāng, ot akha akha khuikhaung theiakha ot chi khuishāra, khisāda khuikhalada ava avāna hengsāda khuivāmi haowa.  Mathum haipaimana.  Thumshāra kala kasha shokpaishinada ngacheelāka.

Awungashi prei gaharni hi hoksā eina harsā lei ijimada sā kateia shaipai chupa.  Kha hoksā eina harsā hi shaikapai atamlei, kaja anina leida shimsā luivāda marān sā, ngalung shimen kala shim sāakha atam chichangli ani khanina hok taithat sang hailaga ngarit shaipama.  Atam khangateili mashaipailuimana.  Tangkhul ithumwui kashār hi leichupa.  Kha hipāshiwui āngalan hi khamatai sangdasāya.  Awungawui kayāngli chikhur akhalei.  Chi awunga māngli chizan khavaina.  Ashi chinao ngarābinglila machizan haipaimana.  Chieina chikhur chiwui aming “Awungawui Chikhur”da hoi.

Glossary

Khazursā:  Shangkhana shailaga taikahai sā

Pongrum (Ponglun):  Achālakha shim hi kā kathum (3) lei.  Khareli yangkhup hoya, kakhane chili piya, hangzāya kala kakathuma chili pong lunga.  Pong lungkhavai chili Ponglun kahona.

Contributed by Tsivyo Kasom

Source: Ringphatyan written by S Kanrei

Please follow and like us:
error0