Haokaphok

Hao Miwun Shongzā Haokaphok

Illustration PC: Playbuzz

Kapisangkahai maleila khamor eina hāngkhamaron sāhaoda Hao (Tangkhul)wui miwun shongzāli apam kachiwui eina haokaphok khala kachi aja rāshungda horzakkahai matheimana.  Avā Sāmsok (aruihonwui Mayanmar) kaho apamwui eina Haonao(Tangkhul) hi Nagawui jāt (tribe) khangateili ngayurlaga khaungna kachiwui khararchāna mathālāk eina leiya.  Kha chiwui mamāngli kali leisā kala kachiwui eina rākhala kachiya khararchānla khikha mashāmana.  Kha Kharar Laa akhali hithāda sākahai leiya;

   Kharar Laa:

O! Katātā kashang shang,

Na kachi eina shokli?

O! Marilungvali shok,

O! Chilli mashok akha,

O! Kazing sirāli kā nganālo, laga unghāng serlo.

Atungli kapikahai Laawui kakhalat hi T Luikhamna (Ex MLA) 1957-1961wui atamli kapikahai Wung (Tāngkhul) Naga Okthot Mayonzā kachi lairik chili hithāda khalatmi haidalei, chiya;

Ithum hi lungvakhur eina shoka.  Chuilākkahai kaphungwui phungtek(phungchat) eina kānshoka.  Kala leiwuk eina ngashānkā akha shokkhavai kaphung chi chuinā haoda sirāli kāzokada khui.  Akhur eina kaphungli kānshok kānzangda khalei chi khipākhana matheilala kazing sirāna theirada khalatta.  T Luikhamna kaphung hi chuimeithui kachi Himalaya kaphungnada awui lairik chili hāngdalei.

Marilungva eina kashokwui khararchānla akha leiya.  Lungkhur chili pamda leilakha awunga chi sāshināhaoda ayaonaobing yāmkhavai sai.  Marilungva chi kasho phutlaga ngathumda avava shokakha shangkhana tukshaihai tukshaihai chihaowa.  Thangkha Awo Kuirana thānlaga, mimān semkhuilaga, mimān chi horshoka.  Chikatheieina, shangkha china minada shaikhavai kharomvā mahungda leilaga Awo Kuirana thānlaga mi khanikathum yongshok rothaoda, shangkha chi mangahātrar thumaniji.  Apam chiwui eina Awo Kuirana thānlaga yāmshokhaowa chiya.  Chiwui thili Avā Sāmsokli ungkapamwui khararchān leidalei.

Glossary:

Lungvakhur:  Haklāk kahai lunghāng akhawui akhur

Marilungva: Haklāk kahai lunghāng

Khangahān:

  1. Marilungva chili kapam atamli awunga sāshinahaoda yāmkashoknada pākhuihaira.  Hi Great Wall of China kasem atamli rekakharek masāpai khala?
  2. Chuilāk kahai kaphung chi T Luikhamna Himalaya kaphungnada hānga.  Hi mamashungakha kachikathā kaphung sāpai?

written by Tsivyo Kasom

Sources:

  1. Wung (Tangkhul) Naga Okthot Mayonza, by T. Luikham
  2. Trough narration by Zingthan Zingkhai

Writer’s Email: tsivyo@gmail.com (The writer is available, if you have any question or concern.  Do post your answers)

One pager of Miwur (Akhum 3) of Wung Tangkhul Okthot Mayonza is attached in our archives.

Comments

  1. Its like you read my mind! You seem to know so much about this, like you wrote the book in it or something. I think that you can do with some pics to drive the message home a little bit, but other than that, this is fantastic blog. A great read. I will definitely be back.

  2. I think other website owners should take this site as an example , very clean and fantastic user pleasant style.

Leave a Reply

Your email address will not be published.