Hoomi Kashungnao

Hoomi Khali Kashungnao kathāda haophok?

By K. K. Hugh

Awo-Ayi thotli Shirui Kashungwui eina Hunphun kala Hunphunwui eina ram khangatei phāzatta leilakha apam akhali ngasotnao kachungkha samngaroka.  Athum ngasoda ram phāzat mamānlaga naoda apam khamathā akha samphanga.  Apam chi aruihon Tallawui Torei kaphungwui eina ngashānshang akha atungshong khalei khare kachāngwui Hoomi shimpam kachama china.  Aruihonwui vanga khamathā shimpam maningmana.  Kha atam chithārān raipan sākapai kala ngararkapai pam sāthuda kaphā apamnada khuisai.  Chieina rai rālala ninglumhao ngalei tumhaoda theishiraila khamathāwui vang, khamahai (ahai khalei) apamnada Hoo-mi kahuna.  Apam chili shangshangwui rakhong leisai.  Kashungnaowui rakhong chi arui eina tangda Kengoo Rakhong hoda lei.

Athumna apam phāzatta leilakha tara masamkaphangwui vang kasak rāhaowa.  Atam chithārān Khangah kaho mi china har akha khuiphungsāda chiho kahai eina zinghām kasā thārān tarali angakhorkhuilaga ungrāsai.  Mipā chi tārong sālaga pamsai.  Hoomi tui tārongli Khangā hoi.  Chieina awui ming Khangah hokahaina.  Akhama kathā har chili shurvālaga tarapam chi atheihaowa.  Tara samphanghaira kachi pao kashā eina ngasotnaobing saikora ringphālākhaowa.  Kala athumna kameoli shar sākhavai, har chi taithatshai haosada mayā ngaroka.  Ngasotnao katei ka-thangmeimeihao, mila chungmeihao kala mipā chiya tuila, malengapao haida mamatui theikhanā eina, phākazā thārān, khipāna akui shaira khalada ngahānakha, ‘Ina tara phākhui kharena, harla iwuina, ina shara, awungala ina sāra’ da wuklungli chukmajasai, kha chithāda hāngakha ili shaothathaorada phaninghaowa.  Kachangchangda, harkui khipāna shara khala? da khangahān eina, ‘Nathumna phāra kaji chi sālu’ chihaowa.  Chieina mi khangateina shaihaowa.  Akui kashaipā chi chithang eina Hoomiwong (Hoomiwo) da theihaowa.  Kashungwui eina mi khangasorāda, ana phung phākhareli zanglala, khali kala hangali kaping kaping kapanga mi maningthuda awunga masālala wungva akha sāda leichinga.  Kala Hoomi Shimray, Kengoowo Shimray kala Suilāngwo Shimray da shang kathum hina khawui Hangasāda leichinga.

Ramhonli pānda leilakha Phungcham eina Tallana rairup sālaga Hoomi Yaknao (kateo kha) chili rai sālala kameona ngachonmida muiya ngasuimithai laga raipan kathā sāmida masi phankhaungthārān, O hipā ram raimahon sālaga kharom rārālida kachichā yāmyām eina khayām thārān, ‘Talla I riga, Phungcham I riga’ da yāmkhangarok eina athum eina athum khalatta kachungkha sāthat ngarokhaowaji.  Kathibingwui ngachaili Phungcham naoshiyo akha avāgatoli, thikahaiya ama preivana, ‘Inaoli ina yanggashibingli singmilaga raikui rangkhui ngasakra’ kachi chi kathāhao, ara ali mathān khaung khiwui vang! da awui kashan raikhuilaga khangaphit eina, ‘Iyah! Achon maikashina chong’ da hanga ji. 

Naoda mi chungsangmamān kachieina aruihon Tallana Ngari Lui vāzāda khalei hi mashapthuda kala raila vimamānhaoda, aruihon pānda khalei shimpam hili hongkatā zingkum 180 shakha kāhaira.  Chili Hoomi Changhtnana Khaorālong akha awui changveili shāpphunglaga talingsang kahai thing chi aruila ringdalei.  Ram hili tākapam thārān shangshangwui eina hanga kapangkashok thārān ishi Kashungnaola rida ramhonli leilakhawui tākam eina kangoo kaho wungpam takhavang papama.

Kathāda Kashungwoli Kangoo hohaokhala, kaje, Kashungpā chi khalāknao akha sāhaoda khor khamang thārān iram tuili KHENGHOO (KHONGHAI KHORAM) vamchingda machihotālāk kachiwui vang ali Khenhoowo hohaowa.  Khanwuithotna Kengoo jikahaina.  Ishi shangwui alungli meiphung khangatei Khangā, Thangri (Rangri), Lungthor kala Riyang da lei.  Kha zaikora hi Kashungnao serra.

Hoomi hangawui sāshaili, awunga māngna akui mashaimana.  Kha Hoomiwo, Kengoowo kala Suilangwo athum Wungnao kathum hina ngakaishai.  Hi awungawui kachām khagai khangazanwui vang, hangngachān khangazek thārān kala shorkarwui mi kharā thārān ngatak-ngatāda shangshangwui wungnao shimli zungkhangasakwui vang hithāda rāshokkahaina.

Kachai eina Tanruili khalei ishi shangbinga Hoomiwui eina kharā serada awo-ayina hāngmaron kahaina.  Tanruiwui shangnao kaikhava, K. Yarngaina Tanruili pastor asālaga aramlā khuilaga phonda chili pamchang kahaina.  Apam khangateili vākahaibing chiya: Atam akhali Tuinemli ishina shai khuisai.  Kum kachida sei avava michinga.  Kha kumkhava aramli theikashok (small-pox) kakazāwuivang, ‘ajakum shai mamirar marali’ da aramna hānghaowa.  Kha, ‘Kathāda khamasai eina hanungra khala, kala seipeng māng chichangungra khala, sei akha khuiphalungra’ jihaowa.  Mangakaishirar thuda sei akha khuimi.  Kha malungvātvāt eina, ‘Ishiwui thei kashok hi nashina phungthulo’ da khonshihaowa.

Ishi sei akha shimenlaga khaung eina, ‘Tuinemli thei shoktalei kachi shāhaoda, khalungli mashokngasak thuwa. Chiwuivang kachichā thothot eina thuihaowa.  Akhana Ngarili yamkāhao, akhapāna Paoyili kala akhapāna Ngaingali yāmvāhaowa.  Ngaingali khaleibing chi K. Nganaongaiwui naothotbing; Paoyili Thishakwui naothotbing kala Ngarili Sapheiwui naothotbing aruila leiserdalei.

Comments

    1. Thàkha khakha bing chili Kashung eina zatkà kathada zatkhala shangwui aming bing g.

Leave a Reply