Hungpungwui Sāmayā kaphung

Khararchān hiwui maramli iram khararnaobingna hāngkachithei ina nganākakhui:

Sāmayā kaphungwui cheepina Hungpung kala ruinganai  khabingwui harra lokzāzatta. Sha ngayurhaida āzak onwung-onvā sāshapa, harvana harra kaphara shāshappa, āpāng kasāngkha kāya kala harra vākapeokhui shapa. Chieina atam chiwui āwo-āyibingna sha chili khonshida kathi sāyur-vāyur, thingnā-rahā, ngalei, lungkui eina rāfakhammida kaphung ngasāhaowaji.

Achālakha rimarālāk kahai Cheepi Sha(shee) khangayura sālaga ākha okthuisai. Harra hina awui khamataiya kashak-kazā sāda okthuiya. Āhi sāyur-vāyur, shiri-shirāwui ācham sāya kala marakhali mikumowui āzakla onkhuilaga kha, ram-ram li yaozatta harchaili harra kapeozāzata. Hungpung kala ruinganai khabing, Hunphun, Choithar, Lamlang, Tashar hi awui yaozat khavai apam ngasāsāyi ji.

Āwui khanā khamathing chi, ram ruinganaiwui harvana harra kapharra ākhon shāshapa.  Harra kaphara ākhon shākhaleoda awui āpang lam-lam sāngkhuilaga āna pamdakhalei āpamwui eina harchai chilli āpang vashungda harra chi vākapeokhuiya ji. Hithāda āna harra lokza miching haida harnao mashakhuilāk thuwa.

Sha pangshap sākachang haida āli tukkakhuila matukhuirar, sākathatla masāthatpaithuwa. Ātam chithārānli har hi khamataiya shakei kala kānālāk kahai otsin li shichinvaisā haokida harnao mashakhui khangasakwuivāng athumna  malungvātta Sha chili khonshi thathaowaji. Ā thithang ngayā kharar ngahongwui sāyur-vāyur, shiri-shirābingna āwui kathingun chili thingnā-rahā, ngalei, lungkui eina rāfakhammida kaphungthāda chuihaowa.

Āpam chi, thang ngayākhali kaphung sāthuikahai wuivāng, sāmayālākka, mayāsanga/mataisanga, chuisanga kaji eina Sāmayā Kaphungda kahoni chikho.

Sāmayā kaphung kali lei? Sāmayā kaphung hi Hungpung Dungrei wui  Sāmayā tāngli leiya.

Khararchān hina ithumli phaningung ngasakluishitta kaja, āwo-āyi(khararnao) bingna khonkashiva maokpei mana, kalashiya.

 

Kakhalat: Sha – Shapeshifting/ Azak onkhui-ngacheikhui kapai pangshap

 

Written by Masochon Y R

Please follow and like us: