Hungshi shangvawui miwun mirāt khararchān

HUNGSHI RAMSOM:  Hungshi shangwui mibingna ramsom khayao kazat ātam chithārān, athumna athumwui Ramjan (ancestral home)wui eina PHUNGPHĀLUNG’ hoda lungphek akha athumwui ramsom khayao kazat shongzā kachida khuiphungzatta.  Ramsom leihā khamathā-zakashi, ngalung china chitheimiya.  Ramsom sākapai āpam kachida ngalung china vāngasāmhaowa kala masākapai āpambingli ngalung chi mangasāmmana.  Chithādasāda, Phungphālung china vakhangasām āpam kachida Hungshi Shangna ramsom sāya.

Hungshi Khayaihungna ngasokazat khangatei hungnaobingli ngarumda, Phungchamwui eina Hungbung leihāh shangkashung chithārān Phungphālung china shangngasāmhaoda Hungbungli mi thingkha-namkha shangtinga.  Hungshi khayaihungna leipam chiwui ato-aze kala zingsho-zingtun kuimareida khayaoyanglaga, Ramphilāvana mayāmida ‘Ramhungvāhli’ suihailaga Phungphālungna ngasāmkhavai leihāh chili ramsom sāya.  Phungphālung chi athumna athumwui Ramcham-Phunhonwui eina phungkharā ngalungna chihaoda, Hungbung ramsom sākhavai leihāh chili athumna ‘Phunghonlung’ da hoya.

Hungbung phunghonlungwui eina ayaonaobingna ramsom makhayaothuirang laga, Hungbungwona marungmida, Hungnao kazip akha pamma.  Hungnao kazipwui khamataiya ningrinva, Hungnaobing kala āyaonaohingna, kaphung-kaphā Kala kongrei-kongrā makānlaga ramsom khayao khavā chithārān, akha eina akha, ramsom kala dhari ngapai khangarokwui eina rai salaga mikui marang ngarok khavaiwuivang, rida Hungnaobingwui ‘HUNGNAO TUI KAZIP’ kapamna.  Hungnao Kazip chili athumna ‘Hungbunglung’ da hoya.

Lung chiwui tuikhokbingli athumna ‘LUNGVA-LUNGKHOK’ da hoya kala athumwui TUISAK SHIM chi, kakai kakāk saikora LUNGVA-LUNGKHOKna langngasinmikhavai shimna chihaoda, athumna ‘Kalangshim’ hoya.  Hungnao kazip, Hungbunglung chi awo-ayibingna hungthot kachida marungsāya.

LUNG NGATHĀN:  Hungnao Kazip kupkahaiwui thili lungnao ngathān-usada, mi thingkha-namkha ‘VASING LUNGTHĀN’ kaphungli kākazippa.  Phungrei-phungrā kala kongrei-kongrā makānda, ramsom khayao khavā chithārān, ramsom phāmei-yāmei khavaida, Khayaihungna, Ramhungvāhli mingzailaga, ato-aze kala zingsho-zingtun kuimareida, kashi-khangā masamphangkhavai malā kāpvāmiya.  Chiwui thili athumna Lung ngathān laa shirāt ngaroklaga, longnao apeng shākha-shākhani eina kongra khalong thāda, ato-aze, zingsho-zingtun longthuimāmānlaga, Tangkhul-Hungram ungshung-vāshungda ramsom sāvāmāmānuwa.  Hungbung Khayaihungna ayaonaobingli thānphunglaga Lung Ngathānphungwui eina PHUNGHONLUNGli ungasāma.  Ana awui shimpam kuimareida khayao-yaolaga, atungshong LEINGUIRAwui eina zingshoshong SEIPAI KONG kala atung-zingtunshong RAVAI KONGwui eina ZINGMEI KONG kala azingshong HAYĀNG wui eina LUNGSHĀNG KONG kala LUNGSHĀNG KONG wui eina MATAK KONG vāshungda, kongna kuinamda khalei apam hi, awui ram HUNGBUNGRAM sāda pamuwa.

HUNGBUNGWOSHI MEINAONI: Hungbungwoshi meinaoni, kaje Hungbungwo eina Maiteiwona MAKHEL ramli pamkasāwui eina KHUMREIli ungpānlaga, Khumreiwui eina HUNGBUNG PHUNGHONLUNGli ramsom ungsomda ungpānhaowa.  Anina Hungbungli pamda leilakha atam chili, ashina hokva akha keisai.  Hokva china nao vaiuda, naosak kharā eina nao vāpharākhavai, shimwui eina khararli thuihaowa. Hokva china khararli anao vāpharāpamhaoda, zimiksho khani-kathumthang shimli maunglāk kachi chi theilaga, shangkha tukshaimi kahaikāda wukkhananga.

Kha, hokva china anao pharākupkahai eina, zimiksho mati-phangāthangwui thili thaiuda shimli ungkārāsai.  Chieina ashina hokzāt heisangmilaga, ana phāzā mahungda leilakha awui shongzā yunkhuikhavai, khumkorli hangkha heirormi haowa.  Hokva china phazākup khaleoda, anao pharākhavai pamli vaukida, khararli hengsāda ngasamzanghaowa.  Hokva chi zatkahaiwui thili, shāngsheilaga, agato MAITEIWO china, hoknao kapharā chi phāvāfarada Khaipāk akha khuiphunglaga shimwui eina thuihaowa.  Ana hokva chiwui pheichon eina tātungkahai hangkhabing chili yunmamānlaga, LUNGSHANG KONG vāshunghaowa.  Kong chi makānlaga hokchon yunkhavā eina, HATHA vāk shok hairasāya.  HATHAwui eina phungrei-phungrā kala kongrei-kongrā makānda yunmamānlaga khavā eina hoknao chi HUSHU eina KAROHwui mibingna pamkasā SĀNGVEI PHUNGREIwui zingtun ngaheivāk khalei ‘NĀSHARA’ li vāpharāhaisai.  Ana hoknaobing chi vātheilaga khararwui sābingna shaimihai paishinada, hokthipwui ngalemli rāmnao (hut) akha sākhuilaga, hoknaobing chi vāmayonpamhaoda shimli maungthuwa.  Ana hoknao mayonpamda, ngayākhani-kathumthang shimli maunglāk kaji eina khararli kalākashi khikhakha shok-kahaikāda, āshāmei wukkhananghaowa.  Honhonlaga agato shimli maunglāk kachichi eina ning matunthuda, chāngvei, kazei shaksākhuiphunglaga agatoli phāvā-urada zathaowa. Āmala agatona vākhavaishong hokwui pheichon eina hangkhabing chili yunmamānlaga, LUNGSHANG KONG vāshunghaowa.  Kong chi makānkālaga, pheichon yunvākhavā eina Hathavāk shokhairasai.  Hathawui eina yunmamānda vālaga, Shokvao kaphungli vākāda agatoli vāngavaowa.  Ana rākhangavao akhon chi agatona shāhaoda, tālākkahai kathuk-ka apam akhawui eina, ‘Hou, Ishāmei, I hili pamda, ishiwui hoknao hili pharāda leiya, hili tālu’

Akhon chili yunkhavā chithārān, hoknao pharākhavaipam, ‘Nāshara’ Maiteina ‘Oknaopokpi’ kaho apam chili rāmnao akha sākhuilaga hoknaobing chi mayonpamsai.

Ashāmeina, hoknaobing chi vātheilaga, ‘Phālākhaira, athumli hili leisārano.  Rāyangluinaosa, ini shimshong ungfasa, na shim maunglāk kachieina kathāhaokhalada phākharāna’.

Agato, ‘Amei, hoknaobing hi mamayon akha ramsāna tukshaimi serhaora.’  ‘Athumli ina mayonhaoka, nana shimli unglaga iwui ngathor ngazin zākhavai kashak kazā teomamei kachiphunrāmimi chilu’

Ashāmeina hāngphanetta suilala, mamayālākthuwa.  Chieina masāpaithuda, ashāmeina shimshong unghao kala agatona hoknaobing chi mayonpamda Nāsharali pamhaowa.

Hoknaobing china athip eina shoktheihaoda shongfa zattheikahai chithārān, āvana thānphunglaga Nāsharawui eina zingtunvāk ngaseivālaga kaphung kajui akhali vāpamhaowa.  Hokvana vāpamkahai ram chili agato Maiteiwona awui ramsom sāda vāpamma.  Ithumwui awo-ayibingna apam chili ‘Hokvasom’ da hoya.  Ara apam chili Maiteibingna ‘Mayāngkhāng’ da phokhaira.

Hokvasomli pampamlaga naoda chiwui eina Zingtunshong vāmeida Koubru phungreiwui ‘Laimaton’ kaho kaphung chili vāpānluishithaowa.  Naomeida, Maitei Leiphai (Maitei Tampak)wui tara ngasunkahai eina KANGLAli hungpam zangmarungkhuilaga zangpamhaowa.

Chithāda sāda Maitei Leiphai hila Hungshi shangwui phungphā apamna.  Kala Kanglali pamda khaleibing saikora Hungshi Phapengna.  Phapeng machutsāda awo-ayi thot eina haophoklaga aja rāshungda agatona Hungthotkhali, Silui alānao akha eina ameiwui shim ungngahānchingda khalei hina.

 

Written by

P. Solomon

From A Journal, The Legacy

Comments

  1. […] (An excerpt from ‘Hungshi shangvawui miwun mirāt khararchān) […]

  2. Loving the info on this website , you have done outstanding job on the posts.

Leave a Reply

Your email address will not be published.