Kachai Thisham shamkhalui

Kha Awui naona ngasotnaobingli mamishai kharar theilaga kala ngasotnao bingnala Ali yarkhei kahai chi theilaga malung ringnahaoda amikli chāra popo tāhaowa….. kathinaobingwui kasākhavā katonga hānglaga ani preigaharwui wuk kakhanang, chapkhangachā hāngkhavai maleithuwa.

NGALEIVAR – Khararchān hiwui khamataiya mipha. Ringshi shāvāna. Anaoli shamkhavai chotlāk eina ngalang pheizata

LATHEMVA – Ringshi shāvana, agaharali ngarailaga huināhaoda anao mayarawuivāng ana khaireo phākhuilaga kathi zātrom romchiphuna

RINGSHI – Kalākashiya Ngaleivarwui naona. Kathibingwui ngachaili chāmmeikap kaje naona. Ali kathinaobing nala hanyar yarkheikida sai

Achālakha Ngaleivar kaho chinao shangnao makhaleia mi akha āpreiva animāng Kachai kaho chili okthuisai.  Ani preigaharwui kachām hāngkhavai maleimana. Ringshilala anili mathāsek kahai naoshiyo akha rālung miya.  Shimkhurna ringshihaoda nao chiwui mingla Ringshi hoi.  Nao chili sophayolāk eina nganaokālaga khararhaira kaji eina kameorai kazāda thihaowa.  Ringkashiwui tungli ringkashi ngarorda preigaharniwui wuk kakhanang khamor eina mahāngrarmana.  Ningli chukmajashon chukmajathailala tāphinghaowa.  Kathi kasār kala kachot kaho hi mikumowui yar sāthuda khāng-khānglaga Thisham marāranglakha eina tangda thikhong lungchinga.

Chikum thishām shāmusa kachieina kashang-khareibingwui vānga sei, hok lei kha Ringshiwuivang fa akha eina tangdala maleisāthuwa.  Chiwuivāng Ngaleivar Maiteishong ngalang vāpheilaga fanao akha kathāla lokhuida anaoli shāmkhavai phāthuwa. Zazatlaga kakhanethang Maiteiwo shiwui mina ot phungkhavai kuli phāzat sāda alila phonda tukthuihaowa.  Ana hithāda pekari phungda thisham haopok-ki chiurasai kala ali huina chihomihaoda kathi kashām maungzangrarthuwa.

Pekari kaphungwui pheisā kateokha samkaphang chieina fa akha lokhuilaga totot shim ungshungkhavai panglāk eina zata. Fachi thanphungda shim ungkashung thārān kathi meiphar pharhairasai. Huinā kahaiwuivang wuk khanangnāhaoda shimli maungla kathinaowui meiphar pamli vālaga thingrong akha leisāda chili ngareikālaga kasaikha kāyangpamhaowa.

Meiphar kuphaida mibing ungserkahai eina kathi naobing chi ungkazipserlaga phāzākhavai kachichāwui zātrom pheingarokuwa.  Ngaleivarna pamda khaleiwui thingphei changli kathi khararnao akha awui chāngvei hamlaga rāngaleozang rasai.  Atungli hāngkahai thāda kashāng Khalei naobingle sei, hok eina shāmsera.  Kha agaharali ngarairailaga makhaungwuivang kala shimli khikha maleilāk kachiwuivāng apreivana ashinaowuivang ningkhariknāhaoda khaireo akha achuikhuilaga anao Ringshili kazeiram vākhavai khaireo chieina hanrom sāchiphuna.  Kathinaobing chi zātrom pheingaroklaga hanyar shaingarokuwa.  Hoksā kasingbingnala, seisā kasingbingnala, iwuila shailu, iwuila shailuda ngaronshai ngaroka.  Kha kachāma Ringshili khipānakha mamishailāk thumana. Vaishihaida kasaikha kachon kuirunlaga khaireophei matatshaipama.

Chithāda leilakha chāngvei hamkapama kasāra china thingtungli yangkakā eina mikumo akha yangpam sai. Chi theilaga ā khayeknahaowa.  Kha thālala matheireksek eina pam khaninghaowa.  Laga ngasotnaobingli mavaopaithuda laa eina phora.

“O! mivānao ngasāmda lei eh!

O! sāyarchi ungshung vāshunglo he!

O! mayarkhei alo.”

Ana laa sāda nathumwui sā khayar chi ungshung vāshungda yarlu, mayarkheialuda kahāng eina Ringshilila yarshai.  Kha Awui naona ngasotnaobingli mamishai kharar theilaga kala ngasotnao bingnala Ali yarkhei kahai chi theilaga malung ringnahaoda amikli chāra popo tāhaowa kala Awui chāra chi thingpheili pamkasā kazeinaopā chili ngayirorhaowa.  Chāra ngayikharor eina phiksada kathinaobing saikora shimānserhaowa.

Ngaleivar khikha masatheithuda tantungwui eina tālaga fa chi thānphungda shimli unghaowa.  Chithārān apreivana ngarailaga masākapaiwui maram katonga hanga kala anala kathinaobingwui kasākhavā katonga hānglaga ani preigaharwui wuk kakhanang, chapkhangachā hāngkhavai maleithuwa. Thā-ilala huināhaoda khikha masāpaithumana. Chithāla ā fachi anaowuivāng sāphalungrada phālak eina keimathaolaga zingkuma kathā thishām ungshung haira kachieina āram kathinao kateili ngasoda ashi naoshiyowuivāng fachi taithatlaga thishām kakhane shāmluiya.  Thisham shāmkhalui hi ishi Tangkhulli kharena. Hoomi Phanitla kahova chinala agahara Shumali thishām kachida kum tharuk shon thaichiphuna.

Written by Tangkhul Literature Society

From A Journal, The Legacy

Please follow and like us:
error0