Kashungnao

Tuihao

Haokaphok – Kashungnao kaho aming hi KASHUNG kaho chiwui eina kharāna.  Tangkhul ngaleili khalei kaphung saikorali chuimeikap kaje, Hunphunwui zimikshoshong khalei kaphung chiwui aming KASHUNG HOI.  Aruihon Shirui kashong da kaho ming hiwui kachangkhatpāva Shirui Kashung kachina.  Khikhala chila kaphung hina zimikshoshong shungkhamda khaleiwui vang Kashung da kahuna.  Kashung kaho kaphungwui makāli (ngalemli) kapam khabing chili kashung hoi.  Chiya Shirui, Lunghar, Longbi Kachui, Longpi Hirei, Kālhāng kala Kuirei saikora hiwui aming Kashung hoi.  Okathui khareli ishi kashungnao kaho hiya Shirui eina Lāngdāng kha khani hiwui ngachaili somsai.  Chili Kashungphung hoi.  Tangkhul ngaleili ungsom khare chithārān, Hunphun Awungana ram kachivali mei ngayarkhami chi Vayainao Phungreili khalei Meivalung apamlina.  Mei ngayarmi kahai eina kachichāwui mithānli ngasoda kaphung avavali som khavai Hunphun awungana shivātserhaowa.  Kashung pāshi Hunphun awungali ngaso khaungashina chilala mi chungnā kahaiwui vang Hunphun ngaleili somkhavai apam maleithuda kong kānkālaga Lāngdāngwui ngalemli kāsomkahaina.  Arui eina tangda Langdangwui kayāngli Kasungnaowui thari lei.  Kashung kaho kaphung-makāli pamkasāwui vang Kashungnao kahona.

Kashung mahon kala Kashung hokharai hi atungli hāngkahai Kashung kaho khābing hila ngaraichāda mahona kala horai.

Akhum I

HORSHAI:  Shirui eina Langdangwui ngachaili somda khalei atam chithārānwui Kashungwowui ming Horshai hoi.  Kashungnaona shimpam khare chi chihohailaga, arui khalei Hunphunli ungkapān kala hili maungkhararbing Raphei shong eina Kamo shong pākthuikahai chi Awo Horshaiwui thotli kashokna.

Hunphunli ungkasom chiwui apong hithai.  Zingkhai Muirengshi chinaoni Kamphasom kachuili pamsai.  Ani chinaoni rai pinglāk thathuiya.  Hunphun Awungashili shaothatser hailaga anina Hunphunli Awunga ungsākhavai khangarān sai.  Kala thangkachida mi mati phangā khuithui chinghaowa.  Hunphun Awungashina Muirengshi chinaonili rai sāsā chilala ani kathā rai kaping mazangsāthuda sakhaowa.

Chiwuivang eina Hunphun awungana mi chihokāda Awo Horshaili, raithit hāngsangmikhavai seihā kāsai.  Awungawui tui chi shālaga Awo Horshaina hānga, ‘He inao ngarā, akhama zimik raivāra, chāngvei phungkathei kala kazei singkathei khipākha mashokpailākmara.’

Akhama kathā rai vai.  Zingkhai Muireng chi mi khangachāwui phei mathāla, pheimayā khanukshong hatunglaga phona chi. Akuila āngānaokui rikhamaya ji.  Rai khavā saikora khairengphung shangkashung eina Awo Horshaina hānglui, ‘Inao ngarā ipāng matārang lakha Muirengli pāng kākhare chipāli iwui kazei eina rungra, kha ina rida pāng kākahaiwui thili kachichāwui kathem athishurda thirui zangpaira.’

Zingkhai Muirengli sākathat:  Zingkhai Muireng chi Khaireng rashongli khaireo chuida leisai.  Chi awui pheichon luishong katā thāda thei.  Kha awui pheimayā hatlaga kaphonwuivang ngahongshong shangkahainada theihaoda rashong athishurda shurshang shum kaje apam akhali khaireo khamāsai.  Chieina Awo Horshaina awui thi kashurbingli apāng yaplaga ngathumda Zingkhai Muirengli pharseisanghaowa.  Awo Horshaina zahaira kachi kathei eina, khangasobingna ngaheivālaga kachichārun eina vārunga.  Kha āgatopā kharāda leisā haoda chakphikthuihaowa.

Muirengwui akui khuilaga Hunphun Awungawui raihaili unghaida unghoyama.  Zingkhai Muirengwui kui khuikhaung chi theilaga ringphālākhaowa; kala hok kathaova akha taithatta raisā shai.

Akhama kathā shim unguki kachieina raikhavānao kachivali tinnao harnao ngarinmi.  Kala kathāna akhavāli Khuirang (kachon) akha mi.

Chiwuithili atam kashānglaga Muirengwui agatona āmawui raithit hāngsangkhavai rāluishithaowa.  Chieina Hunphun Awungashi ngacheeluihaowa.  Kala Awungana hānga, ‘Inao ngarā, ishi māng pamakha kalākashi shokchinghaora.  Kala kalā kashi atam kachida Kashungwo shili makāhopaimara.  Chiwuivānga ashili iramli ungpamluda kākaho phāmeira.  Ashina ungakha Kashungwowui MAUN peichaoda miserrada hānglu.’

Hunphunwona chihokakā mibing china tui saikora Awo Horshaili kāhāngserra.  Tui chi shālaga Awo Horshaina awui mibingli hānga, ‘Inao ngarā, ishili ungluda Hunphunwona kāhānghaira.  Nathum khi phaning khala? Inishi apam akha eina ngasounglaga khami thāda kong makān ngarokta kapam hi kaphāla maphāthura.  Khaungla phāmeirada phaninga.’

Tui chi shālaga ayao kaikhana hānga, ‘Amei, nana phāra chiakha ithumna khi hāngra, nawui kaphaning eina vaira’.  Kha kaikhana hānga, ‘Amei, nathum ararbing hili pamlala, chili kāpamlala, khikha khavāt maleimara; kha ithum ayao kachungava, mi chungnāhaoda, hanla zātla mangarinzāmara.  Chieina nana ungphalungra chiakha, maungluda makhāmrarmara, ithumli theimachee paimachee ngayarmilu, laga ithumwui pamkapai apamli apamuga.’  Chieina awo Horshaina, awui thi mashur khararbingli theimachee paimachee ngayarmi kala somida athumli chihohaowa.

Atungshong kashangbing chi arui, Chingai, Tusom Khulen, kala Somrali pamda khalei hibingna.  Azingshong katābing chi Leitingli tātinga.  Chiwui eina tāmamānda Thingkap, Kabong (Tangkhul Hundung), Nongdam kala Tartung (Chadong) hili kasombing china.

Hunphunli latkhaungbing chili Hunphunwona Paraiphung (Kongsangphung) kaho apam chi chikāmida arui eina tangda kashungnaowui shimphung sāda lei.  Kashungnao ungkapam atamli Hunphun Leingapha hi ngayisai.  Ngayi chiwui kameothing (Masaithing) kahaka akha Lunghengwui ngalemli phora, kala thingphāng chi ngayitungli shokshunga ji.  Kameo chi sāshilāk kahaiwuivang iram mapampai marada iram Luira atamli mayar ngalā saikora kazipta laa phokta kameo chi kashamhaowa.  Kameo chi yāmkahai eina masaithing chila thenghaowa, ngayila thenghaowa.  Ngayi thengkahai eina mila sompaihaowa.  Kala alung kayāng chi Leingapha sai.

Akhum II

Maun:  Hunphunli ungkapam eina Kashungnaoli yartākahai maungbing chiya, Kahum Ahang Harrayan; Kazeikharik kala Maomi Meiyan.

a). Kahum Ahang hi Kashungnaowui Harrayan lamna.  Harra yanglaga lam phāmiakha, langlui khavā mi kachivana langpāng chikata.

b). Kazeikharik:  Achālakha Kashungnao hi raikapingashi sāthuda raiwui MAUN ashili mi.  Maun chi kathāda yangkhala kaje, ‘Kazeikharik sara’ da khali chishātkahaieina zimiksho chithang ngavei saikora shungserhaowa; khipākha harshāng makāntāpaimana.  Shanaobingla tara kasok, yāmkok kasing masāpaimana.  Mi zaikora shimli phanipama.  Chithang Kashungnao saikora awungawui shimli hok kathaova akha shailaga, mayarnao saikora kachichāwui kazei singriplaga raihaili kazei khariklaga mahonsanga.  Khamahon kupkahai eina Raihai kapeowa.  Raihaiwui alungli phumkahai RAIHAI ngalung chili, ashee kakā aga-agai kala khao kathā zangsā akha ram shirada theikhui.  Kha māhik kathā kala theikor paikor kathā zangsā akha ram shāngrada machutkhui.

c).  Maomi Meiyan:  Achālakha Kashungnaowui Lamyai Lui Lāngdāngkong or Maomi hina.  Kala Maomili lui kahaka kazangwuivang kala Maomiwui ahangla kahaka ngakham kahaiwuivang, Maomi meiyan hi Kashungnaona yanga.  Maomi Meiyan hi Langdangkong eina thuilaga Saakuirār shongfa eina tanga.  Meiyan hili Zimiknao Siluishi eina Phungchamvanao Razimshina shai sai, kala ara sāphei sāpenga Wungvali kāhaira.  Akhariva Kashungwowuili rānsanga.

Kahum Ahang Harrayan: Kahumli Harra Yangkasang chi ho kahaiwuivang Langpāngkakhāng maleithuwa.  Kathāda chihohao khala kaje, atam akhali Harra khayang thārān harra chi ngawokphātlaga makhotungli rārkahai raikuili ngawokkharorwuivang khana, hi maphāmana, chihaoda Harra khayang hi shimitmi kahaina.  Chieina thuida Harra mayangluithuwa.

d).  Raishaophung: Achālakhava Pahei eina Maitang kaho lui hi Kashungnaowui lui mānga.  Chithārān rai thikhangarokwuivang eina yansāngsa eina lui machangtāpaimada Raishaophung kaho kaphung chili Kashungnao mayar tharā shikhana raikān pamchinga.  Rai kharāthārān, ‘O, rai rārāli’ da khavao eina lui khavānao zaikora apam akhali akazipsera.  Chieina apam chili RAISHAOPHUNG kahuna.

Atam akhali Luinemna Awo Khungmeli apam hiwui eina khuithuihaowa.  Ali khuithuikahai eina Kashungpāshina Hunphun saikorali hāngsanga, ‘Rai kakān hi ishiwuivang kakān maningmana.  Ishina, ‘rai rārāli’da khavao eina Tuirā luisai, Kasā luisai kala Lengchengli luikhavā mi zaikora yāmrāserkachina.  Chiwuivang ishi kathi hiwui raithit mahāngsangmira khala?’ da ngahāna.  Kha awungashi eina Kashungpāshi shang athum kapā kasā ngapaingarok kachiwuivang tui shokhaoda raithit mahāngsangmi thuwa.  Raithit mahāngsang khamiwuivang kathāra khalada ngazeklaga, Raishaophung kaphung hi nashiwui lam sāhaoluda Kashungpāshili mikahaina.  Chiwuivang Raishaophung kaphung hiwu alungli ngarālui khavālila, theilui pailui khavālila luimasāt khuisai.  Kha Kashungnaoliya luimasāt makhuimana; khayorla mayorpaimana.  Raishaophung kaho lam hiwui alungli ara luila ahangla vāserdalei.  Khipālikha luimasāt mapomana.  Aruihonwui acham kateokha ngateikahaiwuivang Awo-Ayiwui achamthāda saklāk eina masākhangai, kala khawui lui makhalei, ahang kāngkui makhalei mili kakhām mamashungmarada kaphaningwuivang chihokhamina.

e).  SHAIKAKHUI:  Thingkāp, kabong kala Tartung kha kathum hili kapam mibingna thot kachida silui nilala seijang nilala misai.  Kha hi thot-thotli khamina.  Kum-kumle kashan kachon khami eina vaisai.  Shaikakhui hi raishai maningmana.  Kha chinaoshai sāthuda yārthot avava eina sei kakhuina.

Governmentna shai khapkahai hi Raishai, danti eina kakhuiya shai chi khapmikahaina.  Kha chinaoshai hiya khararali agatona khayāshida khamina.  Kala khararana malungvāta maringphāakha theishirai maphāmanada milu jilala ngakaishikhavai maleimana.  Kha āra Vareshi sāserkahaiwuivang, Shaikakhui hi maphāmarada ningphākhayā eina chiho kahaina.

f).  VATPAR:  Zimitunshong khalei Aphung, Kachai, Hoomi hikathā khābingli shai kakhui maleimana.  Kha shim vat parkha, kasāthei parkha khui.  Shon kala khorām khamatha samphangakha chikathā chi kakhuili khikha makhāmmana.

 Akhum III

MAKENG THANGAN:  Makeng (Ngachāng) kaje, Tangkhulna ngachāng kala Meiteina Makeng kaho hi Kashungnaona phungphā kakhui lam akhana.  Ram hi phungphā kakhuiya awo chili Makār hoi.  Ngava kachui kaho, aruihon Makokching kaho apam chili Tangkhul pānda khalei atamli phungphākakhui ramna.  Maiteiwui Purān lairikli yangakha 16th centurywui atamli leikasāna.  Atam chithārān Makengli Thangal or Thangan hoda mi akha okthuisai.  Awui khamashunga aminga Shangkān kachina.

Thangal (Shangkān) kaho china Makengli awunga kasā atamli kasaka ot akha shoka.  Tampākli Meitei awunga Paikhonbawui naomayara Charailongbana pānda naomayara Charailongbana pānda leilaga awui Maharani Nungshel-Chaibi kaho chi nao vaida leilakha awunga Chairailongbana naokhavai chi shanao kā mayarnao khalada Pānjeeli yangasaka.  Panjeena awungali hānga, ‘Maharanina khavai nao hi mayarnao shokra; kha kasak akha leili kaje, pharāki kaji naomayara hiwui pāngli awungawui manglā shimānra.  Pao hi shālaga awunga wuk khananglākhaowa.  Kala atam kachida nao kapharā chi saklāk eina yangchinga.

Garibnewas Kapharā:  Naokapharā atam ungshunguda Maharanina naomayara akha pharai.  Nao chi pharā khareoda Maharanina Makengwui awunga Thangalwui apreiva Shamnura kaho chili thākta tāluda hoi.  Maharani eina Shamnura hiya khavaknao sāda mashitlāka ji.  Kala mayarnao pharā akha nana thākta tākhuilaga themlāk eina nganaomiluda rida ani ngazekping hairasai.  Nao pharāhairada kasha eina Shamnurana hengsāda tālaga nao chi ngathumda khuithuihaowa.  Kala awungali kapikta nao mapharāla ngalung pharai chikhaninghaowa.  Hithādasāda nao chi Makengli Thangalwui shimli nganaokhui kala awui ming Garibnewas hoi.

Garibnewas kaho nao hiwui ming Pamheiba la hoi.  Pamheiba kaho awungawui nao hi rarmamānda zingkum 13 kākashung thārān Thangal kaho china Maitei awungali shai mamithuwa.  Chieina Charailongba awungana malungvātlāk haida tandi mikhavai shipai tengol akha thānlaga Makengli kai.  Kha kazingkashiwuivang Makengwui kaphungpheili zimiksho khani kathum thang pamsanghaowa.  Maitei awungashi rāhaira kaji pao kashā eina Makengwui awunga Thangalna mashitkhuikhavai pao shivāta.  Pao chi samkaphang eina Maitei awunga ringphālākhaida Makeng kaho kha chili zanga.  Kha chili kazang chithārān Pamheiba kaho nao chi theilaga kala awui kasā khavā saikora yanglaga matakhakhaowa.  Khipāshinao khalada khangathing eina, awunga Thangalwui naonada hānga.  Thangalwui naona kachi kashāeina Maiteiwo Charailongbana hānga, ‘Nao hili yanglaga leikashi hāngkhavai maleimana.  Nao hi ina nganaokhuikhavai iwui pāngli kahorsangmilu.’  Khareli Thangalna mamayālākmana; kha naoda anggi majipaithuda mayāhaowa.  Kha nao himāng tampākli mapamngaimarada ali ngasopamkhavai Makengwui naoshinao khangatei khanili ngasongasaka.

Naoshinaobing chi pamkhavai konungli shim akha sākākhami chili HAOMACHĀ LOISANG hoi.  Arui eina tangda konungli Haomachā Loisangda khalei chi chiwui haokaphokna.  Pamheiba kharar eina ana awunga sai.  Kha ali ngasokapam naoshinao khani chila rarmamān kachieina phonda Maitei ngasāhaoda tampākli pamhaowa.  Pamheiba awungana ali khangaso ngasotnao khani chili, akhali Haobam akhapāli Ngangbam sāngasakhaowa.  Nao khani chi Ngangbam eina Haobam onkahaiwuivang Maitei awunga shina shang khani hili saklāk eina phaninga.

Makeng awungali Thangal kahowui vang awui naotā (naotun) saikorali Thangan jat hokahaina.  Achālakhawui eina thuida Thangkhul pānkasā kha Ngavao, Haomān, Sitāngphung, Tārtek, Seiphung, Mayarngalāsom, Muinaosom, Hokvasom kala Akhakphung kaho khabing hili Makeng eina vālaga akasom mi kachungkha lei.  Athum chili Thangal hosera.  Hokvasomli kapambing kachungkhava Marāmwui yurnada hoksā mashaimana, kha hoksā kashai zaikora chiya Thangan sera.  Thangal hi Makeng eina kashokna.

AKHUM IV

Kashungnaowui Laa

Si Laa

O, Yāron rāntung, rānkui hao shangrāli;

O, Maiteia akui, O tangmati khuiya;

E-he O, thingphāng ngahura.

O, thingphāng ngahura, naseikui raima;

E-he O, chaothei kapana.

Maitei awungashina Hunphunli loi chankhavai rai ngararkida kārāli kaji pao kashā eina, Hunphunna Maiteili ngararkhavai apam kathum sāda raipum pama.  Awungashina Theimaruiphungli pama, Kasom eina Vayainaona Khairengphungli pama, kala Kashungpashina Kharei Khavangra da  Humpum iniwui ngachai Maitei Ngaphar kaho chili pama.  Maitei maungrang lakha rida ngazek ngaroka kaje, ‘Maitei kuitei matākkakhuipā chili mayarnao masāmara’ da hānga.  Kachachangda Maiteipāshi ungrā kasā eina naomeikhonlila mangacheela kuitei tākhuirada ngaheivai.  Maitei pāshina naomei sing, Kashung pāshina kazei singlaga sakchanglāk eina ngararda Kashungpāshi kachungkha thisanghaowa.  Kha Maiteikui hangmati khuida, ‘Thingphāng ngahura’ da laa kaphokna.  Kala kasaka rai akha shokkahaiwui vang apam chili arui eina tangda Maitei Ngaphar da kahona.

Kashungnao Laa

Kashungwungwo, Kashungwungwo, Maun-ngam!

O, Maun-ngam, raihai tungli ngawok;

O, ngawok-ila kazei kharik sāyangsa.

Sāyangsila, Kashung mahon rāyanglo,

Kashung mahon raikhot mahon sāli,

Sāri-ila masāri yangla makhui.

Marān Laa

O ngapharsida, O ari rārangsaya,

O ishi Kashung Kasom … Hah!

Ya, ari zaikatinglo-o …

O Leingaphali, O ari zang-ngareta …

O, ngasung ngasung …

Ya, nava amai yāmkāya …

O nawui naole, ya, iwui naona singyuiya …

Nava masungrarda, O simuk kasi hommiya …

O chithang kazing …

Ya, Kashung Kasom ikhān ungshāya …

Notes:  Kashung Kasom eina Awungashi rai khangararwui laaphona.  Awungashi mayuirar mada simuk akha eina sumsanghaowa.

Written by Y.K. Shimray

Please follow and like us:
error0

Leave a Reply