Khaiyār eina Lāklamphi

Achālakha khaiyāra hoda Phungcham ngaleili okthuisai. Khaiyāra hi Phungcham Pheireinaona ji. Khaiyāra nganuilakha āva eina āvāvana harvā ākha kei-ichi. Harvā china ngathor harchai eina tālaga kayāngli shokkhong khaleida tang kathumwui harva katonga harvā chili yongrai. Ngashun shimtungli khonglala harva katonga chithāda yongrāchinga ji. Har kaphābingna harvā chi loga chilala ava eina avāvana mayorsanglākmana. Harvā chi keikeilaga thangkhava taithatshai haosada taithathaowa. Kha harkhari chi sāmathāhailaga hankhong ākhali sanghailaga malaihaida hamli masangthuwa. Ngathor chi harsā hangshailaga preigahar lui vāhaowa. Harkhari chi malaihaida mahangshaithura kachi ānina luili phaninunga. Preigahar ākhala ākhala āshama shim khaung chithārān harkhari chi mamalai-asada hangaroklaga shimli khaung eina malaihaoda chithang ngayā chila mahangshaila pihaowa. Akhama kathā ngathor chila malaihaida mahangshaila lui vāluishithaowa. Chithanghona preigahar mamalailākla shongfali phaningungshumda shim ungkashung eina harkhari chi ungyanguwa. Khayang chithārān harkhari sangkahai ākhong chili hingpit eina kazao khani zangsai. Khaiyāra shāvāna chi khuilaga khayang chithārān āwui pha hui-haowa. Ana apreivali hi kaphā sānikā kashi sāni khala yangluda khami chithārān āpreivala maphaningsālākla āwui pha kathui chi theihaowa. Preigahar chi ngazeklaga Khaiyāra rar-akha sangnaoranuda sāngkungli haihaowa.

Khaiyāra yāron kāshungda ngalālong yaoura kachieina  avāvana Khaiyārali kazao chi sangluda mihaowa. Longshimli Khaiyārana kazao chi sanglaga khavā chithārān longnao zaikora kazao chili rikrik yanga. Khiwuivang chilaga awui kazao chi khangachā kazaoli hingmeikhāra. Mayarnaola shanaola, amei Khaiyārli, nawui kazao chi khayangkhuiga khayangkhuigada rorror matuiura. Kazao chi khayang mayarnao zaikorawui shanghon kapkhaiserhaowa. Athum ākha eina ākha hithāda hāngaroka, ‘Yeh, āwui kazao hi ākha leile’. Yāronnaobing yangkup kahai eina ngalānaobingli maron maron milaga yangasaka. Chithārān āthumla kazao chiwui pangshap ākha leili kachi theikhui. Khaiyārawui kazao chi ngalāri kai. Khaiyārna ngasoda meisum pamkharuma, ngasoda tantak tākhangaruma ngalānao zaikora Khaiyārli maleikashi mazanglākmana. Zaikora Khaiyārwui shāmsera. Phungcham shilepthing haongakānuwa.

Kha Vashumtāngli Khaiyārana meisum tantak makhangarum Lāklamphi hoda ngalā mathāsek kahaiva ngalānao akha okthuisai. Khaiyārana āli samphangkhavai kachā atam yangchinga, kha atam kachā masamphangrarthuwa. Thang zimiksho kha Lāklamphiwui thi kazunvālaga āna luipheili āngazinpamhaowa.

Khaiyārana hithāda vaowa, ‘O achon Lākngamphi, Khaiyārawui shām’ da khavao eina,

Lākngamphina, ‘Khipāshi naoda, Khaiyār iniwui sui singkhala? Nana Khaiyār iniwui kasā kali theida?’ da ngahānkai.

Shāngshei kachieina khareli kahāng chithāda vaoluishita. Chieina Lākngamphinala āna khareli kahāng chithāda ngahānkāluishita. Lāklamphiwui ningli mina sui morei chiphunkida kasāna kachi phaninglaga maringphālākmana. Hi phaninglaga Lākngamphina āva eina āvāli hānga, ‘Ava eina āvā, ina ishili pilala ngalālongli āpilala sui moreiphun khikha mangateimara, ila ngalālongli āpiuga’ da ngalālongli shangpihaowa.

Longnao piuki kachieina Lāklamphina, ‘Amei Khaiyār, nawui kachon horrālu aja ini pira’ da poi. Chi theilaga mayar ngalā zaikora mikpai kashi, aniwui leikashi chi kaikhavai ngarānhaowa. Thang ngayākhava Khaiyārna longnaowui chānkasot nganāda Lāklamphili vamkhuikhavai kasā eina Lāklamphina Khaiyārli kazao eina yaida āhā sātekmihaowa. Chithāda kasā chiwuivāng Khaiyārla Lāklamphila khanini maringphā khangarok shokhaowa. Chiwui tungli mayar ngalānaobingnala mataimeida aniwui leikashi maungshungkhavai ākhalila ākhalila hāngkharihaowa. Chithālala Khaiyārla Lāklamphila ningliya kathāda mashitkhuishi khala kachi leithathuiya.

Ani hithāda leimahunglakha Kālhang awunga, Phungshin-na Lāklamphili rākhāmlaga khuiunghaowa. Khaiyārna Lāklamphili mamalairarthuwa. Lāklamphila Khaiyārli makaphaning maningmana. Khaiyārna Lāklamphi khalei ramli āwui favā kahaka akha yorkida thuiura. Kālhang āyao khipākha mangasamrarthuda zaikorana iramwo Phungshinli ngahānlu chihaowa. Khaiyārna Phungshin āwungali fa chi yorkhavai ātamli Lākngamphi mā heida leisai. Khaiyār kharā eina Lāklamphi ot kasāshong mavāthuwa. Yāmkok pangpuitāda mā sāthahaowa. Khaiyār kharā Phungshin Awungawui ning maringkaphā malāngluima. Khaiyārwui fa mayangsangmiphutthuwa. Khaiyār wuk khanangzan eina hangnunguwa. Shimli unglaga ning chingri kahaila masamphang Lāklamphili kathāda shimenkhuisi kachi māng ningli chukmajaya.

Piphup pamphup kahai maleithuda Khaiyār āwui chāngvei yorkhavai Lāklamphi khaleiram vāluishita. Kālhāng āyao khipānakha mangasamrarmada Khaiyār Phungshin āwungali lokhavai āngahānluishita. Khaiyār Lāklamphiwui marun ātamli sakhavā thai. Lāklamphi mā heisāda zāt sāthaluishithaowa. Chi theida Phungshin mik mathakhaowa.

‘Naphaowali phaningthuihaida ot kasāshong makhavālā’ da Lāklamphili zeida hānga.

Lāklamphina Phungshinwui maringkaphā chi theida vaitei shangkan khuimida Phungshinli marip ngasakhaowa. Khaiyār khikha masāpaithuda āwui chāngvei khuiphungda āram harshāngli wuk khanangzan eina zangngareopihaowa. Hishong Phungshin āwunga maripta piphupkahai eina Lāklamphi awui shung sheikhuiphungda Khaiyārli ngashurkhuikhavai unguwa.

Harsāng kazang eina, ‘Khaiyār yongusa’ da hānga.

Khaiyār āwui kaphaning ungshunguda mathānthuthup Lāklamphili thānphungda yonguwa. Shimli unglaga ani rasa ungsāhaowa. Kha aniwui rakasa mapongthuwa. Khaiyārli Phungshin āwungana āshiwui khāmongpheili rimlaga rungthathaowa. Lāklamphi rasa ngaphathaoda wuk khanangzan eina Khaiyarli kahaochachao luihaowa.

Khaiyār āvāva ānao mayarawui phasei hāngsangkhavai māng ngarānlaga leisai. Ana Phungshinli āwui luili kharā rayangchingda leisai. Phungshin āwungana lui vāuki kachi ātamli harshāngli zanglaga lunggui kahaka shileotālaga āwui favāli rengtā ngasasak kachi Khaiyārshāvāna thei. Khaiyārshāvāna Phungshinwui favāna matheikhavai Phungshinwui lui shongfapheili kathui thingrong ākhali kālaga rimhaowa. Phungshin āwui favā chi ngasoda katā ātamli Khaiyārashāvāna awui kazei eina ngashum yangda Phungshinli chili rungthathaowa. Phungshin mathivāranglakha āna Khaiyārshāvāli ili raikuirang mathāda sāmiloda hānglaga thihaowa. Khaiyārashāvāna Phungshinwui ākui rangkhuilaga chi khuiphungda āram khali raisā ungmishai. Hithāda sāda Khaiyārashāvāna Khaiyārawui phasei hāngsanga.

Written by Tangkhul Literature Society

From A Journal, The Legacy

Please follow and like us: