Longra

Longra

(Phanit hi kathinao eina kharingnaobingwui phanitna)

Phanit hi chumpha akup ngashida zimiksho shānphoklaga katharukathang mayonna. Khayon (December) kachāngli ungtai.  Phanit hi zimiksho phangāthang sai.  Hi Longnaowui phanitna.  Chithālala gaharnaobingla ichātāngwui Longra kashak vāzangserra.  Ngalānao khani akhala vāzanga.  Ngalālong kasā hoda ngalanaobingla shaksai.  Kha preinaobinga long kashakli mazangpaimana.

Yarronnao chikum kathebingwui vangnada, Ava Avāna awui vākshot sangmilaga longrakashak vāzang ngasaka.  Chithāda shitsangsai.  Kala awui ngasotnaobingna, awui hanyar kala khorzam chi ava eina avāli khuivāmichinga.  Phanit hili thangthangwui otsak ngatateida mathālāk eina ngarangrā sāya.  Long hi mashakranglakha khor, zam hangsanghairasai.

Kharethang longthing kaphā zimikshona.  Longra kashakli ringkhavainada meirongkui kathā longnao saikora vāphākhuisera.

Kakhanethang sāthiya. Chithang ngazin shakzang haowa. Ngashunshonga nitlungli rikkhavai thing phungpama.

Kakathumathang hi kathinaobingwui leishatpānwui zimikshona.  Chithanga longnao saikora longra mahonwui sāri shaksā sera.

Sāri: Manei ngavairip, Kongsāng ngachārip, kazao sangrip, khaipāk kachang maningakha thing eina sākakhuila singrip, Sipao ngakhamrip.

Athungli hāngkahai sāribingchi shaksāriplaga mahon suirengreng eina mahonvālaga kathinaobingwui Wonyai Thing (refer Wonyai) shunkahai chili amahonsangda pheichak āsāsangda pheichakla asāsanga. Longra laala avaosanga.  Kala ‘leishiyei pāngusei’ dala avaosanga.   Hithāda kathinao mayarnaobingli mahonsang vāserhailaga ichā tāngwui kayāng khamashāshāli pheichak sālaga mahon ngapaopamma.

Khamatethang longra sari shaksāserlaga longra laa sāmamānda shimkachivali khuishoka sāvai.  Shimlākwui preinaobingna mingaireoreo miki kachi otchi ngarānping hailaga haisāya.  Hanshirai, theishirai, theishui, pai, meiteipai, shomri, thei, kasāthei, maji, harra, har, fanao, hoknao kathāthā sangmiya.  Ngalāngda shaikapai otbingchiya shurkazata naoshinaobingli mishaizata.  Otbingchi longshimli khunglaga morsongvaiya.  Khuishoka kasāli longra laa hi sāzatta.

O! Falingnao, homshai shangnao

Homshaisa, homungulo,

O! masāpa, hori hora.

O! Aphungwo,

Wo! Longnaola

O! Thingkān shai,

Wo! Longnaola

O! Hisisa

Wo! Hithāsa

 

Kala kayāng khamashā akhali longra laawui pheison sāda ngalonglaga yāruibingli lumlao sāchitheiya.

Kaphangāthang Yāronnaobing china chikum shim sāki kachibingwui shim-thingrāh thāthā ngavamiya.  Chili long thing khangava hoya.  Chithang ngayā kompei haowa.

 

Contributed by Tsivyo Kasom

Source:  Ringphatyan written by S Kanrei

 

Comments

  1. My brother suggested I might like this web site. He used to be totally right. This publish actually made my day. You cann’t imagine simply how much time I had spent for this info! Thanks!

  2. Thankyou for this wondrous post, I am glad I discovered this website on yahoo.

Leave a Reply

Your email address will not be published.