Mi Kathi Kachifa

Mi Kathi Kachifa

Tangkhul Awo-Ayi thot eina thuilaga zat kharā custom athishurda mi-akha thihai khareoda shimkhur theisā kala khongnainaona khalumra eina ravai kharikrik mihaowa. Ravaimi kupkhareoda bed mathālak eina kachon kadharva hammida masan mihailaga kāchipethaida kachon kadhardhar khamathāthā fasangmida chipethaiya.  Mayarnao akha pāsi ngakham (pāsili sifa makāmana) mihai kala kazei bed-kuili shunmihaiya kala shanao akha kongsāng ngakhumtā mihaiya.

Chiwui thili kathewui pamkhong chili kachonnao kadhar hammihailaga khongkhai lungmida awui khongpheili zāt sangmi kala har thaithatlaga harsā-hoksā nilala khaisangmida pamkhongtung chili lungmihailaga bedkui ngalemli haimihaowa.  Zamkhorla mangkaphā-phāva khorāmli mathunmilaga lungmihaiya. shimkhur kala khongnainao rākhangahān saikora khong khairāserda han khai-sā kala zamkhor mangkaphā thairāserlaga kathiwui khongpheili kateokha rāpar sangmihai kala zamkhorla awui khorāmli kateo-teo rākharek sangmilaga rālungmiser phalunga. Thikhong khalunghi kathi mashām ranglakha eina tangda lunga.  Tangkhulwui khangachā eina mi kathili thangkha phonghaida (look glossary) khamang honpam phalunga. Yārkhok-lākhok kathili yarnao ngasotnao khamang rāhon kapamli IeishiIāk eina yarralaa kala khanolaa rāsāpamda khamang rāhonpama.

Tangkhul wungram ngaleili Vareshi dharma rinhi marārang lakha mi kathihi shim-kayāngli chifasera, chieina tāng kachivawui kayāngli chikhur 4/5 (mati-phanga) leiserphalunga.  Chiwuivāng eina mi kathi thārān theisā shimkhurwui chikhur kacham chi luikhuilaga chikazana.  Chikhur khalui thārān kachama kathi bed chi khuishoklaga horhaowa.  Kha araguiva kachon kadhar akhali kazip khuilaga akuira chi khor eina pheolaga zamshei eina pheotāluida kachon kadhar chi eina romhailaga chizan kadharawui bet ngalemli haimilui hailaga chizanhaowa.  Khangam-kharei kala kashāng khareinao thihaida hurdhar chuira chiakha silui akha khani taithatlaga chuiya.  Chikhur china lungzi lunghār pam ngasāsahaida chuisak haiakha khani thangla kachui ngavāya.

Yarkhok yāronnao/gaharnao thihaikha favā akha eina mangrang phalunga. Pareinaosan kathili mamangrangmana.  Favā chi kazeiram khavā shongfali yikra sammida thānvā khavai sāthatsang khamina. Mangrangsā/fasā chi shimzarnaona zamsham 2/3 phāsanglaga kashaina.  Chithā-ilala khongnainao tāngnao khamang kahonli rākapambing sā mashailala zam chi rātongti khuida rāmangserra. Mangkharang sā chi kathiwui shimli mashaimana, awui shimluikatwui shimli shaiya.  Yarkhok kathili yorkhokbingna kachon haora, luirim hikathā ungrafasangser pharunga, mafasangmara kachi masāpaimana.  Mayarngalā, yārkhok-lākhok kathili yarnaona kachon khamathā akha chāramit leishāt kachon akha kasang khangachāna.  Tangkhulwui shitkasang athishurda kazeiramwui Akhavā Awunga chi Koktona chihaoda kathe china kazeiram vāshung khareoda ali(koktoli) chonrān akha rānmi phalunga.  Chonrān marānmi akha Koktona rekharekhaowa chiya, chikathā rekakharek mirin chi mangaphangkhavai katheli rafa kasang kachon akha machut khavaida amarei teomeikha serkhāktāhailaga, ‘No hi koktowui khoda” hanglaga fasangmi haiya.

Tangkhulwui custom athishurda kathipao khami (kathi kashi) hi shimshangwui mina sāphalunga.  Chānpao khangatei khami thāda shingnai mi khangateili mahāng chiphunpaimana.  Hili kathi kashi hoi.  Mataimeithuida yorlābingli kathi makashi masapailākmana.  Kharam katāvali favākahai yorlābinglila thākmeikap kaje apong eina kathi shilaga kachifa ungzangkhavai kathi kashi khangachāna.

Kathi chifathang chi katheli sākachiphunsāda pareinaosanliva har, fa kala hok einala sāchiphuna, kha khangam-kharei kashāng-kharei yārkhok kathile silui 1/2 kala lāngmeidala taithatlaga sāchiphunna. Sakathat sā chiwui aphei apāng akho yorkhok shaikharānbingli ngayarmihaowa.  Yorlā khangateibingli sakasābingna mikharān chi yanglaga sāmiya kala yorlābing nala pokhuiya.

Chifathang ngathorthāk sharvana harshunthing khanangthing vāshātkhui haowa kala gahui shātkhuilaga sākhailaga shimamei eina kasui mashakhuilaga harshunthingli khalapshānhailaga khangarān sāhaowa. Kazing khaying eina kathe chi kathipetli khuiphunglaga chikhur pamli raphong haowa.  Parei naosanlia rāchapngachālaga chifahaowa.  Ngalānao lākhokle kathibedli phongkahai chi ngasotnao kala yaronaona leishat laa rāsāsanglaga chifaya.  Yaronao eina gaharnaoliya kathibed eina kathingun chi chikhurpam marālang lakha yarkhok khanina raikaphāsāda rai sāri shaksālaga chāngvei kazei singlaga pheichak chakta ngaro sāpama kala chikhur pamli rākhangaraibingna ngot-ngot mahonlaga honpamsāya. Kathingun ngavarada chikhurpamli raphongkahai eina mi akhana vaomida, ‘wo-wo-ho!’ kachi eina yāruina, ‘oh-wo-hui’ da hoyam sangmiya.  Chiwui thili yarnao, tāngnao kala ngasotnaobingna leishāt laa chapchāt laa kala yarra laa sāsangda chap ngachāsangkahai eina Sharvana kahangmida, “Oh …! Ngachang hairakho, pāngusa, leishishi haorakho, suikashi masing ngaroklāk asa.  Kathi kaho hi zimik katunthāda tunhaoranu, hi eina tātang tārang haosa”, kachieina yāruina hoyam sangluiya.  Chiwui thili angun chi chikhurlungli khāngsanghailaga ali sangmi khangayi ot sangmiserhaowa kala mina rākachiphun machila sangmiser haida kupkahai eina lungkhor lungsem mathālak eina khorphin haowa.  Chiwui thili chikhur kajahaoa.  Chikhur kajakup kahai eina Sharvana harshunthing shunmihaowa kala Ana kasui masha sanghai kasā chi chikhur kagajabing china harshunthing kuimareida shunsangmihaowa.  Otsak hi kathewui mangla chi mahanshokluikhavai kasāna.

Kharamli vāthisangkahai mi chi Tangkhulwui khangachā zatkhanā athishurda angun phungung phalunga. Ram katāvali vāthisanghaida angun makhungrarkha akuira khuiung kala chila masāpai kha kuisam kateokha sheikhuilaga khuiung phalunga.  Angun khuiunglala, akuira khuiung lala kala kuisam māng khuiunglala shongfa khaungthārān atung khamarān kachida “Oh hishong unglo, khangateishong mathuipai makho”, da vaoung shuma. Kongkān kachida awui mangla makānthei paishinada kazaira rānkāmi shuma, chili awui manglā ngareikāvairanu kachina.  Shim ungkashung eina khangachā kathi kachizan takam eina chizanmida phumchifa sāmi kharānchi sāmiser papama.  Katheili sākachiphun shakei har, fa, hok kala sei taithat sangkhami lāngmeida lan sangkhami katonga chili phumchifa hoya.  Phumchifa sāmi khangayi masāmiakha kathena ningyāng maungmada maringkaphā eina kazei ungkasing ngavāya chihaoda Tangkhulna kathewuivang saklāk eina sāmida atheng-areng peida sākhamina.

 a) PHUMCHIFA: Thikahaiya michili sachikaphun/sāsangkhami, chiya mi chipā chi ringda leilakha awui okthot atamli mirin kharing kharak athishurda lāngmeida shimkhurna leishāt sāda thithang sangkhami chili Phumchifa hoi.  Kathe mipai chi khalāk khangam kala kashāng kharei mi sahaoda kazei ramlila maishida mavā okthuikhavai silui 2/3 (khani kathum) taithatsangkhami kala thishāmli silui 4/5 (mati phangā) eina kashām.  Naopaisho kathai kachām mi thikahai thārān fa akha maninglala sei akha eina sāchikaphun hikathā otsak awui aming eina kathi atamli sāthatsang khami chili phumchifa kahona. Aruihon ithumwui thotli kathi service khuikāda mi chipā chili azak rāyang khuida rāngashāmkhavai khanaowa atam chiwui programmeli phumchifa serviceda kasā kala leishāt tui rāhang kachiphuna mibingna awui phumchifada matuisang kachi hi phumchifawui kakhalat theingayi ngasakta leiya.  Atung para binglila phumchifawui apong mention sāmihaira kaje thikahaiya mili phumchifa mathālāk eina sāmida kathena kazeiramli khāvā thārān siluiva kahām-hāmva 3/4 (kathum mati) homkhavā thārān kazeiramwui mina ali khayā kashimāng maningla kazeiramwui akhavā Koktonala khayāshida shongfa chikāyada awo-ayina shitsangtita. Chiwuivang eina shimkhurna sākashap sālaga leishātsāda keiring sāthat khami zaikora chili phumchifa kahona.  Kachi-chi chithei khamina.  Chifakhavai khanao leishāt service khuikhami chili phum chifa kaho maningmana.

 

Glossary:

Phonghaida:  Azak rāyangkhuikhavai kahai

 

Written by Ako Shaiza

From A Journal, The Legacy

 

Read also

The Tangkhul Naga Funeral at Ukhrul Village

Comments

  1. Loving the information on this site, you have done outstanding job on the articles.

Leave a Reply

Your email address will not be published.