Miwun Mirāt (Hunphun Luiyaiwoshi)

Hunphun Luiyai Shimraywoshi Shang Thotchān

Chapter One:  Avā Sāmsok Eina Khaung

Atam akhali Myanmar Kabo Valleyli Avā Sāmsok hokasa apam chili Tang/Tangkhul Naga yurla okthuisai. Athum hila Mongolian stockwui akai akhana.  Atam akhali Mongolianwui shipaibingna Kabo Valley Avā Sāmsokli okthui kasā Naga yurbing chili rai rātālaga sākazam miserhaoda mapampaithuwa.  Chiwui thili Avā Samsokli khalei Naga yurbing hi 1287 A.D. maikhali Naga Awo ayibing ashang ashang (group) eina ramsom phazazatlaga kaseiungmamānda Century kala zingkum kayākha apam kachili pam mamei khala kachi horzakta mahāngrarmana.  Kha khararnaobingna chānsā kharā athishurda naolak eina Naga yurbing hi ashang ashang eina khamathā khamashā tampāk leiwuk chili ungzanglaga ungsoma.  Kala khamathā tampāk leiwuk chili Naga yurbing hi thot kayākha or zingkum kayākha pamkhalakachi hila horzakkahai mahang/matheirarmana.  Kha Tangkhul Nagawui ramsom kaphāwui khararchānliva hi khangui maningmana.  Kachiva shongchon ramsomwui theory khangatei maleimana.  Athumwui kathāna chiwui aming Hunphunda hoi.  Kala ali yāruina phungshok haokida masohot eina Awo Phungshok dala hoi.  Āvakharar Phungshoka da hoi.

Chapter Two:  Tampāk Leiwuk eina Kaphung kakā

Khamashā tampāk lewukli Hao Naga miyurbing hi okthuida leisai kha athumna hithāda okthuira mamānlaga leiwuk sāthuihaoda tarana kala hāchāngna mapam paithuda Awo Phungshokna, ‘Inao ngarā saikora, ithumna pamdakhalei leiwuk hi tarana kala hāchāngna mapamrarthura kaphung kahaosa’ da Hao Naga miyurbing saikorali thānphunglaga kaphung kākhavai sāhaowa.  Kha Awo Phungshokna kathāna ashangvabingchi leiwukwui atung zimikshoshong (ajawui Imphal-Ukhrul) road shong kashangbingna nānā yortā māmānlaga shanghaowa, kha nanā chi ngalāngda shonhaoda khanaobingna chi yanglaga shonkahai chi theida athumbing chi apam kasāngkha thuihairarada phaninglaga, ‘Ithum mangaphanrarmara’ da kachungkhana ngaranunglaga, Atungshong (Imphal-Dimapur) road kashangbingwui kathānana khāmkhuihāng kapaklaga shanghai kasā eina khāmkhuihāng charshi eina nganaozao kathei eina athumli ngaphan shaprada Mao, Maram, Makhen kala Nagaland shong shanghaowa.  Hao Naga miyurbing khangatei kachungkhala chishong shurshanghaowa. Chithādasāda aja Naga miyur kachungkhana atungshong pamda khaleina kachi hi khararnaobingna chān sākharāna.

Kha Awo Phungshokna kathān awui mibing saikora zatmāmānlaga kaphung kachuiva akhali shokpheisamlaga ‘Inao ngarā ungngakānserluda kaphung kachui chili shokngavaowa, chieina kaphung chili shokngavaohaoda Shokvao da hohaowa.  Kala athumna chili ngashānkhayang eina hamchamri kahai kaphung (Hunphun) theiungda chili chanunga; athumna zat-mamānlaga Awo Phungshokli kaphung kakālila phungkāyada chansā rai.  Kala awui maramli hithāda hānga, kaphung kakāli.

Ngakungana 0 ili phungshok,

Ngakangana 0 ili pāngthāng

Makānana safa singsing,

O malā mangmida rai phazatmiya.

Kala athumna ngachāng apam chili zātrom ungngapheizai.  Ithumna aruihon Lungshang chihui kaho apam china.  Kala hamchamrikahai khamashā kaphung chili chanungda Makhoātung, Mavalung kala Meizailung apam chili ungsoma/ungpama.  Apam hili awui ming khuida ‘Hunphun’ da hohaowa. Khararnaona chānsākharā athishurda athumna ungkazang atam chi 15th century A.D. maikhali ungkazangnada shānkhuia/hānga.

Athumna apam hili ungpamlaga ramsom kadhar phākhuikhavai Awo Phungshokli ngasokhaung khararnao saikorali mingzaimida, ‘Nathum ramsom kadhar vāphākhuiserulu’ da kasohaoua kala nathumna vākasom pam chili mi mayāmeiranu kala kashak kazā ngaphangzāmeiranuda meizaikhuida somilaga chizatserhaowa.  Hunphun Awo Phungshok hi saikorawui Khayaiwona.  Ana somikhavai pam hili Makhoātung Mavalung kala Meizailung hoi.  Atam chithārān athumli chizat mamānda leilakha athumna khangashān eina Longpi Khanangshan kaho shongshan chili mei liphungda shārlaga kazat kathei eina Awo Phungshokna ngahanna, ‘Khanangshanli mei singlaga kazat chi khipakhala?’  Athumna khipā mapeimakhalada ngathinglaga Kuira kaho mayara chi mapeisāthuda athumna chiya Kuranada hānghaowa.  Awo Phungshokna khonshida, ‘Nana vākasom apam kha chili shimlāk thumrā (30) malānglākranuda kasoi.  Thot chiwui eina thuilaga aja rāshungda āna pānda khalei chi Kuirei kaho kha china.

Makhoatungli Kapam

Awo Phungshokna phungphā khare Makhoatungli mi tārākha okthuida leilakha makaphā yuikashi/yangkashibingna thang ngayākha rakhongli siyungri/kathiri rāsangmihaida rakhongwui tara khamangbing chi mikachungkha thihaowa.  Kha rakhong tara matākathuka kasārashi preigahar chithang tara matāla leijawui tara manghaoda mathithuwa.  Anina thuikhayang thārān mi kachungkha thihaira kasāthei.  Chieina anina thikahaibing chiwui chā(necklace) saikora kazipkhuiserlaga/rutkhuiserlaga zakashi chā saikora shimkhurli rotkashop serlaga horserhaoiji.  Kha khamathā chābing kazipkhuida ham akhali sanglaga chāwuitungli hangkha matunghailaga chuiphumhaowaji.  Kala atungli lunggui kahak eina shingkham hailaga phumhaoiji.  Kala lunggui chili kameo ngasohaoda haksangmamānda ara kahaka sāthuihaoiji.  Zingkum atam kathārān khala kachi āra matheirarmana.  Kha naoda okathui ishawo ngarāna chā chi khuikhavai achuiyaji.  Kala chuilaga hangkha matungkahai chi samphanghaira kachi thārān siphan-zingrot panglāk eina ngasha unghaoda machuipaithuwa kachi khararchān leiya.  Ngayāshong athumwui mangli harvā khuirālu chithākha mirada rāhānghaoiji.  Kha harvā kachichi mi kapona chihaida athum mavāchuiluila tangkahainada hānga.  Khararchān athi shurda chālung chi Makhoatung Meizailung ngalemchangli leiya. Aja eina tangda chalung chi theiserdaleiya.

Chapter Three: Makhoatung, Mavalung eina Somsai Somkatā

Okthui khare Awo Phungshok miwurlung eina unglaga Hunphun Makhoatung, Mavālung kala Meizailung apam chili ungsoma kala apam hi mashālāk kala haklāka.  Chieina apam hili Phungrei da hohaowa.  Apam hili athumna okthuirā mamānda mila chunghaowa.  Kha apam chi makuilāk siklākada hānga.  Apam chiwui kasik chi kayākha khala chiakha siknāhaoda harla mashakhuirarmana.  Chieina Awungana thānda rampheishong chiya Rangazāk kongshong/shongchanshong pamtā mamānda Somsai leih ngaphā kāntāda somtāhaowa.  Chiwuivang eina somsaisaida somkatāwuivang Somsai da kahona.  Hunphunwona lam phākhuida awui ramphat lui sāda Yaoyi chihui hi āna ngayaikhui kala āli ngasokhaunga anao mayarasāda Phungtunglenglila, ‘Inaoli nala lam ngayaikhuilu’, jihaoda khaiyur chihui hi awui lamyailui sāda ngayaikhuiya.  Atam chithārān Hunphun Somsaili Tangkhul katongawui leih ngapha sāsai.  Atarn akhali matakkhak kahai otshot kashokwuivang leih khangapha chi ngasāmhaowa.  Khararnaobingna kahāng athishurda kumkha leih khangapha zimiksholi Kachui Chamsa hoda mi akha leih khangapha rāzanga.  Leih ngapha mahungda leilakha ali rachanglākhaoda Lungchap kongrāli tara zangmanglaga ngayeira tara manghaoda chiwui eina ngayeishokhaowa.

Khangayei sāhaoda har khayor chi ngapaikhuilaga kharing eina shaihaowa.  Chieina leih khangapha chi ngathānhaowa.  Kala chikum khangathān eina thuida leih khangapha chi masāluilākla ngathānchanghaowa.  Atam/zingkum kasāngkhawui thili Tangkhul leih khangapha ngathānchang kahai maphāphalungmarada Paoyi Hanshammali Hunphunwona hānglaga, Paoyi leiyama lamli naramma ngalang chingkhuilaga phanit leih khangapha chi sāluishithaoluda mayāmihaoda Paoyina ngalang chingkhuilaga phanit chi sāluishita.  Chithāda sāda aja rāshungda Paoyi langchinda sāda leiya.  Khararchān hi awo ayi ngarā khararnaobingna chānsā kharā athishurda kapikhamina.

Chapter Four: Haopung Rasa Kaphā

Haopung hoda naokhok yārkhok akha okthuisai.  Atam chithārān āhi rasa phārānhaowa.  Longpi Kachuiwui TaIIa shangli ngalā Lāshiyo akha okthuisai.  Awui aming Misingphi Tallanao hoi.  Haopung eina Mingsingphi rasakhavai ngalā hāngsan phāsangda mayāngarokhaoda chaoleng hommi haowa.  Chiwui thili ngalā hāngsan khanina zimiksho akha langshi (programme) sāmi hailaga Rangazakkongli ngayanhaira.  Haopungli Mingsingphiwui avāvana āram Longpili thānshoklaga ngayanngasaka.  Ngayā phāshak phāzākupkahai eina avāvana, ‘Inao Mingsingphi, na Haopungli mavārakhala’, da khangahan eina Mingsingphina Haopungli, malung kachāng vāthaowa, ning maleitei, ningrei khāsut eina ngahankai, ‘Mavāmara’.  Marama kadhur kuisa sākahaiwui vangna;

Aniwui laapho hithāda leisai:

Shākhangaili aja O! haoraya,

Kathur kuisa sāra iningla kazāya.

O! maning kazālo

Marāngaikha isei chaoleng hom shirātlu.

Isei ālangra Hunphun Somsaili

Khaireinao thāwa

Khaireinao makharanluimara

Malung kachānga Haopung nali chankharāna.  Chieina Mingsingphishi avāvana akhama kathā Haopungli Rangazak kongli zangngarok ngasaklaga raphei samreo zangsāmihaowa.  Kala awui shimli thānshoklaga ngayā phāshak phazā kupkahai eina Mingsingphili avāna, ‘Inao ajawui mayara hill maleishikhala’ da ngahāna. Chieina ngalāvana ngahānkai, ‘Achonthang kharapā chile ajawuipāli vāthaka’ chihaowa.  Mikyan tāzangda, chānsam chānsā tācham eina ungshunguda ngalā shakzā haoda Haopungwui shimli rāpamhaira.

Haopung Hunphunwo Phungshokli ngasoda tampāk leiwuk eina khaung sāhaoda thing shunsanglaga leirang eina zātham hangzāsai.  Mingsingphina agahara Haopungli hānga, ‘leirang hi maphāthura ini Rangazāk kongli tāsa marān ngalung tāphungkhuisa kala chieina meithalung sāda ham hangzāsa’.  Chieina ani Rangazāk kongli meithalung tāphungkhuilaga chieina ham hangzāda maron-mateklākthuda ringphālak eina hangzāhaowa.  Kha ngayā kharā eina ngamiting tangmangtinghaowa.  Chieina Minsgsingphina agaharali hangluishita, ‘ini iram Longpili reojeothei tāphungkhuisada’, chieina anina Longpili tālaga ngayā shārkhavai matang reojeothei tāphungkhuiya.  Anina chithāda katā eina awovana anili hānga, ‘Naniwui lui Khaiyur lamyailui chili māthaluithāda kahakva shangchang haolu ina reojeothei phungshanglaga shangthukmira’.  Chieina anina tākam eina shangsā kahaiwui thili awovana reojeothei chi shangyaosangmiserkahai eina naoda matangthing tārākha kharhaowa.  Chieina iram Hunphun ngaleili kala apam khangateili matangthing ngayaohaowa/leihaowa.  Chiwuivang eina Haopung eina Mingsingphiwui naoli Lungsa hoi kala Lungsawui naoli Tangwung da hohaowa.  Saikora hi yanglaga matailākkahai ot kala otsakbing chiva; (1) Raphei samreo (2) Meithalung kala (3) Matangthing ngayao khangasak hi aniwui thot eina haokaphokna kachi hi khararthotwui thotrinchān chi hāngkhamarona tuina.

Chapter Five:  Hunphunwo Lamsom Khangachei

Hunphunwona Somsaili atam zingkum kasāngkha pamlaga masi makathar leihaoda chiwuieina lam chi chihohailaga rida athumna pamkasā Makhoatung/Phungrei chili shangpam luishithaowa.  Atam kasāngkha pampamlaga, khararthotna chānsākharā athishurda awungali khangaso Maung Thuingaleng sā khalengli malung chānglāk kahaiya mi sasai.  Ana sâ lengzat māmānlaga ngalei katum khamathā apam theihaoda Awungali unghānga.  Kala Awungana ngalei katum khamathā apam chi āyanglaga mathāhaoda phālākhairada āna mingzailaga unghaowa. Kala āna ngayā chi ungsuihailaga kapithārān awui mangli, ralu ini pamrumsada rāmahāmihaoda mang phālāk hairada awui nao kala ayao saikorali thānkhuiserlaga ramsom kadharli vasomhaosada rida athumna pam kasā Makhoatung/Mavalung/Meizailung/Phungrei chi chiho hailaga arui arui Hunphunwona pamda khalei apam hili shangpam kahaina.

Chapter Six: Shim Kachitun

Hunphunwoli atam/zingkum kasāngkha ngasopamkahaiwui thiii Hunphunwoli, ‘Ava ili shim chitunmi haolu’ da kapo thārān Hunphunwona, ‘Inaoli chitunmira’ da mayāmihaoda siluivā akha hommida, ‘Inaoli na ngayai eina ngayaipamlu’ da somilaga shim chitunmiya.  Chieina awo Phungtunglengwui nao mayara Haopungwui nao ngarabingna arui-arui Shimraywona pamda khalei apam Luirarphung hili shangpama ishi Luiyaiwoshiwui tāngli aming ngatateida khalei chi hithāda yaikhami eina kharāna.  Aming kathum khalei chiwui kakhalat hithāda leiya.

  1. Silui akha yaishokmi; na ngayai eina ngayailuda somi. Chieina Luiyainaoda hoi.
  2. Silui yaishokmida, na ngayai eina ngayailuda Ngayainao dala hoi.
  3. Siluiva siluivā yaimida Vayainao dala hoi. Hithāda atam kasāngkha pākngaroklaga pānhaoda tuila khangatei khalei papama. Chānsam sāda shimsak tuila hithāda shichina chiya,

Luiyainaona Chikhai shungkhavai leiham chili Chikhon hoi.  Azing ashakna kazo hoi.  Luiyainaona shimlungwui pākra alungthungli shunkahai chili zingrāthan hoi.  Azing ashakna raphet hoi.  Theishiraiwui amingla khangatei leikapa: Luiyainaona mazāthei hoi kala āzing ashakna karathei hoi.  Luiyainaona tāpunthei hoi kala atung āshakna mazāthei hoi. Luiyainaona theisathei hoi kala atung ashakna khaorāthei hoi.  Luiyainaona kava hoi kala azing ashakna chonchak hoi.

Ishi Luiyaiwoshina theikhakhuiva atam kasāngda ngateida pānkahaiwuivāng tuila khangatei khalei kahaina.  Kala chimāng maningla kha Luiyaiwoshili ‘Phungchamva’ shida shichinkahai leiya. Marama, atam chithārān kha akha eina ākha rai sāshon sāthai kachi atam sāthuihaoda raitui ngazeksada pao khamili Luiyainaoli pao milu chiakha shimphung kacham (Somsai)li pamsāhaoda phungchamvashili pao hithāda milu kachieina zatsāya.  Chiwuivāng eina raiwui tui shurda ishi Luiyainaoli phungchamvashida kaho leikasāna.  Tākam eina aruihonla hithāda shichin papama chiya, ramsom kadhar phākakhui Phungyoshongwui minala shimchamvāk tāga/shokgada khararnaowa hithāda shichinpapama.  Kala shimchamli pamsāhaoda amingla Phungchamda kahola leiya.  Ishi Hunphonwoli ngasokhaung anao mayarana.

Chapter Seven:  Wungva, Mawun Kala Sāshai

Hunphunwo lampuk lampakvawui khayaiwona Luiyaiwoshili Mawun pangshap hithāda ngayarmiya.

  1. Longra
  2. Shonghao
  3. Shongva Luiyan (Shongva kai)

Hunphun wungram kharikva ngashan sāshaili ishi Luiyaiwo akho yāpāng shaiya.  Ishi Luiyainao chinao kathum lei, ngalā mangakhotmana, zungphun akhana, sāshai, khorman akhana, ngashan akhana. Athumbing chiya:

  1. Luiyai Shimraywo
  2. Luiyai Shaizawo
  3. Luiyai Shimrahwo

Hunphunwoli Lampuk Lampakvana khayaiwo hoi.  Kala Meiteiwonala chingsang rakbada hopapama.  Hunphunwona kharikva hi chingri eina okthuipai khavai, shiyan chikan kala shārpahor hi awui azingchangli wungva mati (4) haiya. Hibing hina Awungali ngarenda khamakhoka otsin singa. Wungvabing chiya:

  1. Luiyaiwo
  2. Shimzingwo
  3. Kashungwo
  4. Kasomwo

Wungva āvavali ngatateida Mawun ngayarmisera.

  1. Luiyaiwoli Mawun kathum (3) miya chiya;
    1. Longra
    2. Shonghao
    3. Shongvakai/Shongva Luiyan
  2. Shimzingwoli Vārā Luiyan/Vārākai
  3. Kashungwoli Kazei Kharik
  4. Kasomwoli Harrayan

Hithāda ngayarmi kala khawui sāshaili Luiyaiwo eina Shimzingwona apāng akho shaiya.  Kala Kashungwo eina Kasomwona aphei akho shaiya.  Hunphunwona Luiyaiwoli Mawun mi kahaiwui thili Luiyaiwona Somsai, Rangazākkong tāshungda awui luiyam leihāsāda yangkhavai Hunphunwona pangshap mi kahai leiha apamna.

 

Longra

Hunphun kharikva mā hātkuphaoda Hunphunwona khaikap vaoshokmithang sei homungda seivabingli unghorsangmiya, akhama kathā yārui tāng-tāng rakhong khonsera/sāmathāsera.  Kala chithang ngazin mayarnao saikora luili vāpisera kala shinaobing chum zanga/nama.  Kala akhanama kathā zang ngawora. Chumpha sharthān kupthang talla khongphokra kala Luiyaiwona Hunphunwoli Longra hi kachishat (8th) thang Longthing phāra kala kachiko thang shakzangrada kharikvali chishātmi haoluda kahāng eina Hunphunwona kharikvali chishātmiya.  Kala Longshān hi ishina shāna.  Longshān hi arui khanuithotna kashān thāda aja, akhama, khanaothuma da mashānmana kha Longshān hi chishatthang, shinithang, tharukthang, phangāthang, matithang, kathumthang, khanithang, akhamāda shānunga.  Hili Longra Langchin/ Longshānda hoya.

Longra hi mati thang shaka, kakhanethang eina kakathum thang hiya Longnao saikorana hara lokpai kala harla likhuipai, khali chi theilala ngashan athi shurda Hanga mahokāpaimana.  Longshim kachivana athumna lok kakhui hara acho chi khara eina luilaga apeng khani kathum sāngmeimei kāngyui katāla ngahana.  Kha kakathum thang chiya Longnao saikora khaipāk chili sifa nonglaga/nongkhui kahai chi reoshān hailaga yarui shim kharak kala Hunphunli kapam saikorali phahon laihak-hak pasi sanglaga

shongfali khuishokulo sāda mahonzata.  Kala samkaphang otyur kala pheisā chi Longnaona phāshai phāshakvaiya.  Kala Longra makazangli laa eina zakshilāk phora.  Chiya;

‘Longra makazangnao, nawui shimli zāt tengra manga’ da laa eina phora kala shuikhangarui laa saikora Longra laali zangsera.  Hi zingkumwui khanaowa phanitla sāthuihaoda hoksāla mormit sāyangsada kāshunglāk eina ngalanga.  Hi Longrawui ngashanna.

Shonghao

Shonghao hi Hunphunwona ishi Luiyaiwoli khayar Mawunna.  Hunphun kharikva luisao luisom kupser kahai eina Shonghao hi Magha kachang (June)li lui kuphaiakha kashong haowa; Marang (July) kāhaiakha mahaopaimana.  Kashong kahao pāyan shārpahor hithāda zata; Hunphun kharikva Mangkhap Phanit atamli luirām/luiyam kachida hargui shunthang, phaphayāthang shong haoshar sāya.  Hunphun Mangkhap phanitli kharikva leih ngaphaya.  Okthui kharebing sā, raina chingri eina maokthui paithuda Hunphun kharikva kashok kazang khaung khavā sapai khavai veikhur mati lei;

  1. Hunphunwoshi veikhur — Veiva khaning
  2. Kasomwoshi veikhur — Veiva khaning
  3. Kashungwoshi veikhur — Veiva khaning
  4. Luiyaiwoshi veikhur — Veiva khaning

Chithāda, Shonghao shar sāthang veikhur mati hill Luiyai yāron raikan 4/5 ripta pamvāhaoa.  Kachikathā khamina shar sākhaida rāshokakha ali akhangei (siki) khuiya.  Akhangei chi Luiyaiwowui shimli phāshai phāmanga.  Shonghao shar hi rihai kathukli sai, Shonghao shar hi ngalā makakhuibing māngna sāya.  Ngalā khuikahaibing mazangpaimana.  Shonghao hi hithāda zata; Rihai Kathukli pāyanphungli kazipserlaga yāronnaobing chi kachichāwui kapā yangsera.  Rimeithuida kachichāwui Lungsen yangra.  Chiwui thili kachichāwui Leikashivali (shākhangaivali) yangra.  Athumwui ngachaili maja kapā phāmeikap kachipā china haora.  Kashong haohai kikachi apam changli shakshothing akha shunhaora, shakshothing chili kapā yangkahai kapā āthop chi kazipkhuilaga khalapshānhaora, chili ngalengda nānā ākhala shunhaora chieina Kashong haokikachipā chili sharvana suihaimilaga shakshothing chi yorchop tāhaora.  Kala nānā chi khayuipat tāhaora.  Kashong kahaowa yaronnaopā chi chithang kashak kazā makhuimana (mangasheimana).  Yaronnaopā chi pha shiakha saokhayaoa, phā phāakha shum shirin aka ākai khikha mazokkharokmana.  Pha kashi kaphâ chithāda chānsā rai.

Shonghao pāyanwui laapho Qr. Late Mopha Shimrahna 19021i hithāda lenghaiya.  Kala laapho hi awui nao mayara Qr. Changkhui Shimrahwui eina samkaphangna.

O! Shonghao kapā yanga,

Tāmilāli yangsang Aphā lungchān kashivo

Lungchān kashi yāron pāsakla paleiya

Pāsak pālei kānrei kachāng shok ngamāsa

O! shokngamāsa nanaoli Kanreiya holo

O! Kanreiya shavanida luili lengvāya

O! luili lengvâ veikopnā reongayina.

Shongva kai/Shongva Luiyan

Shongvakai/Luiyan kachi otsin hi sakmeikapta yangkasā shiyan chikān akhana.  Atam chithārān ml shaokathat/akui kharang phama kashao, khali kasa kala ngalā katuk hikathāthā shiyan chikān shar hi saklāk eina yangmisai.  Luiyaiwona khayang leihā apam hi Kalhang Nongshar tāshungda yanga.  Luiyai Shimraywona Longva sāda shiyan chikān shār hi khawung tharuk (6)na mayonkharuma Longna kala khabing chiya;

  1. Hunphun Luiyaiwo, 2. Shirui, 3.  Lunghar, 4.  Longpi Kachui, 5.  Phungcham kala 6.  Halang Aze hibing hina.

Hithāda sāda kachi kathā mina phama shaolaga theihaiakha shaothathaipai, kha theihaida yāmhaida kharomlaga marāngaphanrang lakha awui leihāli vāzang haikha mavāshaothat paimana, hikathā shongrei hiIi Longvana thānda Iongnaona saklāk eina chān ngazekta keiring thatsangpai.  kala shongrān tāmiya.  Kala khali kasa ngalā katuklila saklāk eina shongrān parmiya.  Hithāda kateoteo shiyan chikānla hithada yangsai.  Chiya, lui khavānao akhana shongfapheili vār vārsāda ashāma ungkhuinaorada thingnā reoshi haiakha khipākhana makhuipaimana kala khui kathāla kazang apam chili kaho eina samsa sāmi haiakha mina thei kahainada masāzamana.  Kala matangli pākra sārada masuihai/mazukhai kala machanhaiakha khipākha meirā maphokpaimana.  Hithāda khararnaobingna apong ngatateida shiyan chikān shar hi phālak eina mayonda Luiyaiwona Longva sāda kashi kaphā saikora hi yangmiya.

Shongva Luiyan Lapho:

O! Khakrei nurja khakla maungmana

O! maungmana Nashi tharaya shivama

O! Nashi tharayali, O! chishongtunli tangshan nara mayinga

Na mayingda ngashan savai rala?

O! kharei lava tangarok Phungcham Yangrei ram

O! Phungcham Yangrei ram khan khaya ngapai, Ishi Repshopthei.

O! ishi Repshopthei Maiteiya ngalei Ali khayui zangura

O! zangurava, Ava zingmei yang, (2 times)

O! Maitei ngalei ngapeishokhaili

Ali ning makatunyo

O! ning makatunyo Khomri shathingkha

Ali Yingkong thingkhani

O! Yingkong thingkhani Hunphun Somsaili

Ali shang chiphan haili.

O! shang chiphanhai Kongsang Amingva mathiya

O! mathimarai Noashang ming kazingkarava.

 

Chapter Eight: Shimsā Lui Khavāwui Ngashan Khararthotna Zatkasā

Achālakha ishawo ishayi ngarāwui thotli shimsā lui khavāli saklāk eina mayonsai.  Luiyaiwoshi vathei kathum lei chiya; (i) Haopung Luiyaiwo vathei, (ii) Shimreishang L. Shimmy vathei (iii) Luingam L. Shimray vathei hibinana.  Shangwui alungli kachi kathāna shimsā luivāakha khorpong, lungron heingaroka kala ngaron ngaroka.  Kala shimsāda siluivā siluiva shaiakha vathei khararabing china paiphut, kathemra khamangli athumna makhokshon makhokthai phalunga.  Kala shim kasāpāwui silui akahung akha khuishokmi ashi kathumna ngakaishaiya.  Chiya Amei khararana akhum khani sālaga akha shaiya kala akhum akha chi vathei kharara khanina ngakaishaiya.  Thotna khangachei athishurda ngalā shakkazā hina hakmeida khuihaoda kachi kathāna sei khani kathum thatsnglala akahung akha khuishok mira. Hithāda kashi kaphā, ringkashi ringkaphā rālala kala kashong meilong rālala athumna makhokching phalunga kachi hi khararthot eina thuilaga aja rāshungda shimsā luikhavāwui shar hi mayonching/zatchinga.

 

Chapter Nine:  Luiyai Shimray Vathei Amei Khararashi

Vathei khare

  1. Phungtungleng L. Shimray
  2. Haopung L. Shimray
  3. Lungsa L. Shimray
  4. Tangwung L. Shimray
  5. Wungnaochui L. Shimray
  6. Reorang L. Shimray
  7. Kharim L. Shimray
  8. Zaikhayang L. Shimray
  9. Yaime L. Shimray
  10. Namshai L. Shimray
  11. Yangmaso L. Shimray
  12. Haopung L. Shimray
  13. Tangwung L. Shimray

Note: Mitunbing hi thot thingthing thuihaoda naothot horzakkahai matheirarthuda khari khanaola onhaisapai.  Kha khararchān nganālaga ajawui mithotbingna theivā kharar chi chithei khamina.

Vathei Kakhane

  1. Sasangmi L. Shimray
  2. Mashangrei L. Shimray
  3. Mathuka L. Shimray
  4. Sasangmi L. Shimray
  5. Wungchāng L. Shimray
  6. Shangyur L. Shimray
  7. Naomazum L. Shimray
  8. Chāngpop L. Shimray
  9. Vareichin L. Shimray
  10. Tuizuk L. Shimray
  11. Phungjam L. Chimray
  12. Shimreishang L. Shimray

Vathei Kakathuma

  1. Shangam L. Shimray
  2. Ashoma L. Shimray
  3. Shimthar L. Shimray
  4. Raizar L. Shimray
  5. Ngazek L. Shimray
  6. Yangla L. Shimray
  7. Meiteiching L. Shimray
  8. Maninglum L. Shimray
  9. Razim L. Shimray
  10. Luingam L. Shimray

Chapter Ten: Luiyaiwowui Naotunbing

Haopung Luiyai Shimraywowui eina pākthui khamaron mitunbing atam kasāngkha thuihaoda kala pākngarokhaoda, athumbing kaikhana zimiksho shong, zimiktunshong, ātungshon kala azingshong hithāda pākyānghailaga kachichāwui kachā āpamli vāpamserkahaina.  Arui eina tangda maphākhuirang kachi khabing khaleifaya.  Zimikshoshong Maka eina Langriwui ngachaili Mavalung khada pamkasa chila kachili vāpamhaokhalada matheirarthura kala atungshongla, zimiktunshonglila apam kahaibing chili ngathing chingdalei.  Kha phākhuikahaibing chiya azingli chitheimili;

  1. Phadang – Kongyui
  2. Tuinem – W. Siluiwung
  3. Pushing (Ongshim) – Lemwo
  4. Chahong Phungjam – Shangkho
  5. Chahong Phungdhar – Mahaphang
  6. Thawai – Lemmi
  7. Riha – R.N. Judah
  8. Sinakeithei – R.N. Shimthar

Luiyaiwona thot thotli kala atam atamwui āthishurda nao ngarābingli zakmai theikhangaroksāda ringkaphāwui phāzātla homida hok, sei taithatlaga chinaoni vānao ngarāwui leikashi khamashit khongkhaila hithāda khuimichinga.  Kala naongarābing chinala atam atam kala thotli avākharar Luiyaiwoli silui hommi chinga.  Hithāda vānao ngarāwui leikashi chi phongshok ngarok chinga.  Kha kharaoshong kapambing china chonrān eina michinga.  Hitāda sāda chinaongarā leishi ngaroklāk eina okthuisa.

Chapter Eleven: Luiyaiwoshi Kasomli Shangkhamahon Laapho

Thotchānna kahāng athishurda Luiyainao tānghi achālakhava phanit phanao khamahon khangapao kala pheichak kathāthāli tangtangwui alungli phāmeikapta ngashan khamayonli aming zatlākkahai tang akhana.  Atam ākhali Kasom kayāngli Luiyai yāron pheichak shangkasāwui laapho hithāda leiya.

O! kazing kumda along ngaso saya,

Ivayaiya yāron kasom Kayāngli pheison shangsāya,

Pheison shangsāya khiwui naonilo ili ngathing

Ili ngathinga O! ali yaikhayangnaona,

Yaikhayang naona nava nava ningreiva

O! chepi kongsang ripmilo, ripmisida ila phaning haira,

Ali kameoa āngalang marei rāhekthuihaowa,

Rahekthuihao iram khava ningngaimāya,

Ningaimāya O! luirar phung kayāng tantak ngahapa

 

Chapter Twelve: Thei Khangayi Kateokha

Kameo kala Shangkhali Khangama (Sasangmi L. Shimra)

  1. Sasangmi kaho mipā hi kapinga kala kapanga mi akhana. Awui otsak hi matakkhakhaiya.  Chiya awui azarva chi Kasomli fa  Kala ani prei-gaharni ngashanglaga machā ngarokthuda agaharana apreivali chinhailaga lāphit khikha mamimara chihaowa.  Maram chi bichār sāsālaga chithāakha na kazei ngarak khuiluda khana tuitak tāmihaowa.  Chieina ngararphungli khana leirin khānmihaowa.  Amākali Sasangmina leirin chili nganinglaga awui zeipa sikuirikha eina kaphar eina amakāwui chāngvei ngaruiwutlaga apangthei arakui zangkaimihaowa.  Ngalāngda pisanghaowa.  Kha chichang chili mathithuda raisā mashaipaithuwa.  Atāng Kasomli ngazonshokhaowa kala shimli shokthihaowa.  Raisā mashai ngasak ngaithuda shimli thingna reoshihailaga sharada machaplākla thumpamhaowa.  Atam chichang chili Raphei mā-machi yor rārāsai, chieina rapheipā chili Kasomli ayorlu, shim akhali sharada thingna reoshi haisara, khikha mangahānlākla laksāda vākālu chili kathi phonghaisāra.  Chieina mi kathipāshi mathumhaipaithuda phonghaowa.  Chieina Luiyainaona raisā shaimihaowa.
  2. Sasangmi kaping kapangawui azarva akha Phalungli fa Atam khaleilaga awui nao kapharā atam ungshunguda āpā Sasangmili shokluda kaho eina āpā chi Phalungli shoka.  Kala kashok eina āshi shimkhurna hānga, Iram ramshidaleiya kazing khaying eina khipāshikha khāmong mashola shungserhaoluda hangvana vaohaowa.  Sasangmina khikha mashitsanglākmana. Ana khāmong mashonghailākla sholaga pama.  Kachachangda khachili shangkha rāshokrārāsai.  Chi kathei eina Sasangmina shangkha khanā khani yonkhuilaga Phalung makhangatun lam thākta rāserluda shokvaowa, kha ngachee haida khipākha mashoklenglākthuwa.  Chieina Sasangmina shangkha khanā khanini singtit khuilaga thuluda kasāngkha kahaivāhaowa.  Kapinga Sasangmina shangkhalila yuishapada awui thotchānna hānga.
  • Kameoli Kahāng/kakaso

Sasangmi awui lui shum hoda akha leisai kala luipamchang chili lunggui kahakva khuprarda apam chili sayurbingla rāngasāmsera.  Kala lunggui chili awui rāmla sāya.  Ana lui ot saukida awui zātrom hanrom chi hailaga ot zangsai kala thaiuda shokzaukida kashok thārān kameona awui zātrom hanromli hotlā parsangmi serhairasai.  Chieina ana mazāla khisāda hotlâ parsangmikahai khalada thākta samathā mihaoluda hānglaga ot zangsaluihaowa.  Ana kashikha zangsālaga shokzaukida kashok thārān samathā miserhairasāda zapaihaowa.  Ot sāsālaga kazing khaying eina unguki kachi thārān, ‘Nathumna ili ngareo nganaopaila?’ da lungguitung kameo shimtung chili kālaga kāpaisangmi hailaga unghaowa.  Kameona ali khikha masārarmana kha awui kahāng nganāya kachi chānsā kharāna.

  1. Hunphun Mangkhap phanit atamli kachichāwui luili harkui shunthang lui rām kayāngli rashak shirei āpha phayāsera. Kha Sasangmi awui lui Shum shongchan marātungli tānganinglaga, ‘O! lwui lui kameo, I luili matāshungrar marakho, shangkhuilu’ da awui rashak shirei kala hanphutsā chi shongtunli hortāmihailaga unghaowa.  Chieina kameo khararnaobing china hānga, ‘Inao ngarā shangkhuilu, Sasangmiwuiya sāphel mahorlāka ava pāngtonglāka shangkhuilu’ da kasoda kameola awui kahāng nganai.
  2. Kazing kumuda mahā atam rāuda Sasangmi awui lui Shumli fa akha shimentai. Kala ana fachi shimenlaga luiphei mareida vaolaga, ‘O! I lui kameo philava ajakuma heiwun hi kachon kathum miphalungrakho, nashina mamiakha fa hila nashili mami marakhoda luiphei kuimareida vaoshang vaotāzatlaga naoshinao ākhana theida āna akui khanukaji.  Chieina Sasangmi phālākhairada fa chi rāmli ungpha phayāhaowa.  Lui chi kachon kathum luina kha awui kahāng nganāda kachon khani lāngsangmida kachon phangā kazipkhuiya chieina kameo awui thākum marun ngakānrangada awui thotchānli samphanga.
  3. Sartāng Kameo

Sasangmi sartāngli awui lui zanga.  Sartāng kameo hi sāshilākkahai kameonada ngazeka; thang ngayākha ana awui rāmli mā honpida leilakha kameona ngareo nganaoda nana ithumli mathāda mapha phāyāmanada awui rāmwui eina ngazonphung laga athumwui shimli ngazonung haoiji.  Chieina Sasangmina nathumna ili ngareo nganaorala thākta iwui rāmli khuiunghaolu chi maningkha ina mamayālāk marada kahāng eina kameobing china awui kahāng nganāda awui rāmli khuiungmi papamhaoiji.  Sartāng kameo hi kapang sashilāk kahai kameona. Atam akhali Wongshim Thongyang khanganaowa eina Faring Khumtāk khanganaowa mi khani chi Hunphun Somsaili leih khangapha rāzang thathui-iji; leih khangapha chi mi akhana haphā khayor chi ngapaihaida kharar ngarokhaowa.  Chieina Wongshim Thongyang khanganao eina Faring Khumtāk khanganaowa khani chi rangsa ngaroklaga zimiksho tharukthang eina rai sangaroksada langshi sāhaowa.  Wongshim Thongyang akhava china awui kameoli ungphaphayāda tharukthangli Faring Khumtāk kameoli rai ātārada unghanghaowa.  Faring Khumtāk khanganaowa akhavā chi malaihaoda tuingashit athishurda Wongshim Thongyang kameo kazing ngashum kangkang siphan zingrot ngashida rārāsai, Faring Khumtāk akhavāpā china thāklāk eina zangpha phayāda, ‘Ina malai kahaina thāklu rārāli’ da hānglaga huina haoda Khumtāk kameoli ngapasir mihailaga latkhaung thārān Sartāng kameona raishā shatta Wongshim Thongyang kameo tārākha shaothatmi haowada thotchānna kahāng Thongyangkui chi aruila Lungdang luili leili, chi Sartāng kameo sakashiwui thotchānna.

  • Atam akhali Sasangmi awui lui Fayāngli mā honpida leilakha awui lui kameona rāngareo nganaoda ali kameo shim akhawui eina akhali phungung phungvāda ngareo nganaolala kameobing awui kahāng nganāya, thang zimiksholi awui luipheili nasha kat kahao / leisāhaoda ana thang ngazinkha thing pāngrāng eina ngaphitta tarākha thihaowaji. Chieina awui lui kameo china, ‘Nana khiwuivang eina ithumwui har chiyākha sāthatmi kahaikhala’ da rāhanga.  Chieina Sasangmina mashitsanglākla nashakat thingtung chili akakā eina kameona ali sheitākhavai panglāk eina rāngakhuna, kha Sasangmina machiholākla thingphāng chili poktitlaga nathumna ili sākhangai sālida thingtung chiwui eina ana kameobing chili paitārorhaowa.  Chieina kameobing chi maringphālākthuda chithāakha ali rai sāhaosada athum ngazek ngaroka.  Chieina athumna Sasangmili hānga, ‘Nana ithumli mashitsanglākla ithumwui harla shaothat miserhaira kala ithumli pairor haira’ chieina rai sāhaorada rākahang eina Sasangmina malung vātlak haoda sāsa mayarnao ngarokida zimiksho katharukthang sāsada langshi sāhaowa. Kha Sasangmi zimiksho chi malaihaoda Kalhāngli machi tāphunghaowa.  Kala athum mi kathum machi khuiphunglaka latkhaungli Makhoātung Shan kashang eina zimiksho ungshunghaoda siphan zingrot ngashida sur khaning kachup khaung eina Sasangmili theih tā kapha  Chieina Sasangmina ali khangaso khani chili hānga, nani zatulu ina Fayāng kameoli rai sāsada langsahai kasā zimiksho chi malai kahainada anili chizathaowa.  Kala ana siphan zingrot chili ngararda awui kazei eina khayit kathanakha zingkānlā phara pharā pheopheo khayit tai, chieina kameohing china vaoda hānga, ‘Ithum mayuirar mara’ da khavao eina naoshinao akhana, ‘Ina akuili zahaira’ da hanga. Sasangmili theih kahak hakva tākazamrorda theihna tākthathowa.  Sasangmi kaping, kapang kameo kala shangkhali khangama shangwui alungli matakkhakkahai thotchān akha sāda kateokha hi kachitheina.

 

Published by Hunphun Luiyai Shimraywo

Comments

  1. […] Miwun Mirāt (Hunphun Luiyaiwoshi) […]

  2. I discovered your blog site on google and check a few of your early posts. Continue to keep up the very good operate. I just additional up your RSS feed to my MSN News Reader. Seeking forward to reading more from you later on!…

Leave a Reply

Your email address will not be published.