Ngarikapung eina Longpi Maringthei

 

“Khāmkhui hām kapak ngatheisa kachihiya Amachut sākhavai; hili samphangsada khāmkhuithing kakapak, Kachili leili khalada apam kachithei, hi iwui ngaleinada amachut sākahaibing hili kahāngna.  Avā sāmsok eina khaung thārān khanaobingli shur-ung khavai khāmkhui hām kapak unga”

 

Chithārān chili, Paoyi Langchin phanit phaolāk eina leisai.  Kha kachungkha rashā rāphangda rāsera.  Longpi Maringthei hoda rai pinglāk eina akha leisai. Ala Langchin phanit chili rai.  Ngarikapung china Maringtheiwui kazei chi yangmerhaowa (see glossary).

Ngarikapung, ‘Nawui kazeiji ina lohaoka’

Maringthei, ‘Mayor mara’

Lohaogada hānglui hānglui chihaowa.

Maringthei, ‘Na ningchāng phalungakha ngarak khuilu’.  Ina nali kazei hi pharrāka laga nana yonkhuishapakha na khuihaolu.  Kha ina nali pharthathaiakha mithit kashong maleimara.

Ngarikapungna mayāhaowa.  Chi eina māzun khani wui khamayā khuilaga, Langchinli kharā katongali hānghaowa. (Māzun: Mah kashok, kala kharam ung-vā akha shimzun sākhavai mapu)

Yāruina, ‘Ngalei ringmira (line khān mira)’.  Lam tharuk tammi haowa.  Ani nganing thathuihaowa.  Kalikha Maringtheina pharlaga mangarak khuirarakha mithit kashong maleimarakhoda mayāngaroka.

Maringthei china ngaro sai (phar khavai chaka) laga phar-machituwa.  Kha Ngarikapungva mangathalākla nganingichi.  Phar kaji eina Ngarikapung china zeiko (see glossary) yonsa khuihaowa.

Ngarikapung, ‘Paoyi yāron kala leida khalei saikora, ara kazei hi iwui kho’.  Maringthei hi maringphālāk thuwa.

Maringthei, ‘Khām khui hāng kapak ngatheisa’  (rai sāsa kachinei)

Mayāthathui haowa.  Longpi Maringtheina, anao mayarali hophunglaga Ngari kapungwui luili vāuwa.  Ani vānaoni luili vākhayang eina Ngarikapung luili ot sāsai.  Kazing khaying eina Ngarikapung luili shimānhaowa.  Phālaga matheithuwa.

Ngarikapung ratak pamli tankui kasholaga (luiwui tankui akhur changphutlaga) piya.  Ngayā sāhaoda kapili ngar u-iji.  Ani vānaoni khangarkhon shāuda, marlāk eina phai.  Kha akhonji kajiwui eina khala matheithuda, rashong eina ratak katonga phin yanga.  Ratakwui akhon shimān kahai eina khangarkhon shāuda Ngarikapungli phākhuihaowa.

Vānaoni, ‘Kazei masingla shoklu’

Ngarikapung shokrāsai.  Laga tukhuilaga pāng hatlaga khalapmi haowa.

Longpi Maringthei, ‘Rai ngaranghaira(chungmei samphang khavai)’ da kharing eina khunga. (Ngarangra chikha kharing eina khung phalunga.  Khangarang hi Kameoli phakaphayāna, kala chungmeida samphang khavai, yui khavai)

Aram ungrada zatzatlaga maungshungrarmada, apam akhali mei sālaga pihaowa.  Ani vānaoni pivāhaowa.  Ngarikapung china awui pāng khalap kahaiji meili ronshat khuilaga kharākhuihaowa.  Kazei khanam vālaga aniwui kazei akha khuilaga anao mayarali lungsei thathaowa.

Maringthei, ‘Rai ngaranghaisa kachina kha nana rikiji inao rihaira’ da Ngarikapungli lungthat haowa.

Khalei laga Ngarikapungwui naoji yāronnao kashunghaowa.

Ngarikapungwui nao, ‘Rākharā Paoyi Langchinli vāra’ da vāya.   Maringtheila rārāsai.  Naochina Maringtheili ngathingvai, kala awui māzun ngathing khuiya.

Nao, ‘Awo I longpi shangra, kha naramwui shongfa matheithuwa, ngaso shangsa ili holu’

Mayāda Awo china, ‘Zatusada hoi’

zat kachi eina, Awo Maringthei china, ‘Ira na rilu’

Nao, ‘Ai! Awo shongfa matheimana narilu’ da Awo maringtheili ri ngasaka.

Zatzat laga, apam kachā akhali lungsei that haowa.

Maringthei, ‘Ah! Nana rikiji I rihaira’

 

Glossary:

  1. Khāmkhui hām kapak ngatheisa: Amachut sākhavai or hili samphangsada khāmkhuithing kakapak; Kachili leili khalada apam kachithei;   Hi iwui ngaleinada amachut sākahai.  Avā sāmsok eina khaung thārān khanaobingli shurung khavai khāmkhui hām kapak unga.
  2. Māzun: Mah kashok, kala kharam ung-vā akha shimzun sākhavai shimkhur, mah
  3. Ngalei kharing: Line Khānkhami
  4. Ngaro kasā: Kazei pharkhavai kachak, khangarong
  5. Rai Khangarang: Khangarang kachi hi mashaiphāphā kachi, masāphāphā kachili kahāngna.  Rai khangaran kachi hiya mamachon makānla, raiwui khangachā eina kasā kala chungmeida samphangkhavai Kameoli phakaphayāna.  Ngarangra chikha kharing eina khung phalunga
  6. Ratak: Luiwui ngarā akha eina khangatei azingwui ngarā akhali tara chihotā khavai
  7. Yangmer kahai: Ninchāngnā kahai, kahaonā kahai
  8. Zeiko: Kazei kateovākpā

Written by : Tsivyo Kasom

Narrated by : Zingthan Zingkhai, 2010

Comments

  1. You need to participate in a contest for one of the best blogs on the web. I will recommend this site!

  2. As a Newbie, I am constantly browsing online for articles that can benefit me. Thank you

Leave a Reply

Your email address will not be published.