Phungcham Lengthui (II)

Ngalānao sālaga fakathui

Lengthui sāmathā khariklaga ngalānao akha onkhuilaga kharam ngayitthuwa.  Zarpānimāng ok-kathui shimkhur akhali shimzun asai.  Yāronapā china Lengthuili leishihaoda ini rasa sāhaosada Lengthuili kahāng eina Lengthuina mayāda ani ngasopiuwa.  Yārona china ngasopikida kasā chithārān, ‘I aruihon khamakhao rādalei, mangasopaimara jihaowa’.

Akhama kathā ngathor chi Lengthuina agaharali, “Nazara ini iwui kasing thongthang ungkhuiga” da hānglaga ani muinaoni Lengthui ram unguwa.  Zatzatlaga Phungcham ungshung nanai, Lengthuina, ‘Amui, hili kashikha ngasāmkhuisa, I ngashuingaihaira’  da ot haida phungda kharar zanghaowa.  Zanglaga shāngsheihaira kajieina, ‘Amui hili khiwon khala?  khamathā, reolala machatngaikiji, thāklu’  da kaho eina Auiva chi awon chi zangreokida yongzanguwa.  Kazang ngashida shangkha thāda rimkasā Lengthuina vamsakhuilaga chili morei sāmihaowa.  Chili lāngda amuivawui kashan kachon raikhuiserphungda aram chakphik unghaowa.  Lengthuiwui amuiva chi wuk khanangzan sifarem khayāli thingnā reoshiphungda shim latunguwa.

Shimli unglaga apāli, ‘Na hi mi kachangali, napreiva chi mayarnao maningla shinaolamā?’

‘Ili chipatlaga kashan kachonla raikhuiserlaga aram yāmunghaira’,  Azara

Chi shālaga apā chi ning mathilākthuwa.

Akhama kathā kazeising kala rai sāri sākhuilaga Phungcham kaji kathā mi khalada phākhuikhavai yārona pāchi zatphokuwa.  Phungcham harshāng vākashok chithārān Lengthui tālong tungli kaborham sheipamsai.

Yāronapā china Lenthuili, ‘Naram yāronnao akhana ngalānao onkhuilaga iramli rāfaya, ana izarali morei sāmihaiphungda naram yām-ung haowa.  Na awui shim mathei khala?’

Lengthuina, ‘Nana kahāng tui chi mangshongwui tuikā kachangshongwui tui, Kachangkhat eina kahāngkā ngashan sāda kahāng khala?’

‘Hi phungchamli makashit tuina’, Lengthui

‘Nana kahāng hi chāngvei phungsa, kazei singsa kajilā?’  Lengthui.

Hi hāngphunglaga shimli yongunghaowa.  Chithākahaieina yāronapā chi harshāng yongzanglaga aram yāmunghaowa.

Written by Tangkhul Literature Society

From A Journal, The Legacy

Please follow and like us:
error0

Leave a Reply