Phungchamwui Marikhong

Phungchamwui Marikhong

 

Khararchān

Thot akhali Sihai Philāva shanglāk eina okthuisai.  Kala philāva chili Phungchamwona khuiya.  Atam ungkashung eina ānivana ārihāvali chumsinsā shailaga akhavaiva sāngasaka.  Hi Chumpha Phanitli sāya.  Akhavaiva sākhangasak hi shimwui otsin (responsibility) khamina.  ‘Nana shimwui akhavā sālu’ kachina.  Sāshai hiwuivāng Sihai Philāva china, ava-āvāli chan-ungda sei ungkapo thāran āvāvana, Phungcham kharei chirikkhawui awungali khuivāki kachi sāhaoda kāshunglāk eina sāmikhavai sāya.  Chithādasāda āvāva china sei āsā mathāmeikapkachi mati phangā kapangkhuiluda hānga.  Kha āvava chili kasatmikahai leihaisā haoda ana anaongalāva chili kaomeithui kachi seinao chi kapangkhuiloda ngathumda hānghaira sāhaowa kala philāvana āvawui tui khuida kaomeikap kachia seinao chi khuirada nganingtithaowa.  Avāvana mathākhamei chi khuikhavai hāngshonlala mamayālākthuwa.

Naongalāvana, ‘Avā, āsā khamathā seiya mashimenung rarmara kala iliva naithat kahaila shokhaora’ da hānglaga kaomeithui kachi seinao chi kapangkhuihaowa.

Chithāda sāda Philāva china seinao chi shimenphunglaga zatuki kachieina āvavana awui khanākhurli ngathumda hithāda hāngsanga, ‘Na Phungcham ungshung khaleoda seinao hi mi khipākhana makathei apamli sāthathaolu kala awui apaiphon chili raivāt kachon eina romphinlaga ngathumda yanglu’.

Philāva china āvawui tui chi nganākhui kazakzaklaga zathaowa kala āgahara ram ungshung khaleoda seinao chi mi makhalei pamli vāsāthatlaga paiphon chi raivāt kachon eina romkhuilaga khayang eina marikhongnao akha zangsāhaowa. Kala marikhong naochi kachon chieina romkhuilaga thumtithaowa kala sāchi chumsinsā sāda mihaowa.  Aja rāshungda Phungchamwo shina maningla mi khipākhali marikhong chi machitheimana.

 

Marikhongwui Maram

Marikhong hi machu hilākka kachi maleila ngacheiung ngacheivā sāya kala tengkotnao rikhana.  Azakla tengkot thāpapamma. Awui ālungli ākhān shini khānsanga.  Akhān shini china Phungcham shang shiniwui āmachutna.  Akhong chili kachikathā makatheiya tui kapikā haidalei.  Marikhong hi Phungcham Philāvana phāritit haidalei.  Mi khipākhali kachitheila machitheimana.

Marikhong hi yangkhavai kum kachida Phungchamwona hok avava shaiya.  Sā chi khangachā shikachin hamli maningla ngateihangkahai hamli hanga kala machi kasātheila masanglākla hanga.  Sā chi āwunga māngna ngaritta kala āna mashai khararchi naoshinao kateonaobingli mishai haowa.  Athumnala mashai kharar chi horhaowa.  Khararnao katei bingna mashaipaimana.

Marikhong hieina Phungchamwui macha(i) yangkhavai sai.  Kala hi aramwui Luitā Phanit (Luira) atamli yanga.  Luitā phanitwui sā thithang ngayā sailungphup, Phungcham philāvana marikhong chi phutlaga yanga.  Marikhong hina zingkum shi-nikā phā-ni khala kachi chitheimiya.  Kala chikum (ajakum) kachikathā thei machi pai machi ringkha phāra khala kachila marikhong hina chitheimiya.

Aja rāshungda marikhong hieina āramwui theimachi paimachiwui (heiun) āmachut sākhavai shichin chingdalei.  Marikhong china kachithei athishurda Phungcham Philāvana ruichumnaobingli marānmiya.

 

Video record of the narration:

 

Written by Shimri Raising, Dec 2017

 

Narrated by

Phungcham Philāva Alice Horam

Phungchamwo Wungnaongam Horam

Acting Headman Kazaching Horam

Yorngamla Horam

Shimreingam Pheiray

Yaokharek Hongchui

 

Comments

  1. You are a very clever individual!

  2. I have been absent for some time, but now I remember why I used to love this web site. Thanks, I will try and check back more often. How frequently you update your website?

Leave a Reply

Your email address will not be published.