Pong

Ayi Azhiimaru Marazamaah eina Awo Tarao Marazamaahwui Pong (chingjui)
Captured (mobile) by Yungrei Shaiza & Tsivyo Kasom
Edited by Yaomatai Chamroy

Pong hiya thing eina sākakhui khor rungkhavai (sangkhavai) akhongna. Masaithing kathā eina sāya, kala chiwuivāng Masai Pong dala hoya. Awui aphei mati kaya. Awui alung chi haongahā eina khonkhuiya. Kakhon thārān ngahā chi thingkathā akhali shiphailaga mā kharung thāda khonzanga. Atam zanglāk eina kala saklāk, manaklāk eina sākhuiya. Pongwui kachui kathup kathum (3-3.5 ft) kathā kāya kala kahakna mā lungkhavai shimkhur kahak riri kāya, ngavamlala maungshungmara. Pongwui azak azingli chitheili.  Chitheida khalei Pong hi Chingjaroiwui Ayi Azhiimaru Marazamaah eina Awo Tarao Marazamaahwui shimli haikasāna.

Pong hi mi kachungkhana maleirarmana. Aman saklākkahai Sinshivaina. Mi katongashina maleirarmada shimsā luivā akha khor kachungkha kheisangkhavai ngaron ngaroka. Pong ngaronra chilala ningkachang eina singnojohda kashai kathā singlaga vākhuiya – tātunglaga kaimi haipai shinada mavāngava khuimana.

Raphei shonga, Leija hodala singa. Leija hiya haknā haida shimlunglila makhāngzangla shimrāpli haimaya. Hila shimsā luivā, ngalung ngava kala marānsā akha hikathā hi singa. Kaje mi kachungkhana khor ngaronmangkhavai sāda Leija chili lungkhamangna. Kala mangura chikha phei pheokhariklaga ngalānaobingna zangchonlaga samshang-samtā sālaga khor manātkhuiya (mixing). Leijawui asān kathup (20 feet approximately) maka shikha kāya kala kachuina kathup khani tangkhai maningakha kathum kathā kaya.

Rimeikapta vaichumli khor kheisanga. Kala kheisanghailaga khor chi marao (khangatar thāda amarao kashok) haira chikha, khor chi rora. Khor chi rorhailaga (tara kasangli kharor hoya) pongli sanghaowa.  Tara sanghaoda hakkhamei akhongli kasangna.  Pongna Vaichumli hakmeiya, kachuila chuimeiya.

Kachikathāna tara mashila haiya kala chili vaitei hoya. Tara mashila haivā khangai haivā haikha Shingkan hoya. Shingkan hi Raphei kathāli singa.

Written by Tsivyo Kasom

Email: tsivyo@gmail.com (The writer is available if you have any question or concern)

 

Please follow and like us:
error0