Rakasa

Rakasa

Shanao eina mayarnao leishingarokta khangakum hili rakasa hoya.  Hiwui lungli ngakum kapai ngakum kashār leiya.  Apongbing chi kasha eina majuksa.

Muilā khangakum:  Kha khangatei, shang khangatei kala athei asā makakā mayar ngalā khangakum hili muilā khangakum hya.  Hikathā rakasa hi mayai.  Kala apāwui nao ngalāva, azarvawui nao mayarana ngakum paiya.  Hili muilā kachangkhat hoya, kala pam, anivapam da hoi.  Kha apāwui nao mayarana azarvawui nao ngalāvali mangakum pailākmana.  Khuishāra.

Chinaora Khangakum:  Shinao eina shinaowui phapeng khangakum chili chinaora khangakum hoi.  Hiwui lungli ngakumkapai mangakumkapai leiya.  Ngapāk thathara phapeng chiya ngakum shāra.  Kha mithot kathum mati thui kahaiabing chiya shinaowui phapengna chilala shang khangatei sāthui haiakha chia ngakumpai.  Chikathābingwui nao-pharāt phā papamma.  Kalā kasha maleimanada chānsai.

Vakhalat:  Anivashiwui naongalavana Awoshili ungkhalei, āra ngarābingna awoshi mayarnaoli ungkhalei chili vakhalat hoi.  Hi mangakum ngayimana.  Chithālala hi ngakum kashārwui apongli maleimana.  Vakhalat hiya lattā hoda nao manganaomana, nao mayarmanada khararthotna chānsai.

Shokhala:  Shangnao, chinaoni vānaoni kahal sāshai khangaruma mayar ngalā (yāron ngalā machimana) khangakum chili shokhala hoya.  Hiya ngakum kashāra apongna.  Hikathā pregaharni chili khana aramli mapam ngasakmana.  Kha anina ini mangakum ngaiga, inina sākashāra otsāhaira, yonhaira chiakha, hok akha, zam shamkhada khuimira.  Awungawui sharvana chi khuiphunglaga harshāng kānshoklaga kameoli āphaya.  Hok chi sāthatlaga mei eina maruila khai eina nilala kazei eina nilala hok chi ngalākser khailaga hithāda mingzaiya, ‘He kazing-ngalei kasā kala kazing-ngalei khumphalat mishap kaje Kasā Akhavā, hikathā sākashāra otsak hi mashok ngasak lakmialu.  Hi eina tātang tārang khamihaolu’ da hok alāk chi lākha chālāngshong horhai, lākha shirepshong horhailaga ana khuikaphung zam chila zampā eina kashuk thahailaga unghaowa.  Rakasawui apong saikorali shokhalā hina zakshimei thuiya.  Ramsāwui acham aramnada khuiya.  Ramsā hi avā khipakhala anao khipākhalada mathei thangmei mada ngarat phaphai.  Hikathā apong hi mibingna khamatuila mamatuingaimana kashāla mashāngaimana.

Zarpā Shokhalāwui Laa

Avayo,

I hong thailo;

Wo, wo!

O, arui I maung luiya;

Wo, wo!

Zarvā sham kasha;

Yi yo!

 

Contributed by : Tsivyo Kasom

Sources:  Ringphatyan, S Kanrei

Leave a Reply