Shimlui Khayarwui Ayin

Shimlui Khayarwui Ayin (Customary Law of Inheritance)

Introduction:  Shimlui khayarwui ayinli (customary law of inheritance) shimyar luiyar, wungpam kachikā, mingpho kakhui, shimshangwui khararpam kakhui, akhavaiva khangasā, pāngpum kasā kala Khayaiwo khangasābing hi kashi eina azingli kapili.  Shimlui khayar hili shimyar luiyar kasā kala wungpam, khararpam khami zanga kala ngaraichai.  Kala pamla shimluila samphang kharān masamphang kharān ayin akha eina zatta.

 

Shimyar Luiyar

Shimyar luiyar kasā hili Tangkhulwui ayin mathālāk eina leiya.  Khangachā eina shimlui mathāmeikap kaji, lui mathāmeikap kaji nao mayara khararali yar sāya kala agato ngarā, paishonaobingna teokhamei samphanga.

Kalikha chinaongarāwui alungli abā marā maleiakha, nganingkhui khavai nao mayarnao maleiakha athumwui ngachaili khararana khuira.  Kala khararawui nao mayarnao maleisāakha agato kakhanena khuira.  Kha shimkhur chili Kakhanela kala apaisho tāshungda nganingkhui khavai mayarnao maleilāk akha avāvawui ameiva shina khuira.  Avāvana kharara sāsāakha awui agatoshina khui chira.  Hithāda shimlui khangaron hi kharar eina maron maron agato ngarā tāshungda sāya.  Shimlui khuikhangayiya mi chili shimluigat hoya.  Kalikha nana paisho sādaleiakha kala atungli kachithei thāda nawui khanganai maleilākakha nashi shangwui khararana khuipai.  Shangkhangateili mavāpaimana.

Shimlui khayar hili pam kala shimlui kakhuimāng maningmana, kha otngarutla (responsibility) kakhuina.  Shimkhurli kakhanang kakazā rālala, ngalāshakazā leilala khararawui shaiphun hakmeithuiya.  Ava avā sārlei haoda nganukchok kahai thārān paishonaona luinao pāngkhumrikha chi eina kathāda nganaora, Khararawuili pamradala chiya.

Shanaoli khayar: Awo ayina yarkhamaron shimlui shanaoli mayarpaimana.  Kha kalikha pareigaharni china, ngakum kahaiwui thili, shimluinao mathuisang kahai leisāakha chiya naongalāvalila yar sāpaiya.  Awo ayi eina kharā lan maningthuda shangnaona khiwuivang yarkhala kachi maleimana.  Chitākam eina shanaona ngalālakha dham kazipsang haisāda dham chieina shimlui mathuisangakha chila naongalāvali yarpaiya kala yorzāpaiya. (Dhamwui maram chumphali pāmilu)

Shimlui khayor:  Kalikha shimkhurli kasak, kakhanang kakazā rāhaoda kala maram khangateiwuivang lapai shimlui yorka chiakha rimeikapta shimshangwui nganaimeikap kachibingli hāngrira.  Kala khanganai shimshangwui mina makhuirarmara chiakha shangwui alungli tākhameibingli hāngvāya.  Kalikha shangwui lunglila kala ayārwui minala shimlui chi khuikhangai leisāakha aman suitāmeilala shimshangli khami hi khangachāna.  Atam akhali Iwui naoli ana ungyorsang luipaiya kachiwui kachihān leiya.  Kha ayarli shokhaiakha mahanungluimana chihaoda shimshangwui alungli paimeida eina yorlala leikhangasakna.

 

Wungpam Kakhui

Atungli hāngkahai thāda wungpam kachikāla shimyar luiyar kasā thāda ngaraichā eina miya.

Ranuihai akha kaje, Avā ngazanhaira/okathuili maleithura kachi atamli, kalikha naomayara nganuināhaida awunga masāpaimara, maphungrarmara chikha shimshangwuilungli phungkhangayi akhana phungsāpaiya.  Kha khararchithārān naochina Awunga thuisāra.

 

Khararpam kala Mingpho Kakhui (Title):

Tangkhul kha kaikhaliya ajuishi, acheishida mangavāmana, Kha kaikhaliya ajuishi, acheishida leiya.  Ameishina khararashina, chiwui thili ajuishi zanga kala acheishina apaishoshina.  Tangkhulwui ayinli amei achon mangacheipaimana.  Kaje mingpho hina khararashina, apaishoshina kaji chitheiya.  Kha kalikhada, ameishi meiphung akhawui naopharāt thishum haolu; chithāakha ashiwui amei pam hi ajui shili mipaiya.  Khi kateikhata ajuishi naopharāt chungsāakha katongali mamipaimana kha ajuishiwui ngachaili khararashili miki Kachina.  Hithāda maron maron eina khararpam kākhuipaiya.  Maram khangatei eina masamphangmana.

Rakasawui alungli Achonshi ngalā eina Acheishi mayar rasa sā-akha gaharali achei hohaoda apareivalila achei machimana, kha aliya achon hoya.  Shanaowui mingpho mangacheimana.

 

Akhavaiva Khangasā

Ngalā akhali lāngda kakhui leikapa.  Kala ayin athishurda khuikhare pareiva hina akhavaiva ngasai kala naoda kharā shanaobingli Angashira hoya.  Kha mayarashi shimkhurna akhavaiva sāki kachipāli maning kachāng, maningakha akhon shokhaoda masāpaimada kakhung kathāthā shokapa.  Hithārān akhavaiva samphang kharāna shanao chili zamshamkha eina hangali raivao sanglaga pānghaipai.  Chithārān pareiva chi avāvashi (ashi) shang ungsāpapamhaowa.  Kalikha ani kashikha ngashanglaga nao leihaira sā-akha nao chiya mayarawui naoshon naothaiya.  Aniwui nao chi shanao pāshiwui shang mangasāmana kha avāvawui shangli zanga.  Kala ana samphang kharān shimyar luiyar mira.

Apong khangatei akha eina nao mayarana Ava Avāwui khamayā mazangla rida ngashāmhaira sāda naopharārilala kala shimli hounghaisālala Ava Avāna khangatei aniwui kapen akhali khuisangmiluilaga khanaopāli akhavaiva rāsākhangasakla lei.  Hithāda maram ngatateida eina khuikhareva shanao chili, raivao sanglaga ‘akhavaiva khuinaorada’ angashira sāngasakpaiya.

Awo Mishivāmwui Haolaa akha hithāda sāya (Paraphrased);

Akhavaiva sāsa chikha teonā hao, angashira sāsa chikha kahaknālui.  Nashiwui lui vākapai khongkha kharetmiluda sāya.

Hithāda makhuilui marada raivaosanghaiakha luinao khayar hi khangachāna.

Kalikhada shimkhur zanglaga mathālāk eina ngashitlaga rakasa sāsāakha, kapāng thārān Kachinapā china lāphit hiyākha eina phi ngaroksada ngalā khangashit atamli tuingashit sāyada S Kanreiwui Ringphatyanli kapihaidalei.  Hikathā kashokthārān ngashitkahai thāda ngateida sāra.

 

Pāngpum Kasā (Adoption)

Iwuili khaminao akha pamhaokada kharā, Iwui mi sāhaokada kharā hili pāngpum kasā hoya.  Ina nganao kakhuina.  Pāngpum kasā hi kazeishunlaga tuingashit khuilaga sai;

‘Na, ara iwui nao sāki kachinada, Iwui shimnao hili pamlu, akānglui hi vāzālu’.

‘He āra na mathuiluipai makho’,

Ishi masāluimara chikha kazei hi nakhumkorli parla, sāna misā sāra, zamna mishi sāra’ da tuingashit saklāk eina sāya.

Kachikathā mili pāngpum sākhala?

Ava thihailaga naoshinao sei rāhom khamipā chili, lumashan haida ‘Aita! Irali Inao sāka’ da khuiya.   Mi lungthat haida kashong meirong kaphung kachāng nganingmi khavai maleimada rākapothārān pāngpum sāya.  Pāngpum kasāwui maram atungli makahāng kachungkha leisāra.

Kachikathāliya khamāng kaze, yurjāt ngateihangkahai rākazang leikapa.  Kala khana kasham haida mina horkahai thārānla vākhavai maleimada rākazangla leiya.  Kaikhava pāngpum maleila khazan sāda Hunphun (example) rāsā kahai leikapa.  Athuma shangnaola mangavāmana, laga zat khangaili zatlaga naoda shangzan vāzang khuinaowa.

 

Khayaiwo Khangasā

Awunga khani kathum kala chili chungmeida, railong ngarumlaga pamrumakha, siraopai seichuipai ungrut khare, unglaga meikharikap kaji, kala malā kapenglaga ramphat ungphākhuilaga rāmayārithui kachi Awunga chili Khayaiwo hoya.  Naoda kharā Awunga khangateibing chili Khayaiwo mahomana.  Ramshai ngateingarok, kala shar kasā ngateingaroklala sāshai ngarum akha akui chi Khayaiwona shaiya, yāphei hi kakhane kharāpāli miya, wuiphei hi kakathuma Awungali miya chithāda maron maron eina yāpāng kala wuipāng sāshaili samphanga.

 

Read also

Chumpha

Shakazā

Tuingaren

 

Glossary

Dham: Ngalā sāda leilakha kazipkhui kahai Shungphun, mā (rice).  Achālakha dham hi shanaobingwui savings kathāna

Raivao Kasang:  Raivao kasang hi nāshāt shākhangasakna (broadcast/publicize).  Yāruili shākhangasakna.  Hi hangali sanga

Ranui kahai:  Avā ngazanhaira/okathuili maleithura, kachi tharan, kalikha naomayara nganuinā haida awunga masāpai mara, chikha khangatei Phungkhangayi akhana phungsāya

Shimlui Khayar: Shimlui Khayar kachi hili Shimla luila kala khararpamla zangsera

Shimyar Luiyar:  Shimyar Luiyar kachili shimphung, ahang, lui khayar zanga

Railong Khangarum:  Awunga khani kathum, kala lāngda pān khangarum, otsaikora sākhangarum

 

Written by Tsivyo Kasom

Writer’s Email: tsivyo@gmail.com (The writer is available, if you have any question or concern)

Sources: Ringphatyan and Narration of V Zingkhai, Narration of Dr Ng Luithui, Narration of Rev Somi Kasomwoshi

Comments

  1. There are extra points that contradict this. Can I?

  2. Dead written written content, Really enjoyed reading.

Leave a Reply

Your email address will not be published.