Shimsak

Shimsak

Awo ayiwui thotli shim kasā hi miwui aming zatkhavaila sāya.  Langsa ngaroklaga shim hakkhamei khangahanla ngavāya.  Kha hi kashāng khareinaobingna kasāna.  Hao shimsakli khangachā eina kā(room) kathum leiya.  Khareli Yāngkhup (or Yāmkhup) hoi, hili hok, sei (buffalo) haikhavai sai kala mā lungkhavaila sai; kakhaneli pikhavai kala hangzā khavai sāya; kala kakathumali pong kathāthā lungkhavai (to store), ot phāri khavai sāya hili Ponglun chiya, kaikhana hili Pongrumdala hoya.

Shim kahak-kateowui pongli Hao shimsakli ayur kathum leiya;

  1. Awungawui shim, hili Philā Wungnao shimdala hoya
  2. Achon Amei shim
  3. Mahaishim

Azingli shim kathumwui maram kashi eina kapili;

  1. Awungawui shimli samkok lunghao kala khachān ngarekshim sāthuda haklāk eina semma.  Hili harpom khani ngakhaiya, yungla shinina kala angashākla leishi leishai peida sāsanga.  Seikui raim, kachon ruksanglaga ngashi mafala lengcheng famithaiya.
  2. Achon ameiwui shimli khami chungda makazip thuda shim teomeida sai.  Kha leishi leishaiya Philā Wungnaoshim eina ngaraichai.  Kala achuk ākhānla khikha khangatei maleimana.  Hanshai rashak shireila ngaraichai.  Silui khani kumkei hok akha sanga.  Dharkat kāra.  Kala awovana shim rākhayangla ngaraichai.
  3. Mahaishim kasāli sei akha hok akha shaiya.  Lengcheng mapeilala ngashila faya.  Dharkatla kai.  Awovali aravana luirim kadharva lomiya.  Mahaishimli achuk akhān, lengchengkui kālala leishi leishai mapeimana.  Aphor ngaraichālala machu kazika chupra.

Leishi Leishai:  Azingli mikahaiya Machu (āpān) hili leishi leishai hoya;

  1. Leishi Kahunga
  2. Leishi kachara
  3. Yaingang
  4. Kazik (mahaira)

Khangarān kasā:

Haowui ngashanli shimsā luivāakha sārip vāripta ngachon ngaroka.  Thing ngava lala ngavarip, kala khangatatei sālala sārip chiya.  Chieina, shimsaura chikha siluiva akha taithat laga samarim avavarip, khali yaohaowa.  Shimkhurli nao mayar tharuk akha amarim tharukmiya. Nao akhamang akha amarim akha miya.  Ngalānaoli machāksangmana.  Hili Shimsaksā hoya.  Shimsaksā hi rida khayaona.  Kala shim kasāli akha shai chiya.  Longra(phanit)li Long Thing Khangava hoda phanit chiwui kaphangāthang yāronnaobingna chikum shim sāki kachibingwui shim-thingrā kathāthā ngava miyada S Kanreina kapiya.  Longrawui maram mathāmeida pāmilu.

Shim chi makup rang lakha eina tangda shimlungli shinao makā paimana jiya. Shinao kāakha shim ngayen haowada shitsangasai.  Dharkat kā akha shinao zangpaihaowa.  Ngalānao rākāle chikha kasaikha yanga.   Kala ngalāva china shimlungli zanglaga shaohāhā eina shebā zangsāakha phāhaira chiya.  Khararnaowui shitkasangli phārachikha ngalāva chi ningmalat laga manaphalunghao(laugh out) iji.

 

Glossary:

Awovana shim khayang:  Shim dharkat kakāli Awovana shim khayang hi sokhami rākhamina.  Seimuk eina hok eina yangsa chilala Awovawui ningkhānna.  Kala chithang shaikhavai sāda hoklala seimuklala ana khuirāmiya.  Shim kasā luikhavā, ngalā shakkazāli awova makazang maleimana.  Mahoakha shimkhur kashok jathaowada mahokheimana.

 

Read also

Humpumwui Shimsak samphangra

Chingjuiwui Shimsak samphangra

Longra Phanitli Long Thing Khangava samphangra

 

Written by Tsivyo Kasom

Narrated by V Zingkhai

Writer’s Email: tsivyo@gmail.com (The writer is available, if you have any question or concern)

Comments

  1. you have a great weblog right here! would you like to make some invite posts on my weblog?

Leave a Reply

Your email address will not be published.