Shirui Kameonao Khararchān

Achālakha Shirui ngaleili Luireiwoshi Raichun kaho raikapinga mi akha kala Vacāwoshi Muka kaho sāfa raimi akhada yārkhoka khani okthuisai. Anina Phuilung kaho lungkhur chili shim sāda, RAITAI kaho ngarālui apam chili Tareizāt yamzāda atam kashikha okthuisai. Ani khaniwui Apreiva THARAWON kahova chi māngmaya. Tharawon kaho preiva chili Khamasom Awungashina rai rāda akui rārangthuihaowa. Marama Muka eina Raichun kaho mayara khani hina Ashiwui (Khamasomwoshiwui AHAAI khani akhana LUMRI akhana CHINRI hoda kasaka Ahaai chi ālithui haowa. Tharawonwui Athut āhāngsangkhavai PHANGREI kaho kaphung khangai āshāt chili kānung kānvāda ngathikazat atam chitharān kaphungpheichang chili Paorei ngayi kaho ngayi kameopam ākha leisai. Ngayi hiwui aphei apheili samzuilā hurning eina phorkasā chila anina vātheiya. Samzuilāpam ngayiphei chili Kameonao zarpāni ngathumda ngareopamsāsā chichinga.

Awun-Avāt kachida anina kameonao khani chili tukkhui khavai huiri-huitā zangda themlāk eina hotnāchinga. Kha anina rānganaikhaleoda ngayilungli tot-tot yamzanghai yamzanghai chichinghaoda matukkhuirarlāk thumana. Anina Shāng-Philavali vāhokhuida khararchānla sāya. Shangphilavana zamshei, shingkei khuiphunglaga ngayiphei chili samsa khalātāhailaga akui hotkazamlaga, ‘Inao khani, iii rik khashokphāmilu’ da vāsuisui chichinga. Kameonao Azarvapā china, ‘shokphāmihaosa’ da āpāli hānga, kha āpā china, ‘Ya, inili mikumona tukthuihaipaishina mashokasa’ da mamayālākmana. Chieina Shāngphilāvana machithālo, inao khaniya, ina naniwuivāng zamshei shingkei khuiphungda leili. zātla, hanla, zamsheila, shingkeila shokmanglu, shokshaikhuilo kala ikuili rikla khashokphāmihailāklu da seihāri eina hoshonhaowa.

Chieina ani zarpāni mathānthuthup shokthuithuilaga kuirik shokphāphokhaowa. Chieina Shāngphilavana aniwui aphei zangsingphokuwa. Chieina nao khani china, ‘Achon khisada iniwui aphei zangsing khala’ da ngahāna. Chieina Shāngphilāvana, ‘Ina naniwui aphei kachipā hakmei khala da singkhayangmaya’ chihaowa. Atam chithāran Raichun eina Muka ngathumsai. Shāngphilāvana āthumna ngashit kahai āthishurda kameonao khani chiwui aphei yāshong āpā kala uishong āzarvali singtithailaga, ‘Thākta rātuk khuilu, ina aphei singtithaira’ da khavao eina Raichunna mayarnaopāli kala Mukana shanaopāli da shoktukkhuihaowa. Chieina athum phāshak-phāzā-uwa. Mangkaphā, zākaphā kala shaikaphā chi theilaga kameonao khani china ngahana, ‘Achon, nathuma shimlila shaikaphā zakaphā kala mangkaphā hithāchingmalā?’ Shāngphilāvana hithāda ngahankai, ‘Ithuma shimle hili lāngmeikāarda (phāmeikhārda) shai-zāchinga, shimli ungpam-usa’ chihaowa. Chieina kameonao khani chi mathānthuthup shur-unghaowa.

Zatmamānda shongfali Shāngphilāvana, ‘Ina tukkakhuinida mayarnaopā I khuira’ chihaowa. Mukana shanaopāva chi ina tukkakhuina I khuira chihaowa, kha Raichunva ngasota khaniwui seihā khaleipāna ning lumhaoda nani khuilkalailu jihaowa. Chithādasāda Shāngphilāvashina Mayarnao chi ungnganaohaowa. Nao chi khararuda lui honthei kaphok eina chikum khaipho luishā utta lui ahonkapi thāran, Hangphun tara Honkape Vashānaopā china kameonao chi khuikhavai tuikharit zanghaowa. Kameonao chinala tui chi shitsanghaoda akhavāshiwui kahāng manganālākthuwa. Kahāng makhanganā athishurda nao chili Shāngwoshinala kashai-kashak kala khamang-kazā zatrom-hanrom mathādala masāmithuwa.

Kha Hangphunpā china suihaoda shaikaphā-zākaphāla nao chili michinghaoda āwui kahāngmāng nganāhaowa. Thangkhava nao china luirām kuimareida pai paimihailaga āshina nali rākharar akha iwuili yāmshanghaolu da tui rārak chitheiserhaoda khanāthang shāngwoshi chi kharā eina kachangmakta nao chili rākhararhaowa. Chieina nao china ili rākhararchinga ashiwuili mapamlui marā da Hangphun Vareikachangpāwui luirāmli yāmshanghaowa.

Shāngwoshina nana suikhui kahaina da rākahāng eina Hangphunpā china, ‘ME āvā akha mihaisa haoga aruihona iwuili kapam sāfaranu’ da pohaoda āni tui chili mayāngarok haoda ME chi homphunglaga Shāngwoshi unghaowa. Khanāthang Shāngwo china kameonao chili shangkaho eina Hangphunpā china, ‘Ya nale ina achonthang Me mikahai maningmala?’ China kupkahaina chihaoda hanunghaowa. Kameonao chili chithang eina thuilaga Hangphun Vashānaopā china nganaohaowa. Kha shanaopā chiya Vakawoshina nganaohaowa.

Vaka philāva Khangkhuiwoli favāhaoda shakzāthanghon thānkashok eina Vaka philāva china mashokngaiki chihaowa. Chieina avāvana, ‘Khi leilui khala inao athum atheng peihaira zatulu’ da hānga, kha philāva china, ‘Iya kameonao chi khāmshuisāda ngazungvā haoka’ da kapo eina iya, ‘Inao athang hāngki kachina ngazungvāhai khalailu’ da Vaka philāvana Khangkhuiwoshiwuili ngazungvāhaowa. Kha Vaka philāva china kalā shilāk eina awui naorathei maleithuwa. Raonaopāva (kameo achonpāva) chiwui thārā chiya mayāsanghaoda tā-akha uishong shang-ākha yāshong pareng eina shimpam tāngkha pemhaowa.

Chithāda sāda awui eina tangda Vakawoshiwui langsot la hithāda leili chiya:

Marān Laa

Katei Arao maleila,

Oh! Vaka kharei

Arao ngavei,

Oh! Khangkhuileng ngachungvāya.

Takha phahai

Shangkha phaya

Iwui raonao masina

Lāngsot laa hi shālaga Khangkhuipāshina nganāshihaoda āthei-āsā PAM (lākhot) maleilakmana chihaowa. Marama hiwuivāng khararngarokhaoda Shirui Vakawo RINGNAM china Khangkhui lui tara khayang sareklaga chithang ngazin Khangkhuiwo Shimreisawui shim chili vākashungthāran SHIMREISA khamong shohailaga khorpa singlaga phāshaksai. Vākathei ngashada RINGNAMNA kazei khāmong eina pharkai kha khorpapā pharthāmkhaihaowa. Kakai ngashada Shimreisana ‘Iya, ishawoshi china yonhaira khuiga chihaoda maningchangphutsālala ngalā ngakhotluishita.

Chithādasāda naothot naothotli mashimānkhavai laa akha Vakawoshina sāluishita. Chiya:

Shirui kachangmaning,

Paola leisai SHIMREISA,

Khangkhui shimrei

I wok kashok kazingli (iwui mitun-mirāt)

kāngahanlu.

Written by V. Vayur Shirui

From A Journal, The Legacy

Please follow and like us:
error0