Shongran Rinkahaowui Shongthot

Shongran Rinkahaowui Shongthot

Hungphunwo:   Awo Angayung

Kasomwo:           Awo Haorei s/o Awo Lungrei

Background:  Khararchānhi shimenraiwui thotlinada hānga.  Atam chitharān, Haorei eina Lungrei nganingrip haowa.  Lungrei sārhao kala Haorei raruda, āna thui kasingna.  Masāngla Awo Lungrei thihaowa.  Shongreng pāshi Awo Pamrana Shongranwui Muinao shinao khuiya.  Shongranli khareli Zeiranda hosāya kha ara Shongrandala mahola Somdal chihaira.  Chiwui atamli Vashā pāshi eina Muinao pāshi mā sāsai.  Shongran Rinkahao hi Kasom shang matiwui alungli khalei Vashā shang ngasāsayada hānga.

Vashā shimkhur akhawui thot chitheili: Kāngrei s/o Yangkazi s/o Khaso s/o Shaokhai s/o Yārseng

Explanation: Atam chithārān, Hunphunwona Rinkahao Muinaoli shimenrai eina shimen-unglaga zurthing eina ungnarhaowa.  Chiwuivang Rinkahao maringphālāk thuwa.  Awo Zingthan Zingkhaina kahāng athishurda Rinkahaona khikha maungkahāng (report masāthu kajiwuivang) einanada hānga.  Kha khi mahāngthukhala kajiya matheimana.  Awo Shaivi Kasomwoshina kahāng mik zanghaoda yansai kachina jiya.

Yarseng Vashā, ‘Amei (Hunphunwoli), Shongran Rinkahao hi iwui mina, masāthat mialu’ da shangpoya.

Hunphunwo Angayung, ‘Mi nganing khuirālu, maningakha Rinkahaoli sāthat haora.’

Chieina Shongreng pāshi vai, kha paishoshinada mamayāthuwa.  Kasomwoli rānganing ngasaklu chihaowa.

‘Ameina nganing phalungra’ da Haoreina vānganing miya jiya.

Kasomwo, ‘Imāk, Rinkahao iwui mina’, ‘masāthatmi alu, awui kashong khi lei khala ina runra’ chihaowa.

Rinkahao phatopli pamlakha Yarseng Vashana kashakkazā khuivā khamili khorāmli (khor mangkhavai, kahā eina semkakhuiya cup kathā) yāmshok khavai kuisikhai sangmi iji.

Ngayāshong kharā eina Rinkahaona kuisikhai chi khuilaga akhalatta kharākhui haiphungda Hunphunwoshi mi akha lungthatlaga yāmhaowa.  Shongran Rinkahao yāmhaoda mithit kashong chi Awo Haoreina nganingmi haoda, Kasomwona phungra chihaowa.  Kala Kasomli sāra chihaowa.

Chieina Haoreina, ‘Kashong masāmilu/malāngmialu, ina seihai thukha (seishim kahak akha) mihaoka.’

Seihai (hai of kahai /to keep) thukha hi sei thumrāhli masuitāmana.  Seishim kahak

Angayung, ‘Rai sāra’ chihaowa.

Note: Leingaphali Longkālaga Hunphunwoshina mi kharing pohaoda, Chāmphungwo Akoma Vakhamna thānlaga mamayā thuwada Shaivi Kasomwoshina hānga.

Rai sālaga mayuirarthuda, zingkum tharuk shini kasomnao kha khangateili yāmvāserhaowa.  Kasomwoshi ngaphayānghaowa; Faling, Aphung, Humpum, Khamphā, Phalung, Phatang kathāli yāmvai.  Kasomwoshina Humpum, Awopei/Awozāk/ shina tanrui, Paishoshi acheishina Kamphāli yāmvai.  Hithāda yāmserkahai thāran Awungashina Kasomkong Chihui Yaoyi yorshai/yorkhaimiserhaowa. (yormiserhaowa).

Ngatangkhui kahai lui akhakhani azingli chitheimili.  Awo Wungleng Kasomwona vāsāda akha leisai Sāreiyāna Hunphunwona khuiya.  Awo Shivam Vashā shili aren akha mihaowa.  Kasom philāva Hunphunwo shili favāda akha leisai, awui sākhoyar eina khāmkhuimiya, Luihi āra Avā Wungchang s/o Wungleng Kasomwowui sādaleida Zingthanna hānga.

Kasomwowui Lungchila yorshaimi haora kaji eina Kashungnao Vayom pāshina luiyarhei eina, ina khuihairada nganingmi haowa.  Chi eina mayorshaimi thuwa.

Atam chithārān Kasomwowui naongalāva Ayi Marāshung Ngayaiwoli khāmhai rasai, kha rai china masāpaimada Humphumli yāmshang haowa.  Shim maungpaimada Shirim Ashat, Lungpeoshanli maungzatlui marada kasā Laa azingli kapili.

Kharar Laa khano:

Thorāva samrā ungrimuwa (sam ungphunguwa),

Marum ili, (ngalava ili) khina sāro ngayit kasān;

Avālongli cham khamarā, Lātonga macham marālo;

Mikhamāngli farui (nganao/ngatang kakhui) kachi eina iwui chihui yaoyi kān uwa.

Oh! chihui rana kharekphao (pemting eina);

Kharekphaowa, oh Shirim Ashāt samkahāk thāya (changtāzatta),

Sam kahāk thāya Kasom Lungpeoshan maungzatluiya.

(arā Lungpeoshanli sam hākpha hailaga maungzatluimara)

Picture taken by Tsivyo Kasom on 25th Jan 2010

Contributed by Tsivyo Kasom

Compilation of narrations by Wungleng Kasomwo (copy of Honpam Raleng), Zingthan Zingkhai and Shaivi Kasomwoshi

Comments

  1. […] Shongran Rinkahaowui Shongthot khararchān mathāmeida […]

  2. Hi, I think your site might be having browser compatibility issues. When I look at your website in Safari, it looks fine but when opening in Internet Explorer, it has some overlapping. I just wanted to give you a quick heads up! Other then that, fantastic blog!

  3. F*ckin’ remarkable things here. I am very glad to see your post. Thanks a lot and i’m looking forward to contact you. Will you kindly drop me a e-mail?

Leave a Reply

Your email address will not be published.