Wikihao

Thingkhongphei/Seichang Khongphei

Achālakha awo-ayiwui khorkhong (utensils) thing, ngalei kala kahā kathā eina sāya. Phāzākhavai khongphei thing eina sāhaoda thingkhongphei kahona. Shimli shichinkhavai thongthāng akha sāda thingkhongphei hi sinshivai akhana. Ali Kokruiwon (rhododendron) eina sāya. Thingkhongphei hi saklāk eina sākhuiya, khamakangla makanglāka. Chiwuivang shimlui khayar thāda naongarā/arihāli yar maronna.

Thingkhongphei kahak kateo leiya. Hakmeithui kachiya chili Seichang khongphei hoya. Seichang khongpheili apheila sāsanga. Awui azak ama eina chitheili. Morkathemnaobinga zāt seichang khongphei akha mazārarmanada V. Zingkhai hānga. Mi khanina ngarumzāpaiya. Matailāk eina ava avāna phāzākhavai sai.

Thing eina sākakhui khorkhong ayur ngatateida leiya. Aphei makakā khongdeng/khuteng (khongtheng kachi maningmana. Khongtheng hi khangateina) hila thing eina sākakhui khorkhong akhana. Hi eina pheipāng pheokhavai/mazikkhavai sai. Hakmeithui kachi chili khongsai hoi. Achālakha khongsai eina ravaikhavai sai.

Nathumna khangarumsang milu.

Glossary:

i. Morkathem: Zāt chungda mazākathei, mamorkahākbingli morkathem hoya.

ii. Sinshivai: Shimli shichinkhavai khorkhong, ot saikorali Sinshivai hoya.

Written by Tsivyo Kasom

Email: tsivyo@gmail.com (the writer is available if you have any question or concern)