Tui-ngaren (Idioms)

M

Machihãn sarali :

Machihãnlãkla kasã, rãkashok.

Chanjam : Machihãn sasaravali, “thãira chithang thoya, thora chithang thãiya kaji maningmalã?”

Machi kasãthei :

Machi kala kasãthei.

Chansam : Raphei Luira/luitã sãakha hoksãli machi kasãthei katum kahãk khangahan thãya.

Macho chihã :

Khamakhão, khãtok, machorra, chirpãi.

Chansam : Ava ãvãwui macho chihã nãongarãna rutmiphalunga.

Machom shongro :

Maphaning kasã Kashong(unexpected crime).

Chansam : Machon shongro phungra makãthura. Kakhalat, Kahaka kashong/kharita kashong maphungrarthura.

Mahon ngapão :

Lumshilao kasã.

Chanjam : Mayar ngalãna ngachan sãri shaksã khariklaga mahon ngapão sãurakha, “kapãiwon, sãhãrwon malingting khawon thãda,” yangda makhuimana.

Chansam : Tarung kahakhak ringsur eina yãruina yãng ngatamda mahon ngapãolaga khãngsangshapa.

Maja chihãi :

Kashi khayã theikhavai, kalãkashi/khamahãi theikhavãi ãkhon.

Chansam : [i] Maja chihãi maphãthura, machangtãngãiga. [ii] Seila maja chihãi nganãlaga seipet phãya, mila ramphãtli maja chihãi nganãlaga ram kaphã ngachãna.

Majuk chãmchãm :

Phaningsang kavãi makhalei.

Chanjam :  “Majukchãmchãm, shãithei kuikãi.” Kakhalat, sãhãkli shãithei khamatheiwui khangashei kuili kãkashung thãda kasak kharãwui chukkhamaja ãkui kãsãzaya kajina.

Makahuk makahak :

Kachot makathei, khangachi makathei

Chansam : Ya, ãchãhonla shãoshãomihairã, kachiwui makahuk makahak khalei!

Makaphã makhayã :

Maphãlãk kaji (wickedness), (“Makhayã”da shikachin nguiya).

Chanjam : [i] “Makaphã makhayã pão masili thãkmeiya.” [ii] “Kapha paole makaphã pão thãkmeiya.” [iii] “Meili shop eina phungpãiakha makaphã makhayã chi ngathumpãiratara!  Vãiphumhãiakha (não vãihãi akha pharãphalunga) vãtshok Phalunga.”

Bible: “Makaphã makhayã mi kathi thãrãn ãwui kachihãn ngalathãowa.”Chanjam 11.ab

Makathei makhamei :

Theiser kaji (all knowing).

Chansam : Makathei makhamei chiya Varivaramãnga.

Makaza makakã :

Khikha masãkathei, masãtheilãk kaji.

Chanjam : Makaza makakã milãka, “shãtlãi thãda shãtnguitui eina.” Kakhalat, Shãtlãi hi ãga ãkhana. Ngãiron eina zata, mina singzahãiakha ngaruirom pamhaowa. Khikha masãkathei mili shãtlãili pãntam sai.

Makei chipchip, makeizimzim :

Makeikhãiser kahãi, Makeikakachup.

Malum khayapwui Lã: “Alum O nemlo….nemlo, makeizimzim ei!”

Makhaningning :

Hãngphãphã kaji, khikha makhalei.

Chansam : Khikha makhaningninglila satkhalatlaga masat sãkhui rakho! Kakhalat, Kashong sãkhuirakho kajina.

Makhão tharão :

Hãori kãorei atam, Luiradung(dry season,windy season).

Chansam: Makhão tharãoliva theimaja peimaja lingsanguwa.

Makha marang :

Zingrot kakura ãtam, June & july.

Chansam : Makha marang hiya kazing kakura ãtam sãthuda khorkhongla morhãowa.

Makhei ngayeida :

Ayãr, mi makhalei pam.

Chansam : Makhei ngayeida ngachir nganamlu.

Makheiri makheishãi :

Ngathumda kashãi (stingy)

Chanjam : “Han singlala makheiri makheishãida, shangkhana sãshi kazim kathãna.”

Kakhalat, Shangkhana ãshila ãsãla ãmãngna shãira kajiwui kakharãma otsakli chãnjam kasãna.

Makup makãi  :

Atam zangda kasã, zangser kaji, peiser kaji.

Chansam : Awui ot kasãva makup makãi zanglãka.

Mamajut mamasat :

Maningshi kathei, sãmi vãmi kahãi makathei(ungratefulness).

Chansam: Nganãokhuichanghãora! Ara mamajut mamasatthura.

Mamazi mamazak :

Kathãi kachãm, vãhongnao, khangazana.

Chansam : Mamazi mamazakla hina khisãthukrakhala!

Manão Luishom manão lãkhot :

Huida mã kashom, huida ngalã kakhui, manãokhão (doctor after death).

Chansam : Manão luishom manão lãkhotna khi phãrakhala!

Manarimrim :

Ningzãori kahãi, ningãi kaphã(cheerfulness).

Chansam : Manarimrim ãthumshiya, thangkha kathei thãda ngayurpama.

Manei Phãham :

Manei phanit shar.

Chansam: Manei phãham sãhãiakha zeikhãi ngahã masingluimana.

Mangari mangaran :

Mangari kathi, mangarãi kachã.

Chansam : [i] Longmarãnwui tarung Rãnrei tarungli mangari mangaranmana. [ii] David eina Goliath mangari mangaranmana.

Mangmatot ngareira :

Khikha maphãk kakhãiya, mangkhama, nganingung kahãiya.

Chanjam :  “Mangmatot ngareira eina “pawung kathãna”.

Mangra mangzãt :

Mangshong phãkazã.

Chanjam : “Mangra mangzãt vãpokazã thãda,” phakazãshong mavãthura.

Mangthung mangreo :

Zam mangda kui kãkahai.

Chanjam : “ Mangthung mangreo akha matuisãnsãn.” Kakhalat,  matuishonla kaji.

Marekta mareka :

Chotta ot sãakha katho. Khanangda ot sãakha kathem, ringkapha.

Chanjam : “ Marekta mareka, yãrekta ngarektãya, yãningta nganinga.” Kakhalat, ngachãng kakãna thoya, khamarekana thema, yãkhaningana (lãngkasoana) chieina tanghaowa, tãtunga.

Marem razãi :

Zingrotra honkhamanga vãnão, zeingaruili makazanga.

Chanjam :  [i] “Marem razãi thãda yãrui ngazuili mazangakha mashitsangmana.” [ii] “Kha ngazuili masãmara, mazangmara kachibing chiya Marem razãi thãhãiyei!” Kakhalat, rakhong kakhonli marem razai vãnão hi mazangthuda ãli tara mamangngasakthuda, zingkattungli, “Zingrotra.. zingrotra..zingrotra..”da tara ngakãorangrang pokazata chanjam hi yarui zeingaruili makazangabingli hãnga.

Mareo cheocheo :

Ningãi khamathã, ngahãnkathei.

Chanjam : Não chiwui khangahãna mareo cheocheo, “phareopharã thãlãka!”. Kakhalat, mili ngahãn katheibingli ngachãng machatla mathãnthupthup kakhonga vãnão Phareopharãli pãntama.

Maron maron :

Khare khare kasã (Maitei tuili mathang mathang jiya).
Chansam : Maron maron eina rãlu.

Masãila masãikok :

Khikha makhalei, khamasãi(empty handedness).

Chansam : Khi vãkhuiura! Ava masãila masãikoknita!

Masho ripo :

Kaphalat, maphãkakhui.

Chanjam : “Kongrik seina kazei mashoda kasing thãda,” ava masho ripo kho! Kakhalat, Kongrikseina kharung thãda shimkhurli/ngasotnãolila maphakhuila ungrunga, ungngahãta kajina.

Mashun makhui :

Khamashung.

Bible : “Thangkhama miwui thangmet mashun makhuina thei.” Chanjam 14.8b

Masi kongra :

Masi kala kongra, khamasãi.

Chanjam : [i] “Yonhãowada masi kongrali machikheihãipãimana, kala mashungada kazingli makhãng  khalongpãimana.” Kakhalat, khanguiali machithithãipãimana. Khamashungali masot masãothatpãimana kajina.  [ii] “Pangata masi kongrali ngararpãilã? “

Masikta ngame, chipatta ngapat:

Mangakaishi kathuk.

Chanjam : Mangakãishialu, “masikta ngame, chipatta ngapatrakho!” Kakhalat, ngakãishiakha chotra kajina.

Masi mafa :

Kuikhamareili khaleilei (environment), kashi khayã.

Chanjam : [i] Tãida (huida) mangakarthuialu, masi mafa phanrora. [ii] “Suiham hãirakho masi mafa phanthalo!” Kakhalat, kashi khayã phanthuihaolu kajina. [iii] “Aja shirepshong/chãlãngshong majangtãasei, suihamraji masi mafa phanzapãishinei!”

Chansam : Masi mafa makhãoserhaira.

Masi yãngyãi :

Shãlui, kaphungluiwui tharãzãt.

Chansam : Thingreira vãngakhunusa, masi yãngyãi vãposei. Kakhalat, Luirali thingreira shatung kahai chili vãkasing hi sokhami pokakhuina chihãoda heithei ungmei khavai Thingreirali vãpokkhuida sokhami vãkhuisa kajina.

Maso masakta, maso mahekta :

Saklak eina kasã, kakhui.

Chansam : Nãoho nãotong sãthuda ãva ãvãna harra vãthãipãishina kachi thãda maso masaklak eina nganãowa

Mathak marakta :

Ngakãi kashi.

Chanjam : “Mathak maraknãli, khãopãi thãlakli.” Kakhalat, Khãopãi zãakha khamathak thãda sãra vãra makakhuiabingli Khãopai eina chanjam sãi.

Mathãn mareo :

Mathãnnã kahãi.

Chanjam : “Mamathãn mareonãlu, Zingsui Philãvali ãchon hora ãmaili shireothat kahãi  thãpãishina.” Kakhalat, mina khayã kashi eina maringphãtheimada kongluithat kahai.

Matha meira :

Meithalung, meira(hearth and burnt firewood).

Chanjam : “ Iniwui chãn ngazek matha meirana theiya, khayonali zingmeilãina (epilepsy) tãkranu.” Kakhalat, mina matheilala meithalung eina meirahunna theihãoda Kazingwui meina khayonali tãkra kajina.

Mathir phangui :

Khor mamang kaphã, kathinãowui mãi zakshi khami, shar kakhara.

Chansam : [i] Sharngalanli kãida lui changtã akha mathir phangui hãokho (shar kharahãokho) [ii] Khamangtungli  kachipattui khamatui kala kashan kachon samashãtmi kahaiwui mathir phangui kashong saklaka. [iii] Mathir Phangui kahai khor chi mangakha ãkhuk ãkhã mangathapãimana.

Matui sãnsãn :

Yirla makachat.

Chansam : Mangthung mangreo akha matui sãnsãn eina kashongtuila matuiuwa.

Matui teitei :

Mashungta mamatui kathei, horzakta mamatui kharar.

Chansam : Mimãi yangda rãkhaningmana, matui teitei eina phayetmida lei.

Matung matãngta :

Hangsangphãphã kaji.

Chansam : Matung matãngta mahãngsangphãphãalu.

Maungkashung mavãkashung :

Makapei, khavãt.

Chansam : Maungkashung mavãkashungli chipemmingarokakha ngashangpãidala!

Mayar ngalã (youth) :

Ningsã khangazipabing (Yaron ngala kaji hi nguiya).

Chanjam : [i] “Mayar ngala hãisinã mapamalu, sãthao thãda ngayatãhãipãishina.” Kakhalat, nganãinã pamakha morei shoka kajina.  [ii] “Ava ãvãna shimlui phãya, mayar ngalãna mãiwonli (ãzak khamathãli) yanga.”

Mayonlo ngamonlo :

Mayonmikhavai kachiphun chi shãimikahãi.

Chanjam : “Ralãli har kachiphun thãda, mayonlo ngamonlo chihaowa.” Kakhalat, mayonmi khavai chiham akha sãmashãtmi kahãi.

Maza makakã :

Makathem, masã kathei.

Chanjam : Maza makakã milãka, “shãtlãi thãda, shãtguitui eina!” Kakhalat, Shatlãi hi ãgayur ãkhana. Ngairon eina zata. Singzaakha ngaruirom eina mangawola pamhaowa. Hikatha ãga Shãtlãi hi khikha masakatheiya mi, mangahãn katheiabingli chanjam sai.

Mazui male :

Reosang khami.

Chanjam : Mazui male phoksangmida nawui eina sera, “mei chakpã thãda”.

Mãiba mãiroka (Person pitted with small pox marks) :

Amãi khangapa.

Chanjam : Mãiba mãiroka chi ninga leilãka. Kakhalat, ãmai ngabalala theithangmeilãka kajina.

Mãipum sumsum :

Amãi hungkahai(redden face out of anger).

Chansam : Aita, chãnla mahãngpãi, mãipumsumsum eina yongrorkida sãya.    

Mãishã mãikong :

Kakhayek makhalei(shameless behavior).

Chanjam : “Mãishã mãikongnãle, nãmãili siluihui hophãola?” Kakhalat, kakhayek makhangavã.

Mãishi mãirei :

Mãikashila mãikhayãla ngarãi kacha (win/win).

Chansam : Mãishi mãireiya ngarãkpakhãolu /ngayãthãhaolu.

Mãk chinão :

Amãka ngarã.

Chansam : Mãk chinão phãhãoda khãngkhuipekhãowa.

Mãk khangamãk :

Ngalã ngakhot khangarok, ngalã chihut khangarok.

Chanjam : Kasomwoshi eina Shaizãpãshi mãk ngamãk ngaroka.

Mãk nãoni :

Amãka khani.

Chanjam : Mãk nãoni chi “ãpung eina ãsham” thãya. Kakhalat, mãknãoni chi khokkha yãngkha sãi, mangateilãkmana. 

Mãothit mãorit :

Hakkhamahã mimão.

Chansam : Maothit maoritli Hunphun yãron kachungkha thihãowa.

Mãrei mãrã :

Mã kateo kahak.

Chansam : Pi (september) kachãngli mãrei mãrã shokser haowa.  

Mãtham mãlem :

Tãtung kahãiya mã, hãttã kahãiya mã.

Biblena hanga: “Ana (Ruthna Boazwui luili) vãda kahãtabingwui thili mãtham mãlem vãphai.”Rut.2.3a

Mãthei hãoyãng :

Mã khamina ãtam (sept & oct).

Chansam : Mãthei hãoyãngli kazing khangashum maphãmana, thei tãya.

Mãthei mãleng :

Akachanga ngasotnao.

Chansam : [i] Inishi mãthei maleng kachangvana. [ii] Wonyãithing shunkahai eina mãthei mãleng sãikorana shonra rãsangsera. Shonra masangakha mãthei mãleng chathãowa.

Mãwon zãirã :

Heiun, heithei ungmei khavãi suikahãi.

Chansam : Mãwon zãirã ungmei khavãi shimvana shim kameo, lui kameoli mingzãiya.

Meira meipho :

Hãnggashi, ngasankashi.

Chansam : Meira meipho, mina hãngakha khara khãra maji (khikha mangahãn kakã)!

Meira meishom :

Miwui ãcham makasã.

Chansam : Meira meishoma, na hili khisã kazat khala?

Meishom meirom :

Akhamei kashom, Khangayei

Chansam : Nawui otsaka meishom meirom thãlãkli! Kakhalat, Khangayeiwui otsak thãya kajina.

Meisum tantak :

Pamkharum, ngayur changtã kazat.

Chansam : [i] Meisum tantakli tui mangahãtphãphãalu, ãnãolam nali hatpek sanghãipãishina.

[ii] Kachikathãna khawui zeingaruili mazangakha chipãli khana ngalenghãoda, hakhãoda kui mangasitmana, mei mangakhotmana, meisum tantak mangarummana.

Meitui meithã :

Maringting kahãiya meithã.

Chansam : Kachãm hi meitui meithãli nãikakhui thãhaira.

Mekmek :

Ayat kasã, chãlãk eina kahãng.

Chãnjam : Mayarawui tui chiya mekmek hãngda, “kazing khanim thãlãka.” Kakhalat, nganãngãilãka kajina.

Micham miram :

Miwui zatkhanã.

Chanjam : “Micham miramli mazangla sei khanãng thãda.” Kakhalat, micham masãthuda yãruishangli makazangabingli sei khãnãngli chãnjam sãi.

Mikashãi mikashak :

Khalem eina mikashãi, mikazã.

Chansam : Mikashãi mikashakli shimãn kahãi maleimana.

Mikashãi mikhamang :

Aman makhuila khalem eina mikashãi, mikhamang.

Chansam : Awo ayi thotli khayor mavãila mikashãi mikhamang mãnga.

Mikmãi :

Amik kala ãmãi, Yangkhangasung, yangkakazak.

Chanjam :  Mikmãi ngaphanlãk eina makhararalu, “kakharar chi mahangsangmara.”

Chansam : Mikmãi khayangno, sãzayei!

Mimãi :

Michang kasã, miwui ãmãi

Chansam : [i] Mimãi yanghãoda, mashun bichãr maleithura. [ii] Khararchan: Mimãi mathãla, mimãi rãpkha, famãi rãpkha eina sumkok phunglaga ungrãrãsa kaja ãrihãvana khiva khivã khalada meirahun eina thuikahãi kaja ãwova chi kazeiram yãmvãhãoda chithang eina thuida kazeinão okathuili maungluilãkthuiji.

Mingaren kameongaren :

Minala kameonala ringkashi.

Chansam : Iyavo! Mirin hi “ mingaren kameongarenhãoda,” ringshãt mathãthura. Kakhalat, minala ringkashi, kameonala chotkhangasak.

Mirei mirang :

Chinãongarã makhalei, mi makachung.

Chansam : Kalãshãtna! Mirei mirang sãthuda khikha masãthuklãkthuwa.

Mishok mizang :

Khami kala kakhui.

Chansam : Mishok mizang kasãli nguikahãina.

Misui mafa :

Khamashãt, makathar.

Chansam : Seihã sãakha misui mafana khikha marãzararmana.

Misui morei :

Aming singda khangazek, morei kachiphun, miwui khonshãt.

Chansam : [i] Suikaham hiya misui morei hamhãida Jishuwui ashina morei pheomiya. [ii]  Khangazuili zatlu, misui morei zapãishina. [iii] Harhã chi yamkokli sanghãilaga sharvana hamshokda, “misui morei saikora phanshokser hãolo “da suihama.

Mitho thingo:

Mi chungda okathui, naongarã thing kaser thãda kashok.

Hão Lã:   O kumshoknilo, kumzangnilo I phungdhar,

                 O I Phungdhar kumshoknilo, Phungdhar yaron kãnuwa;

                 O Yaron Phungdhar kãnhão, rashang ratã Haorei O,

                 O yãron Haoreiana, ning matun ngãikijiya;

                 O ning matun ngãikijiya, kapã yangsa Angayung,

                 O Angayung kapã yangsa, Mãitei keithei zangsuiya;

                 O Mãitei keithei zangsui, nãomeitheira mahora,

                 O naomeitheira mahor, mitho thingo shokrãli;

                 O mitho thingo shokrãli, ngasheinirnir sãyangsa,                 

Mizei mirui :

Miwui zeingarui, khangachã zatkhanã.

Chansam : Mizei miruili mazangda mazangla, khipãna ngachonura!

Morsãp morrãp :

Hangphãphã kazat, makhaninga tui matuiphãphã kazat.

Chanjam : [i] Morsãp morrãpnãle, “ namorsoli sãpher matheilikho!” Kakhalat,  khayekminãya kajina. [ii] “Morsãp morrãpwui khamor chikhurna. Morsap morrãp eina kathi shoka.”

Morthei morlaklã :

Matãida kashãi, ngateida kashãi.

Chansam : Ava, khamathãrchãnphalunga, morthei morlaklã sãphalunga. Kakhalat, Ngateida, mathãmeida sãkhuichãn kachiya shanao.

Muinão zãirã :

Amuiva ngarã.

Chansam : Muinão zãirã mashitri kapamli khina ngashurra khala?

Murmur :

Mangasãmla ot kasã.

Chanjam :  “Hokna murmur lui vãta ot sãlala, fana ina sãya kaji.” Kakhalat, Male eina yapkazãli kahãngna. Ot makasãana masot kakhui, yaruili ot makasãpãna ina sãyada hãngkazat.

Please follow and like us:
error0

Leave a Reply