Tui-ngaren (Idioms)

S

Samrik kuikãi :

Mi thikhavãi.

Chanjam : “ Mithit kuikãi, samrik kuikãi tui matui shãra. Matui phãphã akha nali latungrãrãsãra kho.” Kakhalat, mili kalãshi khavai sãakha khalattali hanungpampama.

Samung samvã :

Yongung yongvã kasã, ngasamung ngasamvã kasã.

Hao Lã:   “ O kazingyo karãkumlo,  (Kazing katharãn kumkhala)

                   O Maharwonna wonriya;  (ngalãnão phãhãira)

                   Ivãreosinga, O Samung samvãya,  (vãreokhuilaga ngasamung ngasamvã sãi)

                  O Samunglui samvãluiya;

                 O ya  I  shokhamalo…” (masã khangayi sãkhanganão)

Samyãng khangarei :

Rasa kasã, parei gahar sãkhangasak.

Chansam : Leishilala samyãng mangarei thuda maungshungthumana.

Sãchamcham, sãcham vãcham :

Ot kasãli hapkakhano makhalei.

Chansam : Nawui ot kasãva, sãcham vãcham, sãchamcham kahãi matheilãkranga.

Sãfa rãimi :

Athi kashura, khamaringa rãimi.

Chansam : Awungana ãwui sãfa rãimili kasatsangda yorshãingakãnhãira.

Sãhekhek :

Masã kapãi, ot kasã chi maung katã.

Chansam : Itão ngarã, ãja ot he sãhekhekhãirikho!

Sãhunhun :

Masã kakup, masãkapei.

Chanjam : Ot kasãla sãhunhunhãida, sãphup machilãkla,  “fala pãila, harna khangayã thãhãira.”

Sãingamãt sãtsãt :

Malung vãtta, ning maringphãlãkla khamatui.

Chanjam : Sãingamãt sãtsãt mamatolu, “zinghãm khangamãt thãhãira.” Kakhalat, malung vãtsir khamatuili zinghamwui ãyat masãla kasãli chanjam sai.

Sãkathei vãkathei :

Ot sãtheilãk kahãi.

Chanjam : Athumshi naongarãva sãkathei vãkathei, “kajui khãirik thãda” karankha sãrada, ngalãngda sãkup haora. “ Thangkhama, khamakhuna nãongarãbingli “kajui khairik” kazana zeikhai ngahãli chanjam sãya.

Sãkhanã rãikhanã :

Khanã khamathing.

Chansam : Mi chiya sãkhanã rãikhanã kho, piphup hãilala makashã maleimana.

Sãlãnglãng :

Sãhun kahai, Ot mangã mabhãmada sãhun kahãi.

Chansam : Ngalang ngazinãhãoda hishong chishongla ot salãnglãnghãida lei.

Sãlãng vãlãng kahãi :

Sãngui kahãi, sãyon kahãi

Chanjam : Sãlãng vãlãnghãoda masãluipaimana. Sãlãng vãlãnghaowada,“masi kongrali chikheipaila?” Kakhalat, sãngui kahãiabinglila machithitpãimana.

Sãlui rãilui :

Ramsã tãrãkha khaleiya lui, miwui rãina kuinam kahãiya lui.

Chanjam :  “Mathãlala sãlui rãilui sãthuda nganeiya (maningchãngma).”

Sãlui vãlui :

Fathui khani kathum kashi, shomda ot kasa.

Chanjam :  “Sãlui vãluida khi phãra khala? Kuiphum phãkazatna. Khareshikha maleimana.”

Chansam : Atam shimãn khavãina, sãlui vãluida khi kankhanã leikhala?

Sãlumpumpum :

Khalum, kasã.

Chansam : [i] Tara chi sãlumpumpum eina leifaya. [ii] Nao hi khãiheng ranta lei, phasã sãlumpumpum eina leida lei.

Sãmi rãimi :

Ramsã, rãi kasãmi.

Chansam : Achãlakhava sãmi rãimi mãnghãoda lui mathãda machangtãpãimana.

Sãngrem khangapui  :

Zimikli kahung eina kuikhanam. Kashar/kathi shokki kachiwui khudam, sãngrem khangapui hi hok khumkorwui ãhãli ngaranzei kazang leiya.

Hao Lã : “O zimik kuirangle,

                    O khikha wungnao thinijilo;

                   O ngachãn mashãrito?

                   O sãngrem khangapui pamli sathi ichikho! “                                                                                                                             

Kakhalat, Sãngrem ngapuilaga chatkahai pamli wungnao thiya kajiwui Lãphona.

Sãosão lãolão :

Ngahãn kaphã, ngahãn kathei.

Chansam : Asova , sãosão lãolão eina ngahãnphãlãka.

Sã pharphar :

Ot sãkashi, ot masãkapai.

Chansam : Pheipãng sãza pãishina thãhãomasa, sãpharpharhãili.

Sãphei sãpãng :

Sãwui ãphei ãpãng, sãchuk, sãkãi hkt saikora.

Chansam : [i] Khararawui sãphei sãpãng mayorzãpãimana. [ii] Phumchifawui sãphei sãpãng yolãli ngayarmiphalunga.

Sãrenren :

Thãkda kasã.

Chansam : Ot chi thãkda sãrenren khalãihãolu, kazing kumrota.

Sãri kongnãng :

Sãri sãikora, shim sãri.

Chansam : Achon ãmeishi sãhãoda shakzãthang sãri kongnãng peida shaksãrãya.

Sãrla pãla, wora shãrla :

Shãrhãoda kapãla thãkahãi.

Chanjam : Ara ithumwui tuili manganãshiano, “sãrla pãla, wora shãrla chiya.” Kakhalat, sãrhãoda kapã thãda matuiphãphã kahãi kajina.

Sãsã vãvãda :

Sãyangser kahãi, yangvãser kahãi.

Chansam : Sãsã vãvãda nãongalãva chongmeithuiya.

Sãshap pangshap :

Sãkashap.

Chansam : Varivara hiya sãshap pangshapana.

Sãshãi khorman :

Sã kashãi, khor khamang.

Chanjam : “Mahei ngarokda sãshãi khormanli mazanglala thingwutle mayãmpãimana.” Kakhalat, maheingaroksãlala kharit kharã thãrãn, kathi kasãr kharã thãrãn mamaheipãimana a.

Sãshi sãngãt, sãshi sãngã :

Acham maphã khangãi, malungvãt khangãi.

Chanjam : Kachiwui sãshi sãngãt/sãshi sãngã khangãi khala,“khana thãda kapum kaseourakho”. Kakhalat, malung vãtta matuishon kachili Khanana (pigeon) khangasãm maleila khongpamshon kachili chanjam sai.

Chansam : Sãshi sãngãtngaiuda setmaretset khanafa (mangareirãra) pamda lei.

Sã teitei, sãhekhek :

Masã kapãi, sãyon kahãi.

Chanjam : [i] Ot hiya sãteitei hãora, “silui ngachili hanshithã mahãi kapãi thãda.” Kakhalat, nganãipat kahãiya sei ngachili nganãipat kahãiya hanshi thã mapa kapai (mapam kapai) thãda ot sala makakhuili chanjam sai. [ii] “Ao shuhã, shiok khamei khamayut thada,” sãtei vãteihãira. Kakhalat, chihãn ngamãn kahãi.

Sãtha sãthã :

Chungnãhãoda sãtha kahãi, tãkatung.

Chanjam : Ngaphei retreile (ngasãm khavãipamli) mã sãtha sãthã kaji ngachãna.

Sãthei vãthei :

Ot sãkathei.

Chanjam :  Sãthei vãtheilãklo, nana khatra!

Sã toktok :

Ngareira kahãi, masã kathei.

Chansam : Ngareira eina sãtoktok khi sãtheirakhala! Kakhalat, ngãiron eina ot kãsã, ngãiron eina kazatli mashitkasanga tui.

Sãyur vãyur :

Sã kala vãnãoyur saikora.

Chansam : Ngahongla maleithuda sãyur vãyurla ngahaphãira (maleiluithura).

Sara sarã :

Ningkhamaong, ning tongda makasã.

Chansam : Khi ungshungphalungra! Ning sara sarãlaga.

Seikui rãima :

Seiwui ãkui, rãili kakhui mikui.

Chanjam : Lengchengshimli ãchon ãmeishina leishi leishãi, seikui rãima ruksanga. Kha khaleiabingna sãshãi kashungakha seikui rãima, leishi leishãi chuksangpãiya.

Seiyum miyum :

Sei khayum, mi khayum.

Chanjam : “Seiyumzang; sei yuma, miyumzang; mi yuma.” Kakhalat, sei liakha sei makhalei, mi shãothatakha mi maokapei, mi thishumhaowa kajina.

Shakmalãi zãmalãi :

Mangkhuihailaga, zãkhuihãilaga malãi kahãi, ningkashi makathei.

Chanjam : “Shakmalãi zãmalãida temshihãoramã!” Kakhalat, pozã, pomangkhui kahai, themkhui kahai eina mashãt kazat, makhaning tui hãngkazat.

Shakmareo zãmareo :

Zãlakha, manglakhava ngahãn kaphã.

Chanjam : “Shakmareo zãmareoda karankha vãnikhala!”

Shakneng zãneng :

Zãkatãi, mangkatãi.

Chanjam : “ Shakneng zãneng (zãkatãi) pozãvãikida, Khãiwonlã thãda ngaseozatphãphã makho!”

Shaksha lãipãn :

Lãi kaphung, Phumlãi.

Chanjam : Ashe shaksa lãipãn panglãka. ii. Shim pãnra chilala, shaksa lãipãn khayangno.

Shaksha yãngyui kazat :

Shim kachida kãkazat.

Chansam : Maungpammana, shaksha yãngyui zatta kachili phãvãrakhala?

Shangkãi ramkãi (shimkãi ramkãi machipãimana) :

Shang kakãi, ram kakãi.

Chanjam : Shangkãi ramkãi nawui eina shoksera, “Zingsãnlã thãda.” Kakhalat, Lãngparli Zingsãnlãna (zingkãnla) tangtonli kãlaga ili tãkluda kakasir eina langpãrna thingli katãk thãda shangram kãikhavai reosang khamiabingli  Zingsãnlãli chanjam sai.

Shangnão ramnão :

shimkhur kala ramnãobing

Chanjam : Shangnão ramnão ningkha yãngkha sãlo, khokkha yãngkha masãtheimada yãngyãng (kãihãiakha) hãiakha   “zãttham kãila fana khamana thãhãorakho”. Kakhalat, zãttham kakãi hi fawui vãng zãkhavãi samphanghãoda ringkaphã thãda shimkhur kakãi hi yanggashebingwui vãng ringkaphãna kajina.

Shanvãi chonvãi :

Sãri khangavãiwui ãrã.

Chansam : Shanvãi chonvãi khaungli yangla makhuimana. (“When a woman is badly dressed, you notice the clothes. When a woman is well dressed, you notice the woman,” says Cherry Jnawar. “Clothes make a man. Naked people have little or no influence on society,” says Mark Twain).

Shar Kãi :

Sharwui (religion) ãzã, ãngaret.

Chanjam : Kachikathãna shar kharada (shiyan sãkakhãi) lui changtã sãakha Shar kãi lupa 6 eina kashongrãnga.

Shãikashi shãikaphã :

Mashãikaphãla shãikaphãla.

Chansam : [i] Thãihãiakha shãikashi shãikaphã makharluimana, samkaphang saikora shãiphãhaowa. [ii] Shãikashi shãikaphã ngacheishãisa (ngatak ngatãda shãisa).

Shãiri shãirã :

Penda kashãi masamkaphang.

Chanjam : Athei chiya shãiri shãirã machilãkmana.

Shãiung shãivã :

Uishong yãshong kashãi.

Chansam : Chotakha shãiung shãiva sãmalu.

Shãkakhuikhui mashãkakhuikhui :

Ngahun ngahãda shãkakhui, mashãkhui kakazak.

Chanjam: Nganãtitkhuilaga hãngsanglu, shãkakhuikhui mashãkakhuikhuijilaga hãngsangphãphã, “Marem tãsijila, Chamvana kakapãk thãda.” Kakhalat, shongfali zatlakha kachikathãna kahãnghãngli shurthuihãoda vãki kaji ãpamli mavãkashung.

Shãm kajit :

Fathui kahai shanãoli morphãrtui  khamatui.

Chanjam : Samsa tanhãilaga lãngsoda kachikathãna shãm kajit sãakha kashong ritlak eina sai. Kakhalat,  fathuihailaga kachikathã mayãrnãona lãngsoda ina ngasopimi kahãiyanada morphãrtui khamatuili ritlak eina kashong rãnga kajina.

Shãngngahon :

Shãngrãshum kaji.

Chanjam :  “Khareina (squirrel) ngachãda shãngngahon sãshãi shãi (shãngchinga), mikumona ngahon sãshãi mashãimana (mashãngchingmana).”

Shãnrei pãivãt :

Shãnglãk kaji.

Chansam : Ashi shimkhura shãnrei pãivãt eina okthuida lei.

Shãopão kazat :

Lumkhalãoli ngahom kazat, phãkazat.

Chanjam : Mashãopão zatalu, “Malum thãda ãchãm thata!” Kakhalat, malumna shokhãiakha ãkhurli malatunglui kaji thãda lumkhalãoli ãtãzangthata  kajina.

Shãrei shãrã :

Hakmahãlak eina ngalã shakazã.

Chanjam : Shãrei shãrã sãsa chihãoda ãtheng ãreng, huishon nãreng peida phungrãya.

Shãt shingãt :

Mangahan khangãi, kashi.

Chansam : Matheithura, khina hiyakha shãt kashingãtkhala?

Shãt ngathãn :

Mayangarokta kapãng.

Chansam : Khakchihã mangarumthuda shãtngathãn sãhaomã! Shãtngathãn sãhãoda maphila (lãphit makhuila) rãivão sanghãowa.

Shãtra shãtzãt :

Maringkaphãwui kashak kazã, mangahãn khangãiwui kashak kazã.

Chansam : Nawui shãtra shãtzãt chi mazãlala thãthãlo. Kakhalat, shikhangãi kashak kazã chi mazãlala khikha maleimana kajina.

Shakhui vãkhui :

Shakakhui, tamkakhui, tui chi otsak eina kasã.

Chanjam :  “Konghã (vãnão sãikorawui ãkhon sãkathei vãnão) thãda” shakhui vãkhuitheilãka.

Shali shana :

Shanãoli shanãona.

Chansam : Kazãt khayangli shali shana mathãlãk eina yangmiya.

Shanão mayãrnao (mayãrnão shanão machimara. Shanãona rira) :  

Shanão eina mayãrnao.

Chansam : Lãirik katamli shanão mayãrnão mangateimana.

Shava shavã :

Shanão mayãrnao sãikora.

Chansam : Shava shavã sãikorali ningshilãka.

Sheinaknak,Sheinãknãk, sheiyupyup:

Shãikaphã, khamanui.

Chansam: Sã chiya sheinaknak shãiphãshuna.ii.Heingãr chiya sheinãknãka.Cake chiya sheiyupyuphãiya.

Sheiphi sheilãng :

Mathãda mangavãi kakazak.

Chansam : Katotnãhãoda sheiphi sheilãnglaga gãrili ngahomthuihãowa.

Shimcham luicham :

Awo ãyina hãimi kasã shimpam, lui, ahang hkt.

Chansam : Shimcham luichama shanãoli mayarpãimana. Yorlala shimluikatli khãngrifara.

Shimchon luichon :

Shim khamathã, lui khamathãli ngahom kazat.

Chanjam : “Tengri tengchat khalãirano, shimchon luichonli yangmasei!”  Kakhalat, ãzak mamathãlala, shim khamathã, lui khamathãli yangmasa kajina.

Shimdhari luidhari :

Shimwui dhari, luiwui dhari sãikora (boundary).

Chanjam : Shimdhari luidhari kashom thãrãn, “Ye, mina hei; mi thilo, sãna hei; sã thilo,”da zamkhor kharekthalaga khonshida Sharvana lunggui shoma.

Shimkãi luikãi :

Shimli luili makãilakla sãki kajiwui yan (ãzã).

Chansam : Shimkãi luikãiwui kashong saklaka.

Shimkãi ramkãi :

Shimli, luili, mili rãshão kasang, rãkhali, mashitkasanga  ot rãkasa.

Chansam : Shimkãi luikãi, shimkãi ramkãili saklak eina kashong rãnga.

Shimpam luipam :

Shim sãkhavai ãpam, vãzã khavãi lui.

Chansam : Ara Ukhrulwui shimpam luipam lola makhuithura.

Shimphãt luiphãt :

Shimlui mathui kasang, shimlui lokasang.

Chansam : Ngalã chihuthailaga (fathuingasakhaialaga) thishumhaiakha/ãshum ãmãn maleiakha ãzarvana mathui kasanga shimphãt luiphãt chi ãwoshina /vareina ãkhuipãiya.

Shimra meimei :

Shim kachui.

Chansam : Achãlakhava, shimra meimei mashok khavai Meiyan saklãk eina yanga.

Shimshãr luishãr :

Shimli luili kashãr.

Chansam : Shimshãr luishãrwui zamkhor hi zamshokra mamangmana, ãshin (zam sangkhare) manga.

Shimshim luilui :

Shimlila, luilila ãpam kachida.

Chansam : [i] Shimshim luilui hithãzatshumlo! Makhangatun kasã chi shimlila, kateishiwuilila hithãda masãzatlu. [ii] Nawui otsaka shimshim luilui khamathã pão mashãngayãomana.

Shimyar luiyar :

Shim kala lui khami.

Chanjam : Shimyar luiyar mangathingphãphãalu, “shim ngathing, shim yorzãya, lui ngathing lui yorzãya.”

Chansam : Ngala ngamãthang shimyar luiyar ngathingphalunga (khi mirada ngahãnphalunga).

Shimyor luiyor :

Shim kala lui khayorwui zatkhanã.

Chansam : Shimyor luiyor ãkhavãna mayorkasãimana, mi khani ãkhana yorphalunga.

Shimzan luizan :

Shimli luili khali kasha rãkashokli kashong kharãng.

Chansam : Shimzan luizan ãthishurda, Kachikathãna shimli kala luili ot lithuihãiakha shimãn kahaiya otla hankhami eina ngasoda kashongla ãtungli parkahãina.

Shiri shirã :

Vãnãoyur sãikora.

Chansam : Zingkumwui lungli shiri shirãna mazok mahãtnikhalada khayang chili Kashong Kahão hoi.

Shiyan chikãn :

Dharmawui ãngaret.

Chansam : Shiyan chikãn khayangmeilo.

Shongrei shongrã :

Kashong kahak kateowa saikora.

Chansam : [i] Shirui Kashong kaphung shongrei (kahaka) shongrãli (kateowa) horãm tãrãkha thakhaira. [ii] Khamangtungli katheli yankashãi, kachipat hi mathir phungngui sãthuda Shongrei Shongrã shongrãn tãya.

Shophalat shophalã :

Ava eina ãnão khangakum, ãzarra eina ãpã khangakum.

Chanjam : “Shophalat shophalã akha machongna tãka (ãva eina ãnão ngakumda shophalat akha lãngpãrna tãka, meina chuiya), sholãakha kazing ngaleina theiya(ãzarra eina ãpã sholã akha kazing ngaleina  mamayãmana).

Shumra shumzãt :

Kankhalãihãoranu kaji thãda zãphã akha zãphã khamei, mangphã akha mangphã khamei sãkhanganão.

Chansam : Shumra shumzãt kasãtala! Vãiteili zamshei phummangta (mangphã akha mangphã khamei kasã).

Shum shimur :

Shimkhur shumkahai, mitkahai.

Chansam : Mang (dream) chiya mamathãmana, shumshimur mangna (dream).

Shurung shurvã :

Matheikhuila shurkazat.

Chanjam : “Khãmong thãda”, “Khorshung thãda shurung shurvã masãalu.”

Siluiva siluivã :

Mapung phãkahaiya silui ãva, silui ãvã.

Chansam : Siluiva siluivã sãshida seinão kheithatmihãiakha, sei chiwui ãmanla ãnãsorli (tangkhaili) kãiya.

Sinã lupã :

Lan.

Chanjam : Sinã lupãna mirinli makachangmeimana, “sinã hola nganãiya, lupã hola pãya” (Somi Kasomwoshi).

Bible: “Sinã lupã kaphã thãda ngathum kahai lan thãda phãakha ..theishingkhuira” Chanj 2.5

Singpakpak, singpapa, singtaktak :

Makhamanak, makhanganãi.

Chansam : Tinphã, haphã chiya singpakpak, singpapa, singtaktak pãng churserhãira.

Siphan zingrot :

Masi kaphan kazingla kharo.

Chanjam : “Siphan zingrotli mayui kharar thada Hanga wungnãoli mayuirarmana.”

Bible : “Siphan zingrot kharã eina makaphã makhayã mi maleiluithuwa.” Chanjam 10.25a

Sisi riri :

Thãkda kazat, zatung zatkhavã.

Chansam : Nao chiya sisi riri eina ungvã kahãi matheimana.

Situng sitvã :

Khãi eina kasit.

Chansam : Situng sitva sãlaga sifa nonga.

Sop sop :

Nganã khangãitui, lumlãk eina khamatui.

Chanjam : “Awui chãnhãna sopsop eina sãthão kakhaneo thãmaya.” Kakhalat, khikha khangui maleilak kaji thãda khamatui.

Sorsor :

Kagapik, khãngkasang.

Chanjam : [i] “Sorsor mahãialu, sornã akha sortãhaowa.”  [ii] “Peopeo sorsor machilo, peo.. ta jatãhãipãishina.”

Suipurpur, suiturtur :

Suitur eina kazat, yasharop eina kazat.

Chansam : Zingrotli suipurpur ngareoda lei.

Suiringring :

Ringshihãoda zingrotlunglila mangasãmkakhui.

Chansam : Ringshihãoda suiringring kazing rolala mangasamkhuimana.

Suironron :

Sãri mashaksã kathei.

Chansam : Suironron chonshava ngavãilaga morkuilem (zãngãilãk, mangngãilak eina) zatta lei.                  

Suishak suizã :

Sotmasãolaga zãkakhui, mashitreklaga sui sãkazat, mashãt kazat.

Chanjam : [i] “Latshãi thãda miwui lan suishak suizã zatmaya.” [ii] Suishak suizã khavãi sorsor kahãngli kachangna machiano, mashitrekta zãkhavai phãkazatmana.

Suiung suivã :

Chãkhui kapãi.

Chanjam : [i] Suiung suivã masãkatheiya mi ngashangshilãka. [ii] Suiung suiva kasã ngachãna.

Please follow and like us:
error0

Leave a Reply