Yarra

Yarra – Paham

Kazing kumuda luisao luishom sārānura, lui zangsaousa kachi eina yarra shaka.  Hi khaying kachāngli sāya.  Mayarngalābingwui phanitna.  Gaharnao binga tāzakta phangāthang shaka kha mayarngalā binga chili lāngdala shakvai.  Phanit hi yarsin singkahai katongana kashakna, kala kachichāchāwui yaryar eina pamma.  Hi ngalānao akhashiwuili Kumkum eina ngatakngatāda shaka.  Hili yarshim hoya.  Rida sām retlaga zamla hangsanghao kala khorla kheisang haowa.  Kala yarralungli shaikhavaida ngalānaobingna yarkhai khaisang haowa.  Athumli chiwui vāng vākshot teomeida khuiya.  Vākret/shot ayur kathumleiya chiya; Khalāk yārron eina khalāk ngalā, ayeithei yāron eina ayeithei ngalā kala vāhong yārron eina vāhongla.  Kha zam sām eina khor sāmva ngaraichāda shokngaroka.  Hithāda lupāwui pongli vākshot khangatei maram akhapāna khalāknaobingwui lākhong khamashāva sāthuihaoda athumshiwui lui khavāli yang kachotmei, kala ayeitheibingwui lāpurlui, ākānglui khavāli yang machotmeimana.  Ramei vāhongnaobinga athumwui lui leiya chilala atam kasāngkhaleiya ngalang pheithuihaowa, pheizātli thānvā haowa.  Hiwui vang athumna teomeida shoka.

Yarra akhanama shakzangra kachieina aja kathā awungawui lamyai luili ashi shangnaobingna lam ayaimi haowa.  Hili hok akha taithatlaga Awungawui lamyailui asaomihaowa.  Lamkhayaiwui kakhalatta ara phanit sālaga akup eina luisaouloda kakasona.

Kharethang yarsā taithata, chithang chi phanitli rikkhavaida thing phungsangpama kala chithang ngazin yar shakzanghaowa.

Kakhanethang eina thuilaga khanaoeina tangda kasā otsak khangateimaleila ngaraichāda sāchinga.  Yarshimli phāshak phāzāpamlaga lumlaophup eina laa sānganao kala mahon nganaopama.  Yarrali yāronnaobinga mayarnaowui sāri sai chiya; hanchang malao ngavai, kaikhana neichang malao shei, sifa pāsi maningakha sipao ngakham, chāphek nilala ngachā, kazao sang, pheikhom sang, kāngra sang, kāngrali shaireng neisang, kaikhana kāngra tungli mareo tingting reojiya.

Ngalānaobingna phāngyai nilala kahāng kashan nilala ngavai, āphasāli kumying ngahup, hār sang, kazao sang, kongsāng ngachālaga tatārik eina pama.

Mayarngalābingna kayāngkhareili mahon ngapao kazatli khorām sing serlaga khor zam mang mamānda zata.  Ngalānao kaikhana lengcheng hamli khor zam khuizatlaga tāk māmānda zata.  Athumna mang kazat khor zam chi, lumlaoli rākhayanga preinaosan, kala kasār kafali rara eina shimanzatta.  Tangkhulwui khangachā sāthuda rākhayangbing chinala khikha vaikashi maleilākla rara eina sasamang khuimaya.  Hithāda mahonzatlaga yar akha eina yar akha nilala tāng akha eina tang akha nilala ngatuka, kala yarshim akha eina akha ngatak ngatāda kāngaroka.

Mayarngalābingwui vanga yarra hili ringphākhamei maleimana.  Lumlao chili lāngda yarkhai khaisang kahai chi khorli ngapa pama.  Atam hithārānli lumlaoli lāngda khor zam tungli kala sā tungli ngareopi ngareopam kachina.  Thangkachida rakhongli āramayāngkhuichinga.  Yāronnaobing chi thangkachida pāsi kathar sākhui chinga.

Yarra Laa

Tholā pei shirmnā peiuwa,

O! tangton khalai shu-u-wa.

Ram ngalā kānuwa, O! ram ngalā kānuwa,

Ipā ayalengli malungchān mathoya,

O! malungchān mathoya,

O, malung kachāngana,

Naoya ungkhāng khalonga.

Glossary

Yarkhai:  Yarnao kongli khai vākaphā

Contributed by Tsivyo Kasom

Source: Ringphatyan written S Kanrei

Comments

  1. I visited a lot of website but I believe this one has something special in it in it

  2. I’m still learning from you, as I’m making my way to the top as well. I definitely enjoy reading everything that is posted on your website.Keep the tips coming. I liked it!

Leave a Reply

Your email address will not be published.